ଭୁବନେଶ୍ୱର,୫।୪: ଭାରତୀୟ ଷ୍ଟେଟ ବ୍ୟାଙ୍କ (ଏସ୍ବିଆଇ)ର ଭୁବନେଶ୍ବର ମଣ୍ଡଳ ପକ୍ଷରୁ ଓଡ଼ିଶା ଦିବସ ପାଳନ କରାଯାଇଥିଲା। ଏପରିକି ଏସବିଆଇ ଓଡ଼ିଶା କ୍ଷେତ୍ରର ସମସ୍ତ ଶାଖା ଓ କାର୍ଯ୍ୟାଳୟରେ ମଧ୍ୟ ୮୮ତମ ଓଡ଼ିଶା ଦିବସ ଏକ ସମୟରେ ପାଳିତ ହୋଇଯାଇଛି। ଏହି ପରିପ୍ରେକ୍ଷୀରେ ଏସ୍ବିଆଇ ଓଡ଼ିଶା ମୁଖ୍ୟାଳୟ ଭୁବନେଶ୍ୱରଠାରେ ଓଡ଼ିଶା ଦିବସ ଉପରେ ଆଧାରିତ ଏକ ବାଲୁକାସ୍ତୂପକୁ ଏସ୍ବିଆଇ ଭୁବନେଶ୍ବର ମଣ୍ଡଳ ମୁଖ୍ୟ ମହାପ୍ରବନ୍ଧକ ଚନ୍ଦ୍ରଶେଖର ଶର୍ମା ଉନ୍ମୋଚନ କରିଥିଲେ।
ସେହିଭଳି ଭୁବନେଶ୍ବର-ପୁରୀ ବାଇପାସ ସ୍ଥିତ ପାଣ୍ଡରା ଛକଠାରେ ଥିବା ଉତ୍କଳମଣି ଗୋପବନ୍ଧୁ ଆଦର୍ଶ ବୃଦ୍ଧାଶ୍ରମରେ ଥିବା ନିରାଶ୍ରିତ ଅନ୍ତେବାସୀମାନଙ୍କୁ ଚାଦର, ମାସିକ ସଉଦା, ଷ୍ଟାଣ୍ଡ ଫ୍ୟାନ ସହ ଅନ୍ୟ ଅତ୍ୟାବଶ୍ୟକ ସାମଗ୍ରୀ ମଧ୍ୟ ପ୍ରଦାନ କରାଯାଇଥିଲା। ଏପରିକି ଉକ୍ତ ବୃଦ୍ଧାଶ୍ରମ ପରିସରରେ କେୟାର ହସ୍ପିଟାଲ ସହଯୋଗରେ ଏକ ସ୍ବାସ୍ଥ୍ୟ ସେବା ଶିବିରର ଆୟୋଜନ କରାଯାଇଥିଲା। ଅପରପକ୍ଷରେ କାର୍ଯ୍ୟକ୍ରମର ୨ୟ ପର୍ଯ୍ୟାୟରେ ଆୟୋଜିତ ଏକ ସ୍ବତନ୍ତ୍ର ସଭାରେ ଯୋଗ ଦେଇ ଶର୍ମା କହିଥିଲେ, ଷ୍ଟେଟ ବ୍ୟାଙ୍କ ଭୁବନେଶ୍ବର ମଣ୍ଡଳକୁ ୨ ଟ୍ରିଲିୟନ ବ୍ୟବସାୟରେ ପହଞ୍ଚାଇଥିବା ସମସ୍ତ କର୍ମଚାରୀଙ୍କୁ ସାଧୁବାଦ ଜଣାଇବା ସହ ଧନ୍ୟବାଦ ଜ୍ଞାପନ କରିଥିଲେ।
ବିଶେଷ କରି ବ୍ୟାଙ୍କର ସମସ୍ତ ଷ୍ଟାଫ୍ ଓ ବ୍ୟବସାୟିକ ଏକକ ମୁଖ୍ୟମାନଙ୍କୁ ଗ୍ରାହକ ସଂଯୋଗ ଓ ଉନ୍ନତ ଗ୍ରାହକ ସେବା ଉପରେ ସର୍ବୋପରି ଧ୍ୟାନ ଦେବା ପାଇଁ ପରାମର୍ଶ ଦେଇଥିଲେ। ଏପରିକି ଷ୍ଟେଟ ବ୍ୟାଙ୍କର ସମସ୍ତ ଗ୍ରାହକ ଓ ଓଡ଼ିଶାବାସୀଙ୍କୁ ଓଡ଼ିଶା ଦିବସରେ ସେ ଶୁଭ କାମନା ଜଣାଇଥିଲେ। ପରିଶେଷରେ କର୍ମଚାରୀମାନଙ୍କ ଦ୍ୱାରା ଆୟୋଜିତ ଏକ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।
