ନୂଆଦିଲ୍ଲୀ, ୧୦।୧୧: ଅନ୍ତର୍ଜାତୀୟ ହକି ଫେଡେରେଶନ (ଏଫ୍ଆଇଏଚ୍) ପକ୍ଷରୁ ପ୍ରଥମଥର ପାଇଁ ମହିଳା ନେସନ୍ସ କପ୍ ଟୁର୍ନାମେଣ୍ଟ ଆରମ୍ଭ ହେବାକୁ ଯାଉଛି। ସ୍ପେନ୍ର ଭାଲେନ୍ସିଆଠାରେ ଏହା ଡିସେମ୍ବର ୧୧ରୁ ୧୭ ପର୍ଯ୍ୟନ୍ତ ଅନୁଷ୍ଠିତ ହେବ। ଅନ୍ତର୍ଜାତୀୟ କ୍ୟାଲେଣ୍ଡରରେ ଏହା ଗୁରୁତ୍ୱପୂର୍ଣ୍ଣ ଫିକ୍ସଚର। କାରଣ ଏଥିରେ ପ୍ରମୋଶନ ଏବଂ ରେଲିଗେଶନ ସିଷ୍ଟମ ରହିବ। ପ୍ରତିଯୋଗିତାର ଚାମ୍ପିୟନ ଦଳ ଏଫ୍ଆଇଏଚ୍ ହକି ମହିଳା ପ୍ରୋ-ଲିଗ୍ର ୨୦୨୩-୨୪ ସିଜନ ପାଇଁ ଯୋଗ୍ୟତା ଅର୍ଜନ କରିବ। ଏହି ସମ୍ମାନଜନକ ପ୍ରତିଯୋଗିତା ପାଇଁ ବୁଧବାର ଭାରତୀୟ ଦଳ ଘୋଷଣା କରାଯାଇଛି। ଗୋଲକିପର ସବିତାଙ୍କୁ ଅଧିନାୟିକା ଏବଂ ଓଡ଼ିଶାର ତାରକା ଡିଫେଣ୍ଡର ଦୀପ୍ଗ୍ରେସ୍ ଏକ୍କାଙ୍କୁ ଉପ-ଅଧିନାୟିକା ଦାୟିତ୍ୱ ପ୍ରଦାନ କରାଯାଇଛି। ଭାରତ ଗ୍ରୁପ୍ ‘ବି’ରେ କାନାଡ଼ା, ଜାପାନ ଓ ଦକ୍ଷିଣ ଆଫ୍ରିକା ସହିତ ସ୍ଥାନ ପାଇଛି। ଆୟର୍ଲାଣ୍ଡ, ଇଟାଲୀ, କୋରିଆ ଓ ସ୍ପେନ୍ ଗ୍ରୁପ୍ ‘ଏ’ରେ ରହିଛନ୍ତି।
କୋଭିଡ୍-୧୯ରେ ସଂକ୍ରମିତ ହୋଇଥିବା ଯୋଗୁ ବର୍ମିଂହାମ ରାଜ୍ୟଗୋଷ୍ଠୀ କ୍ରୀଡ଼ାରେ ଖେଳିପାରି ନ ଥିବା ନବଜୋତ କୌର ଦଳକୁ ଫେରିଛନ୍ତି। ସେହିପରି ଯୁବ ଫରଓ୍ବାର୍ଡ ବିୟୁଟି ଡୁଙ୍ଗ୍ଡୁଙ୍ଗ ଅନ୍ତର୍ଜାତୀୟ ପଦାର୍ପଣ କରିବାର ସୁଯୋଗ ପାଇଛନ୍ତି। ଗତ ରାଜ୍ୟଗୋଷ୍ଠୀ କ୍ରୀଡ଼ାରେ ବ୍ରୋଞ୍ଜ ପଦକ ଜିତିଥିବା ଭାରତୀୟ ମହିଳା ଦଳ ୨୦୨୧-୨୨ରେ ପ୍ରୋ ଲିଗ୍ ପଦାର୍ପଣ କରିଥିଲା। ପ୍ରଥମ ବର୍ଷରେ ଭାରତ ପ୍ରଭାବୀ ପ୍ରଦର୍ଶନ କରି ଆର୍ଜେଣ୍ଟିନା ଓ ନେଦରଲାଣ୍ଡ୍ସ ପଛକୁ ତୃତୀୟ ସ୍ଥାନରେ ରହିଥିଲା। ଆଗାମୀ ନେସନ୍ସ କପ୍ ଜିତିଲେ ଦଳ ଦ୍ୱିତୀୟ ଥର ପାଇଁ ପ୍ରୋ ଲିଗ୍ ଖେଳିପାରିବ।
ଭାରତୀୟ ଦଳ
ଗୋଲକିପର୍ସ: ସବିତା (ଅଧିନାୟିକା), ବିଚୁ ଦେବୀ ଖାରିବାମ।
ଡିଫେଣ୍ଡର୍ସ: ଦୀପ୍ଗ୍ରେସ୍ ଏକ୍କା (ଉପ ଅଧିନାୟିକା), ଗୁରଜିତ କୌର, ନିକ୍କି ପ୍ରଧାନ, ଉଦିତା, ଇଶିକା ଚୌଧାରୀ।
ମିଡ୍ଫିଲ୍ଡର୍ସ: ନିଶା, ସାଲିମା ଟେଟେ, ସୁଶୀଳା ଚାନୁ ପୁଖରାମବାମ, ମୋନିକା, ନେହା, ସୋନିକା, ଜ୍ୟୋତି, ନବଜୋତ କୌର। ଫରଓ୍ବାଡର୍ସ: ବନ୍ଦନା କାଟରିୟା, ଲାଲରେମସିଆମି, ନବନୀତ କୌର, ସଙ୍ଗୀତା କୁମାରୀ, ବିୟୁଟି ଡୁଙ୍ଗ୍ଡୁଙ୍ଗ।
