ଭାଜପାରେ ମିଶିବାର ୧୫ ମିନିଟ୍‌ ନ ହେଉଣୁ ବିଜେଡିକୁ ଫେରିଲେ ନେତା-କର୍ମୀ; କହିଲେ ‘ଭୁଲ୍‌ ବୁଝି ପାରି…’

କେନ୍ଦୁଝର,୧୭।୫ (ନରେଶ ଚନ୍ଦ୍ର ପଟ୍ଟନାୟକ): ଭାଜପା ଜିଲା କାର୍ଯ୍ୟଳୟଠାରେ କେନ୍ଦ୍ର ଖଣି ଓ ଇସ୍ପାତ ମନ୍ତ୍ରୀ ଫଗନ ସିଂ କୁଲସ୍ତେ ଏବଂ ରାଜସ୍ଥାନରୁ ରାଜ୍ୟସଭା ଏମ୍‌ପି ଚୁନିଲାଲ ଗୋରାସିଆ,ଜିଲା ଭାଜପା ସଭାପତି ଅଂଶୁମାନ ସବୁଜ ମହାନ୍ତ ବର୍ମା,ସଦର ଭାଜପା ବିଧାୟକ ପ୍ରାର୍ଥୀ ମୋହନ ଚରଣ ମାଝୀଙ୍କ ଉପସ୍ଥିତିରେ ଏକ ବିରାଟ ମିଶ୍ରଣ ପର୍ବ ଅନୁଷ୍ଠିତ ହୋଇଯାଇଥିଲା। ଏହି ମିଶ୍ରଣ ପର୍ବରେ ବିଜେଡି ରାଜ୍ୟ ଯୁବ ସାଧାରଣ ସମ୍ପାଦକ ଅଞ୍ଜନ କୁମାର ବେଜ ଓ ସମାଜସେବୀ ତଥା ଶିଳ୍ପପତି ମୃତ୍ୟୁଞ୍ଜୟ ସାହୁ, ଯୁବନେତା ଅକ୍ଷୟ ବେହେରା ଏବଂ ସମାଜସେବୀ ଦେବରାଜ କାରୁଆଙ୍କ ସହ ଶତାଧିକ ବିଜେଡି କର୍ମୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନୀତି ଓ ଆଦର୍ଶରେ ଅନୁପ୍ରାଣିତ ହୋଇ ଭାଜପାରେ ସାମିଲ ହୋଇଥିଲେ। ହେଲେ ମିଶ୍ରଣ ପର୍ବ ଶେଷ ହେବାର ପ୍ରାୟ ୧୦ ମିନିଟ ପରେ ଅସନ୍ତୁଷ୍ଟ ବିଜେଡି ନେତା ଓ କର୍ମୀ ମାନେ ପୁଣି ଥରେ ବିଜେଡିକୁ ଫେରିଛନ୍ତି। ଏକ ମିଶ୍ରଣ ସଭାରେ ବିଜେଡି ଟୋପି ଓ ଉତ୍ତରୀୟ ପିନ୍ଧିବା ଘଟଣା ଚର୍ଚ୍ଚାର ବିଷୟ ହୋଇଛି।

ପ୍ରକାଶ ଯୋଗ୍ୟ, ଭାଜପାର ମିଶ୍ରଣ ପର୍ବରେ ବିଜେପି ଜିଲ୍ଲା ସାଧାରଣ ସମ୍ପାଦକ ଶୁକଦେବ ମହାନ୍ତ, ଜିଲ୍ଲା ଉପସଭାପତି ଗୋପୀନାଥ ରାମ, ଗଣେଶ୍ୱର ମହାନ୍ତ, କେନ୍ଦୁଝର ନଗର ସଭାପତି ବିଶ୍ୱଜିତ ତ୍ରିପାଠୀ,ଓବିଶି ମୋର୍ଚ୍ଚା ଜିଲ୍ଲା ସଭାପତି ଲକ୍ଷ୍ମଣ ରାଉତ ତଥା ପ୍ରମୁଖ କାର୍ଯ୍ୟକର୍ତ୍ତା ଉପସ୍ଥିତ ଥିଲେ। କେନ୍ଦ୍ର ମନ୍ତ୍ରୀ ଏବଂ ସଦର ବିଧାୟକ ପ୍ରାର୍ଥୀ ମୋହନ ଦଳୀୟ ଉତ୍ତରୀୟ ଓ ଟୋପି ପିନ୍ଧାଇ ସେମାନଙ୍କୁ ସାଗତ କରିଥିଲେ । ରାମ ସେତୁର ଗୁଣ୍ଡୁଚି ପରି ଦଳର ସେବା କରି ଶୁଆକାଟି ଖଣି ଅଞ୍ଚଳ ତଥା କେନ୍ଦୁଝର ଜିଲାର ସର୍ବାଙ୍ଗୀନ ଉନ୍ନତି ପାଇଁ କାର୍ଯ୍ୟ କରିବେ ବୋଲି ଅଞ୍ଜନ ବେଜ କହିଥିଲେ। ତେବେ ନିଜର ଭୁଲକୁ ବୁଝି ନେତା ଓ କର୍ମୀମାନେ ପୁଣି ଦଳକୁ ଫେରିଛନ୍ତି । ସାମାଜିକ ମିଡ଼ିଆରେ ସେମାନଙ୍କ ମିଶ୍ରଣର ଫଟୋ ଭାଇରାଲ ହୋଇଛି। କେତେ ଜଣ ଫେରିଛନ୍ତି ସଠିକ ଜଣା ପଡ଼ି ନ ଥିଲେ ହେଁ ଏଭଳି ଘଟଣା ରାଜନୀତିରେ ସମ୍ଭବ ବୋଲି ଚର୍ଚ୍ଚା ହେଉଛି। ବିଜେଡି ରାଜ୍ୟ ଯୁବ ନେତା ସୌମ୍ୟ ଶଙ୍କର ଚକ୍ରଙ୍କ ଉଦ୍ୟମରେ ଏହା ସମ୍ଭବ ହୋଇଥିବା ବିଜେଡି ର ନେତା ମାନେ କହିଛନ୍ତି। ମୋବାଇଲ ସୁଇଚ ଅଫ୍ ଥିବାରୁ ଅଞ୍ଜନ ଙ୍କ ମତାମତ ନିଆ ଯାଇ ପାରିନାହିଁ।