ମାର୍ଗାଓ, ୧୨। ୨ : ଚଳିତ ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ)ରେ ଗୁରୁବାର ଓଡ଼ିଶା ଏଫ୍ସି ଓ କେରଳ ବ୍ଲାଷ୍ଟର୍ସ ମଧ୍ୟରେ ଅନୁଷ୍ଠିତ ମ୍ୟାଚ ୨-୨ ଗୋଲରେ ଅମୀମାଂସିତ ଭାବେ ଶେଷ ହୋଇଛି। ଓଡ଼ିଶା ଏଫ୍ସି ତରଫରୁ ଡିଏଗୋ ମୌରିସିଓ (୪୫ତମ ଓ ୭୪ତମ ମିନିଟ୍) ଦୁଇଟି ଗୋଲ ସ୍କୋର କରିଥିଲେ। କେରଳ ବ୍ଲାଷ୍ଟର୍ସର ଜୋର୍ଡାନ ମୁରେ (୫୨ତମ) ଏବଂ ଗ୍ୟାରି ହୁପର (୬୮ତମ) ଗୋଟିଏ ଲେଖାଏ ଗୋଲ ଦେଇଥିଲେ। ଏହି ଦଳ ଓଡ଼ିଶା ଅପେକ୍ଷା ଭଲ ଖେଳିଥିଲା। ବହୁ ଗୋଲ ଦେବାର ସୁଯୋଗ ପାଇଥିଲେ ମଧ୍ୟ କାର୍ଯ୍ୟକାରୀ କରିବାରେ ବିଫଳ ରହିଥିଲା। ମ୍ୟାଚ ଡ୍ର ରଖିବା ଦ୍ୱାରା ଦଳ ପ୍ଲେ-ଅଫ୍ ଆଶା ମଉଳି ଯାଇଛି। ଡିଏଗୋ ମୌରିସିଓ ହିରୋ ଅଫ୍ ଦି ମ୍ୟାଚ ବିବେଚିତ ହୋଇଥିଲେ। ପ୍ରତିଯୋଗିତାରେ ଓଡ଼ିଶା ଏଫ୍ସିର ଏହା ୧୬ତମ ମ୍ୟାଚ ଥିଲା। ଦଳ ଗୋଟିଏ ବିଜୟ, ୬ ଡ୍ର ଏବଂ ୯ ପରାଜୟରୁ ୯ ପଏଣ୍ଟ ଲାଭ କରି ଟେବୁଲର ସର୍ବନିମ୍ନ ୧୧ତମ ସ୍ଥାନରେ ରହିଛି। ଅନ୍ୟପକ୍ଷରେ ୧୭ ମ୍ୟାଚ ଖେଳି ସାରିଥିବା କେରଳ ଦଳ ୧୬ ପଏଣ୍ଟ ସହ ଟେବୁଲର ୯ମ ସ୍ଥାନରେ ରହିଛି।