ଭୁବନେଶ୍ୱର, ୨୦।୪(ତପନ ସ୍ବାଇଁ): ଇତିହାସ ରଚିଲା ଓଡ଼ିଶା ଏଫ୍ସି। ଅତିରିକ୍ତ ସମୟରେ ଇସାକ ଭନଲାଲରୁଆତଫେଲାଙ୍କ ଗୋଲ ବଳରେ ଓଡ଼ିଶା ଏଫ୍ସି ପ୍ରଥମଥର ପାଇଁ ଇଣ୍ଡିଆନ ସୁପର ଲିଗ୍-୨୦୨୪ର ସେମିଫାଇନାଲରେ ପ୍ରବେଶ କରିଛି। ଶୁକ୍ରବାର ଅନୁଷ୍ଠିତ ପ୍ଲେ-ଅଫ୍ରେ ଘରୋଇ ଦଳ ୨-୧ ଗୋଲରେ କେରଳ ବ୍ଲାଷ୍ଟର୍ସକୁ ପରାସ୍ତ କରିଛି। ନିର୍ଦ୍ଧାରିତ ସମୟରେ ଖେଳ ୧-୧ ଗୋଲରେ ବରାବର ରହିବାରୁ ଫଳାଫଳ ନିର୍ଣ୍ଣୟ ପାଇଁ ଅତିରିକ୍ତ ସମୟର ସହାୟତା ନିଆ ଯାଇଥିଲା। ଏଥିସହ ଚଳିତ ସିଜନରେ କେରଳ ଦଳର ଅଭିଯାନ ଶେଷ ହୋଇଛି। ଓଡ଼ିଶା ଏଫ୍ସି ୨୩ ତାରିଖରେ ସେମିଫାଇନାଲରେ ଲିଗ୍ ପର୍ଯ୍ୟାୟର ଟେବୁଲ ଟପ୍ପର ମୋହନ ବାଗାନ ସୁପର ଜାଏଣ୍ଟକୁ ଭେଟିବ। ସେମିଫାଇନାଲ ଦୁଇ ପର୍ଯ୍ୟାୟ ବିଶିଷ୍ଟ ହେବ।
ଲିଗ୍ ଟେବୁଲର ୪ର୍ଥ ଓ ୫ମ ସ୍ଥାନରେ ଥିବା ଦୁଇ ସମକକ୍ଷ ଦଳ ମଧ୍ୟରେ ଲଢ଼େଇ ଆରମ୍ଭରୁ ରୋଚକ ହୋଇଥିଲା। ପାସ୍ ଆକ୍ୟୁରେସି, ବଲ୍ ପୋଜେଶନ ଓ ପାସେସ୍ରେ ଯଦିଓ ଓଡ଼ିଶା ଏଫ୍ସି ଆଗରେ ରହିଥିଲା ତେବେ ପ୍ରଥମାର୍ଦ୍ଧ ଶେଷ ପର୍ଯ୍ୟନ୍ତ ଗୋଲ ହୋଇପାରି ନ ଥିଲା। ବିପଜ୍ଜନକ ପ୍ରଦର୍ଶନ ପାଇଁ ୨୨ତମ ମିନିଟରେ କେରଳ ବ୍ଲାଷ୍ଟର୍ସର ମିଲୋସ ଡ୍ରିନ୍କିକ୍, ୨୯ ମିନିଟରେ ଏଲ. ଶର୍ମା, ୪୨ମିନିଟରେ ମାର୍କ ଲେସ୍କୋଭିକ୍ ୟେଲୋ କାର୍ଡ ପାଇବା ଚର୍ଚ୍ଚାରେ ରହିଥିଲା। ଦ୍ୱିତୀୟାର୍ଦ୍ଧରେ ଆକ୍ରମଣ ପ୍ରତିଆକ୍ରମଣ ଜୋରଦାର ହୋଇଥିଲେ ହେଁ ଗୋଲପୋଷ୍ଟର ନେଟ୍ ଟଚ୍ କରିବା ଉଭୟ ଦଳର ଖେଳାଳିଙ୍କ ପାଇଁ କଷ୍ଟକର ହୋଇ ପଡ଼ିଥିଲା। ୬୭ତମ ମିନିଟରେ କେରଳ ପାଇଁ ଶୁଭ ମୁହୂର୍ତ୍ତ ଆସିଥିଲା। ମହମ୍ମଦ ଏମେନଙ୍କଠାରୁ ପାଇଥିବା ପାସ୍କୁ ଫିଡର ସେର୍ନିଚ୍ ନିୟନ୍ତ୍ରଣରେ ରଖି ବଲ୍କୁ ବକ୍ସର ଡାହାଣ ପଟରୁ ଡାହାଣ ପାଦରେ ଲେଫ୍ଟ କର୍ନରରେ ଭର୍ତ୍ତି କରାଇବାରେ ସଫଳ ହୋଇଥିଲେ। ମାତ୍ର ଘରୋଇ ପରିବେଶରେ ଓଡ଼ିଶା ଏଫ୍ସି ସହଜରେ ଛାଡ଼ିବାକୁ ପ୍ରସ୍ତୁତ ନ ଥିଲା। ୮୭ତମ ମିନିଟରେ ଡିଏଗୋ ମରିସିଓ ଗୋଲଟିକୁ ପରିଶୋଧ କରି ଦେଇଥିଲେ। ରୟ କ୍ରିଷ୍ଣାଙ୍କଠାରୁ ପାଇଥିବା ପାସ୍କୁ ମରିସିଓ ଗୋଲପୋଷ୍ଟର ମଧ୍ୟଭାଗରୁ ରାଇଟ୍ ଫୁଟ୍ ଶଟ୍ ମାଧ୍ୟମରେ ଏହି ଗୋଲ କରିଥିଲେ। ଫଳରେ ଘରୋଇ ଦର୍ଶକଙ୍କ ମଧ୍ୟରେ ଉତ୍ସାହ ଖେଳି ଯାଇଥିଲା। ୭୬ ମିନିଟରେ ଓଡ଼ିଶା ଏଫ୍ସିର କାର୍ଲୋସ ଡେଗାଡୋଙ୍କୁ ୟେଲୋ କାର୍ଡ ମିଳିଥିଲା।
୯୦+୭ ମିନିଟ ମଧ୍ୟରେ ଫଳାଫଳ ନ ମିଳିବାରୁ ମ୍ୟାଚ ଅତିରିକ୍ତ ସମୟକୁ ଯାଇଥିଲା। ମାତ୍ର ଏହାର ପ୍ରଥମ ଭାଗରେ କମାଲ ଦେଖାଇଥିଲେ ଓଡ଼ିଶା ଏଫ୍ସିର ଇସାକ ଭନଲାଲରୁଆତଫେଲା। ଅତିରିକ୍ତ ସମୟର ୮ମ ମିନିଟରେ ସେ ରୟ କ୍ରିଷ୍ଣାଙ୍କଠାରୁ ପାଇଥିବା ପାସ୍କୁ ଲେଫ୍ଟ ଫୁଟ୍ ଶଟ୍ ଜରିଆରେ ଗୋଲରେ ପରିଣତ କରିବାରେ ସକ୍ଷମ ହୋଇଥିଲେ। ଶନିବାର ଏଫ୍ସି ଗୋଆ ଓ ଚେନ୍ନାଇନ ଏଫ୍ସି ମଧ୍ୟରେ ହେବାକୁଥିବା ପ୍ଲେଅଫ୍ର ବିଜେତା ସେମିଫାଇନାଲରେ ପ୍ରବେଶ କରିବ।