ଭୁବନେଶ୍ୱର, ୧୦।୧୧(କ୍ରୀଡ଼ା ପ୍ରତିନିଧି)-
ଚଳିତ ମାସ ୨୦ରୁ ଗୋଆରେ ଆରମ୍ଭ ହେବାକୁ ଯାଉଥିବା ଇଣ୍ଡିଆନ ସୁପରଲିଗ୍ (ଆଇଏସଏଲ)ର ସପ୍ତମ ସଂସ୍କରଣ ପାଇଁ ସୋମବାର ଭୁବନେଶ୍ୱର ଭିତ୍ତିକ ଫ୍ରାଞ୍ଚାଇଜ୍ ଓଡ଼ିଶା ଏଫସିର ଜର୍ସି ଉନ୍ମୋଚିତ ହୋଇଛି। ଓଡ଼ିଶାର କଳା ଓ ସଂସ୍କୃତିକୁ ଭିତ୍ତିକରି ଜର୍ସି ଡିଜାଇନ୍ କରାଯାଇଛି ଏବଂ ପୂରା ଓଡ଼ିଆ ସ୍ପିରିଟରେ ଏହି ଉତ୍ସବକୁ ପାଳନ କରାଯାଇଛି। ଓଡ଼ିଶା ଏପରି ଏକ ରାଜ୍ୟ ଯିଏକି ଅନେକ ପ୍ରାକୃତିକ ବିପର୍ଯ୍ୟୟକୁ ସାମ୍ନା କଲେ ମଧ୍ୟ ଏଥିରୁ ବାହାରି ଆସି ଆଗକୁ ବଢ଼ି ସଫଳତା ପାଇଛି। ଏବେ ଏହା ଭାରତର କ୍ରୀଡ଼ା ରାଜଧାନୀଭାବେ ପରିଚିତ ହେଉଛି। ଓଏଫ୍ସି କ୍ଲବ ନୂଆ ଜର୍ସି ଉନ୍ମୋଚନ କରି ଏକ ଭିଡିଓ ସୋସିଆଲ ମିଡିଆରେ ଶେୟାର କରିଛି। ଏଥିରେ ସପୋର୍ଟଷ୍ଟାଫ୍ମାନେ ଅକ୍ଳାନ୍ତ ପରିଶ୍ରମ କରି କିପରି ଖେଳାଳିମାନେ ସମ୍ପୂର୍ଣ୍ଣ ଫିଟ୍ ରହି ପଡ଼ିଆକୁ ଓହ୍ଲାଇବେ ସେଥିପାଇଁ କାର୍ଯ୍ୟକରୁଥିବା ପରିଲକ୍ଷିତ ହେଉଛି। ଓଡ଼ିଶାର ଇତିହାସ, ସଂସ୍କୃତି ଓ ପରାମ୍ପରାକୁ ଆଖିଆଗରେ ରଖି ଜର୍ସିର ଡିଜାଇନ୍ କରାଯାଇଛି। ଏ ସମ୍ପର୍କରେ ଓଏଫ୍ସି ସଭାପତି ରୋହନ ଶର୍ମା କହିଛନ୍ତି ଯେ, ଆମେ ଏଥର ଓଡ଼ିଶାର କଳା ଓ ସଂସ୍କୃତିକୁ ଯୋଡ଼ି ନୂଆ କିଟ୍ ପ୍ରସ୍ତୁତ କରିବାକୁ ଚେଷ୍ଟା କରିଛୁ। ତେଣୁ ଯେତେବେଳେ ଆମ ଖେଳାଳି କିମ୍ବା ପ୍ରଶଂସକମାନେ ଏହି କିଟ୍କୁ ପିନ୍ଧିବେ ଓଡ଼ିଶା ସହିତ ଯୋଡ଼ିହୋଇ ରହିବେ। ପ୍ରଶଂସକଙ୍କ ଚାହିଦା ଅନୁସାରେ ଏଥର ପର୍ପଲ(ନୀଳଲୋହିତ) ରଙ୍ଗର ଜର୍ସି ପ୍ରସ୍ତୁତ କରାଯାଇଛି। ଭୁବନେଶ୍ୱର ଭିତ୍ତିକ ଓଡ଼ିଶା ଏଫସି ଚଳିତ ମାସ ୨୩ ତାରିଖରେ ବାମ୍ବୋଲିମ୍ସ୍ଥିତ ଜିଏମସି ଷ୍ଟାଡିୟମରେ ହାଇଦ୍ରାବାଦ୍ ଏଫସି ସହିତ ଖେଳି ଅଭିଯାନ ଆରମ୍ଭ କରିବ।
