ଭୁବନେଶ୍ୱର, ୧୪।୨(କ୍ରୀଡ଼ା ପ୍ରତିନିଧି)- ଗୋଆରେ ଚାଲିଥିବା ଇଣ୍ଡିଆନ ସୁପରଲିଗ୍ରେ ରବିବାର ଓଡ଼ିଶା ଏଫ୍ସି ଭାସ୍କୋର ତିଲକ ମୈଦାନରେ ନର୍ଥଇଷ୍ଟ ୟୁନାଇଟେଡକୁ ଭେଟିବ। ଭୁବନେଶ୍ୱରଭିତ୍ତିକ ଓଡ଼ିଶା ଦଳ ପୂର୍ବ ମ୍ୟାଚରେ ସଫଳ ପ୍ରତ୍ୟାବର୍ତ୍ତନ କରି କେରଳ ବ୍ଲାଷ୍ଟର୍ସ ବିପକ୍ଷ ମ୍ୟାଚକୁ ଡ୍ର ରଖିଥିବାରୁ ଆଗାମୀ ମ୍ୟାଚରେ ମଧ୍ୟ ଚମତ୍କାରିତା ଦେଖାଇବା ଆଶାରେ ରହିଛି। ୧୬ ମ୍ୟାଚରୁ ମାତ୍ର ୯ ପଏଣ୍ଟ ପାଇ ଟେବୁଲର ନିମ୍ନସ୍ଥାନରେ ରହିଛି ଓଡ଼ିଶା ଏଫ୍ସି। ମୁଖ୍ୟ କୋଚ୍ ଷ୍ଟୁଆର୍ଟ ବକ୍ସଟର ବିଦା ହୋଇ ସାରିଛନ୍ତି। ତେଣୁ ଅବଶିଷ୍ଟ ମ୍ୟାଚଗୁଡ଼ିକରେ ଶ୍ରେଷ୍ଠ ପ୍ରଦର୍ଶନ କରିବା ଅନ୍ତରୀଣ କୋଚ୍ ଗେରାଲ୍ଡ ପେଟନଙ୍କ ମୁଖ୍ୟ ଲକ୍ଷ୍ୟ। ପୂର୍ବ ମ୍ୟାଚରୁ ମିଳିଥିବା ମୋମେଣ୍ଟକୁ ଆଧାର କରି ଦଳ ଆଗାମୀ ମ୍ୟାଚରେ ଅବତୀର୍ଣ୍ଣ ହେବ ବୋଲି ପେଟନ ପ୍ରକାଶ କରିଛନ୍ତି। ଅନ୍ୟପକ୍ଷରେ ଏକଦା ୧୦ ମ୍ୟାଚ ଖେଳି ନିରାଶାଜନକ ସ୍ଥିତିରେ ଥିବା ନର୍ଥଇଷ୍ଟ ୟୁନାଇଟେଡ ପରବର୍ତ୍ତୀ ୬ଟି ମ୍ୟାଚରେ ଅପରାଜେୟ ରହି ପ୍ଲେ-ଅଫ୍ ଆଶା ଉଜ୍ଜୀବିତ କରିଛି। ଆଗାମୀ ମ୍ୟାଚ ଜିତି ଦଳ ଶୀର୍ଷ ୪ ସ୍ଥାନରେ ପ୍ରବେଶ ଲକ୍ଷ୍ୟରେ ରହିଛି। ଦଳ ଏବେ ୧୬ ମ୍ୟାଚରୁ ୫ ବିଜୟ, ୮ ଡ୍ର ଓ ୩ ପରାଜୟ ସହ ୨୩ ପଏଣ୍ଟ ପାଇଛି। ଓଡ଼ିଶା ବିପକ୍ଷରେ ଜିତିଲେ ଦଳ ପାଇଁ ସୁଯୋଗ ସୃଷ୍ଟିହେବ। ଗତ ଡିସେମ୍ବର ୨୨ରେ ଅନୁଷ୍ଠିତ ଓଡ଼ିଶା ଏଫ୍ସି-ନର୍ଥଇଷ୍ଟ ମୁକାବିଲା ୨-୨ ଗୋଲରେ ଡ୍ର ରହିଥିଲା।
