ଭୁବନେଶ୍ୱର,୨୫ା୧୨(ସରୋଜ ଜେନା): ପ୍ରଥମ ଥର ଇଣ୍ଡିଆନ୍ ସୁପର ଲିଗ୍ ଖେଳୁଥିବା ପଞ୍ଜାବ ଏଫ୍ସିକୁ ମଙ୍ଗଳବାର ଦିଲ୍ଲୀସ୍ଥିତ ଜବାହରଲାଲ ନେହେରୁ ଷ୍ଟାଡିୟମରେ ଭେଟିବ ଓଡ଼ିଶା ଏଫ୍ସି(ଓଏଫ୍ସି)। ପଞ୍ଜାବ ନିଜର ଅନ୍ତିମ ମ୍ୟାଚ୍ରେ ଚେନ୍ନାଇନ୍ ଏଫ୍ସିକୁ ପରାସ୍ତ କରିଥିବା ବେଳେ ଏହା ବେଶ୍ ଆତ୍ମବିଶ୍ୱାସରେ ନଜର ଆସିବ। ଓଏଫ୍ସି ନିଜର ଅନ୍ତିମ ମ୍ୟାଚ୍ରେ ଇଷ୍ଟବେଙ୍ଗଲ ସହିତ ପଏଣ୍ଟ ବାଣ୍ଟିଥିଲା। ନିଖିଲ ପ୍ରଭୁଙ୍କ ପ୍ରତ୍ୟାବର୍ତ୍ତନ ସହିତ ପଞ୍ଜାବର ଡିଫେନ୍ସ ଅଧିକ ଶକ୍ତିଶାଳୀ ହୋଇଛି। ଓଏଫ୍ସିର ଆକ୍ରମଣ ବେଶ୍ ଶକ୍ତିଶାଳୀ ରହିଥିବା ବେଳେ ମଙ୍ଗଳବାର ଏକ ରୋମାଞ୍ଚକ ମ୍ୟାଚ୍ ଆଶା କରାଯାଏ। ଓଏଫ୍ସି କ୍ରମାଗତ ୯ଟି ମ୍ୟାଚ୍ ଧରି ଅପରାଜେୟ ରହିଛି। ଦଳ ନିଜର ଅପରାଜେୟ ଧାରା ବଜାୟ ରଖିବାକୁ ପ୍ରୟାସ କରିବ। ୧୦ ମ୍ୟାଚ୍ ଖେଳି ଓଏଫ୍ସି ୧୮ ପଏଣ୍ଟ ସହିତ ପଞ୍ଚମ ସ୍ଥାନରେ ରହିଛି।
ଦିଲ୍ଲୀର ଜବାହରଲାଲ ନେହେରୁ ଷ୍ଟାଡିୟମରେ ଅନୁଷ୍ଠିତ ଖବରଦାତା ସମ୍ମିଳନୀରେ ଓଏଫ୍ସି ମୁଖ୍ୟ କୋଚ୍ ସର୍ଗିଓ ଲୋବେରା ଓ ସାହିଲ ପନଓ୍ବର ଯୋଗ ଦେଇଥିଲେ। ସମସ୍ତ ଖେଳାଳିଙ୍କ ପ୍ରଦର୍ଶନକୁ ନେଇ ମୁଖ୍ୟ କୋଚ୍ ଲୋବେରା ସନ୍ତୋଷ ପ୍ରକାଶ କରିଥିଲେ। ଉନ୍ନତ ମାନର ଫୁଟବଲ ଖେଳିବା ଉପରେ ସମସ୍ତ ଖେଳାଳି ଗୁରୁତ୍ୱ ଦେଉଥିବା ବେଳେ ଏହା ତାଙ୍କୁ ଖୁସି ଦେଉଛି ବୋଲି କହିଥିଲେ ଲୋବେରା। ଅନ୍ୟପକ୍ଷରେ ପଞ୍ଜାବ ଏଫ୍ସିର ଏହା ପ୍ରଥମ ବର୍ଷ ଅଟେ। ପ୍ରଥମ ବର୍ଷ ଟୁର୍ନାମେଣ୍ଟରେ ସର୍ବଦା କଷ୍ଟସାଧ୍ୟ ରହିଥାଏ। ଏହି ମ୍ୟାଚ୍ରୁ ୩ ପଏଣ୍ଟ ନେବାକୁ ଚେଷ୍ଟା କରିବୁ ବୋଲି ଲୋବେରା ଦୃଢୋକ୍ତି ପ୍ରକାଶ କରିଥିଲେ।
