ଭୁବନେଶ୍ୱର, ୨୨।୧୨ (କ୍ରୀଡ଼ା ପ୍ରତିନିଧି): ଚଳିତ ବର୍ଷର ଓଡ଼ିଶା ଓମେନ୍ସ ଲିଗ୍ (ଓଡବ୍ଲ୍ୟୁଏଲ୍)ରେ ଚାମ୍ପିୟନ ହୋଇଛି ଓଡ଼ିଶା ଏଫ୍ସି। ଇଷ୍ଟକୋଷ୍ଟ ରେଲଓ୍ବେ ଦ୍ୱିତୀୟ ସ୍ଥାନରେ ରହି ପ୍ରତିଯୋଗିତା ଶେଷ କରିଛି। ଫଳରେ ଓଡ଼ିଶା ଏଫ୍ସି ମହିଳା ଦଳ ଇଣ୍ଡିଆନ ଓମେନ୍ସ ଲିଗ୍ (ଆଇଡବ୍ଲ୍ୟୁଏଲ୍) ଖେଳିବାକୁ ଯୋଗ୍ୟତା ଅର୍ଜନ କରିଛି। ଏଥିସହ ଓଡ଼ିଶାରୁ ୨ଟି ଦଳ ଇଣ୍ଡିଆନ ଓମେନ୍ସ ଲିଗ୍ରେ ଭାଗନେବା ସ୍ପଷ୍ଟ ହୋଇଛି। ଗତବର୍ଷ ଇଣ୍ଡିଆନ ଓମେନ୍ସ ଲିଗ୍ରେ ଟପ୍-୪ରେ ରହିଥିବାରୁ ସ୍ପୋଟର୍ସ ଓଡ଼ିଶା ଆଗାମୀ ସଂସ୍କରଣରେ ମଧ୍ୟ ଖେଳିବାକୁ ଯୋଗ୍ୟତା ପାଇଛି।
ବୁଧବାର କଳିଙ୍ଗ ଷ୍ଟାଡିୟମରେ ଅନୁଷ୍ଠିତ ସିଜନର ଶେଷ ମ୍ୟାଚରେ ଓଡ଼ିଶା ଏଫ୍ସି ୨-୧ ଗୋଲରେ ଇଷ୍ଟକୋଷ୍ଟ ରେଲଓ୍ବେକୁ ପରାସ୍ତ କରିଛି। ଭୁବନେଶ୍ୱରର ୩ଟି ଗ୍ରାଉଣ୍ଡ କଳିଙ୍ଗ ଷ୍ଟାଡିୟମ, ୭ମ ବାଟାଲିଅନ ଗ୍ରାଉଣ୍ଡ ଏବଂ କ୍ୟାପିଟାଲ ପଡ଼ିଆରେ ଓଡ଼ିଶା ଏଫ୍ସି ମୋଟ ୧୦ଟି ମ୍ୟାଚ ଖେଳି ୪୬ଟି ଗୋଲ ଦେଇଥିବାବେଳେ ମାତ୍ର ୩ଟି ଗୋଲ ବରଣ କରିଥିଲା। ରେଲଓ୍ବେ ବିପକ୍ଷ ମ୍ୟାଚରେ ଓଡ଼ିଶା ଏଫ୍ସି ପକ୍ଷରୁ ମାଳତୀ ମୁଣ୍ଡା ୪ର୍ଥ ମିନିଟରେ ଏକ ଗୋଲ କରି ଦଳକୁ ଅଗ୍ରଣୀ କରାଇଥିଲେ। ମାତ୍ର ୨୯ତମ ମିନିଟରେ ରେଲଓ୍ବେର ୟୁମନାମ କମଳା ଦେବୀ ଗୋଲକରି ମ୍ୟାଚକୁ ୧-୧ ସ୍ଥିତିକୁ ନେଇ ଆସିଥିଲେ।]
ମ୍ୟାଚର ୫୫ତମ ମିନିଟରେ ପ୍ୟାରୀ ଖାଖା ଗୋଲ ଦେଇ ଓଡ଼ିଶା ଏଫ୍ସିକୁ ପୁଣି ଅଗ୍ରଣୀ କରାଇଥିଲେ। ଶେଷ ୩୫ ମିନିଟରେ ରେଲଓ୍ବେ ଦଳ ଆକ୍ରମଣାତ୍ମକ ପନ୍ଥା ଅବଲମ୍ବନ କରି ଖେଳିଥିଲେ ହେଁ ଗୋଲ ପରିଶୋଧ କରିପାରି ନ ଥିଲା। ଶେଷ ଦିବସରେ ଅନୁଷ୍ଠିତ ଅନ୍ୟ ୨ଟି ମ୍ୟାଚରେ ଓଡ଼ିଶା ପୋଲିସ ୬-୦ ଗୋଲରେ ରାଇଜିଂ ଷ୍ଟୁଡେଣ୍ଟକୁ ହରାଇଥିବାବେଳେ ସ୍ପୋଟର୍ସ ଓଡ଼ିଶା ୨-୦ରେ ଓଜିପି କ୍ଲବକୁ ପରାସ୍ତ କରିଛି। ଫୁଟବଲ ଆସୋସିଏଶନ ଅଫ୍ ଓଡ଼ିଶା (ଫାଓ) ଯୁଗ୍ମ ସମ୍ପାଦକ ଅଭିଜିତ ପାଲଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଦ୍ଯାପନୀ ଉତ୍ସବରେ ଉପସଭାପତି ଦିଲୀପ କୁମାର ସାହୁ, ଯୁଗ୍ମ ସମ୍ପାଦକ ବିଶ୍ୱ ରଞ୍ଜନ ଘଡ଼େଇ, ରାଜ୍ୟ ସରକାରଙ୍କ କ୍ରୀଡ଼ା ବିଭାଗର ଓଏସ୍ଡି ଶୁଭେନ୍ଦୁ ପଣ୍ଡା, ଫାଓ ରେଫରି ପ୍ୟାନେଲ ମୁଖ୍ୟ ଦୁର୍ଗା ମାଧବ ନାଏକ ପ୍ରମୁଖ ଉପସ୍ଥିତ ଥିଲେ।