ସୁନ୍ଦରଗଡ଼,୨୦ା୧୧(ଜୟ ନାରାୟଣ ମେଣ୍ଡୁଳି) : ଜିଲା କ୍ରୀଡ଼ା ସଂସଦ ଓ ଫୁଟ୍ବଲ ଆସୋସିଏଶନ ଅଫ ଓଡ଼ିଶା(ଫାଓ)ର ମିଳିତ ଆନୁକୂଲ୍ୟରେ ସୁନ୍ଦରଗଡ଼ ଷ୍ଟାଡିୟମରେ ଆୟୋଜିତ ୨୮ତମ ଜାତୀୟ ମହିଳା ଫୁଟବଲ ଚାମ୍ପିୟନଶିପ୍ର ୪ର୍ଥ ଦିବସରେ ଓଡ଼ିଶା ଓ ଗୋଆ ବିଜୟୀ ହୋଇଛନ୍ତି। ରବିବାର ସକାଳ ୧୦ଟାରେ ଓଡ଼ିଶା ଓ ଗୁଜରାଟ ମଧ୍ୟରେ ମ୍ୟାଚ୍ ଖେଳା ଯାଇଥିଲା। ସୁନ୍ଦରଗଡର ପୂର୍ବତନ ବିଧାୟକ ଯୋଗେଶ କୁମାର ସିଂହ ମୁଖ୍ୟ ଅତିଥି, ଫାଓର ଯୁଗ୍ମ ସମ୍ପାଦକ ମହମ୍ମଦ ଜବାର, ପୂର୍ବତନ ସାଇ କୋଚ ଅନନ୍ତ ବୋଷ, ସଦର ଜିଲା ପରିଷଦ ସଦସ୍ୟ ଅଶ୍ବିନୀ ନାଏକ ସମ୍ମାନିତ ଅତିଥି ଭାବେ ଯୋଗଦେଇଥିଲେ। ଏହି ମ୍ୟାଚ୍ରେ ଓଡ଼ିଶା ୬-୦ଗୋଲରେ ବିଜୟୀ ହୋଇଥିଲା। ଲଗାତର ଭାବରେ ଓଡ଼ିଶା ଏହାର ୪ଟି ଯାକ ମ୍ୟାଚରେ ବିଜୟୀ ହୋଇଛି। ଓଡ଼ିଶା ପକ୍ଷରୁ ସୁମିତ୍ରା ହେମ୍ବ୍ରମ ୨ଗୋଲ(୨୫ ଓ ୭୮ ମିନିଟ), ମନୀଷା ନାଏକ ୨ଗୋଲ(୩୭ ଓ ୬୨ମିନିଟ), ଯଶୋଦା ମୁଣ୍ଡା(୧୫ମିନିଟ) ଓ ଦୀପା ନାୟକ(୭୧ମିନିଟ) କରିଥିଲେ। ଅପରାହ୍ନ ୨.୩୦ରେ ଗୋଆ ଓ ମେଘାଳୟ ମଧ୍ୟରେ ହୋଇଥିବା ମ୍ୟାଚରେ ସୁନ୍ଦରଗଡ଼ ବିଧାୟିକା କୁସୁମ ଟେଟେ ମୁଖ୍ୟ ଅତିଥି ଭାବରେ ଯୋଗଦେଇଥିଲେ। ଏହି ମ୍ୟାଚରେ ଗୋଆ ୪-୧ଗୋଲରେ ବିଜୟୀ ହୋଇଥିଲା। ଗୋଆ ଦଳର ପର୍ଲ ଫର୍ନାଣ୍ଡେସ୍ଙ୍କ ହ୍ୟାଟ୍ରିକ ଗୋଲ(୧,୨୭,୨୯ମିନିଟ)ଓ କରିସ୍ମା ପୁରୁଷୋତ୍ତମ ସିରଭୋଲକର(୨୪ମିନିଟ)ରେ ଗୋଟିଏ ଗୋଲ ସ୍କୋର କରିଥିଲେ। ମେଘାଳୟ ତରଫରୁ ମାରବରିନ ନନଗ୍ରୁମ(୫୮ମିନିଟରେ) ଏକମାତ୍ର ଗୋଲ ଦେଇଥିଲେ। ଜିଲା କ୍ରୀଡ଼ା ସଂସଦର ସାଧାରଣ ସମ୍ପାଦକ ପ୍ରଭାତ କୁମାର ଭୋଳ, କୋଷାଧ୍ୟକ୍ଷ ଦୁର୍ଗାମାଧବ ନାଏକ, ଉପସଭାପତି ପୌଷଚନ୍ଦ୍ର ପଟେଲ, ମେରୀଜନ ବାଗେ, ବିମଲ ବୋଷ, ପ୍ରସନ୍ନ ବେହେରା, ଜୟଦେବ ପାତ୍ର, ରାଜେନ୍ଦ୍ର ପାଣ୍ଡେ, ନିତ୍ୟ କୁମାର ବଳ, ସୁଶୀଲ ପଟେଲ, ପ୍ରସାଦ ନାଏକ, ବୀରମିତ୍ର କାଲୋ, ରୋମାଞ୍ଚ ଭୈଷାଲ, ଶିଶିର ପଟେଲ, ଆଶିଷ ଦେ, ଅଜୟ ବହିଦାର, ଶ୍ୟାମ ନନ୍ଦନ ସହାୟ ପ୍ରମୁଖଙ୍କ ତତ୍ତ୍ୱାବଧାନରେ ଖେଳ ଆୟୋଜିତ ହେଉଛି। ଆସନ୍ତା ମଙ୍ଗଳବାର ୨୧ତାରିଖ ସକାଳ ୨୦ଟାରେ ଗୁଜରାଟ ଓ ଅରୁଣାଚଳ ପ୍ରଦେଶ ତଥା ଅପରାହ୍ନ ୨ଟା ୩୦ରେ ଓଡ଼ିଶା ଓ ଗୋଆ ମଧ୍ୟରେ ମ୍ୟାଚ୍ ଖେଳାଯିବ।