ଭୁବନେଶ୍ୱର,୨୩।୨: ଓଡ଼ିଶା ସରକାର ଶୁକ୍ରବାର କଲ୍ୟାଣୀ ଷ୍ଟିଲ ସହିତ ଏକ ବୁଝାମଣାପତ୍ର ସ୍ୱାକ୍ଷର କରିଛନ୍ତି। ଏହା ସହିତ ରାଜ୍ୟରେ ପୁଞ୍ଜି ବିନିଯୋଗ କ୍ଷେତ୍ରରେ ଆଉ ଏକ ସଫଳ ଅଧ୍ୟାୟ ଯୋଡ଼ି ହୋଇଛି। ଓଡିଶା ସରକାର ଏବଂ କଲ୍ୟାଣୀ ଷ୍ଟିଲ ମଧ୍ୟରେ ହୋଇଥିବା ଏମଓୟୁରେ ୨୬,୦୦୦ କୋଟି ଟଙ୍କା ବିନିଯୋଗ ହେବ। ଯାହା ଓଡିଶାରେ ୧୨,୦୦୦ ରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି କରିବାରେ ସହାୟକ ହେବ।
ଏହି ପ୍ରକଳ୍ପ ଅଟୋମୋବାଇଲ୍, ଏରୋସ୍ପେସ୍ ଏବଂ ପ୍ରତିରକ୍ଷା କ୍ଷେତ୍ରରେ ଓଡିଶାକୁ ଆଗକୁ ନେବ। କଲ୍ୟାଣୀ ଷ୍ଟିଲ୍ସ ଟାଇଟାନିୟମ୍ ଧାତୁ ଏବଂ ଏରୋସ୍ପେସ୍ ଉପକରଣ ତିଆରି କରିବ। ସେହିଭଳି କଲ୍ୟାଣୀ ଷ୍ଟିଲ ମଧ୍ୟ ଏକ ସମନ୍ୱିତ ଉନ୍ନତ ସ୍ପେସିଆଲିଟି ଷ୍ଟିଲ ଏବଂ ଅଟୋମୋବାଇଲ ଉତ୍ପାଦନ କମ୍ପ୍ଲେକ୍ସ ପ୍ରତିଷ୍ଠା କରିବ।
ସୂଚନାଯୋଗ୍ୟ ଯେ ଓଡିଶାର ଢେଙ୍କାନାଳ ଜିଲାର ଗଜାମରା ଅଞ୍ଚଳରେ ଏହି କମ୍ପ୍ଲେକ୍ସ ପ୍ରତିଷ୍ଠା କରାଯିବ। ଏହାପୂର୍ବରୁ ଫେବୃଆରୀ ୨୦ରେ ଓଡିଶା ସରକାର ଜେଏସଡବ୍ଲୁ ଗ୍ରୁପ୍ ସହିତ ଆଉ ଏକ ଏମଓୟୁ ସ୍ୱାକ୍ଷର କରି ରାଜ୍ୟରେ ପ୍ରଥମ ମେଗା ସ୍କେଲ ଇଣ୍ଟିଗ୍ରେଟେଡ୍ ଇଲେକ୍ଟ୍ରିକ୍ ଯାନ ଏବଂ ଇଭି ବ୍ୟାଟେରୀ ଉତ୍ପାଦନ ପ୍ରକଳ୍ପ ସ୍ଥାପନ କରିଥିଲେ।
ବୈଦ୍ୟୁତିକ ଯାନ (ଇଭି) କ୍ଷେତ୍ରରେ ଓଡିଶାର ସ୍ଥିତିକୁ ମଜବୁତ କରିବାକୁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପରେ ଜେଏସଡବ୍ଲୁ ଗ୍ରୁପ୍ ଏକ ଇଣ୍ଟିଗ୍ରେଟେଡ୍ ଇଲେକ୍ଟ୍ରିକ୍ ଯାନ ପ୍ରତିଷ୍ଠା ପାଇଁ ଓଡିଶା ସରକାରଙ୍କ ସହ ଏକ ବୁଝାମଣାପତ୍ର ସ୍ୱାକ୍ଷର କରିଛି।