ଭୁବନେଶ୍ୱର, ୧୩।୨(ବ୍ୟୁରୋ): ବିଭିନ୍ନ ଦାବି ନେଇ ଆସନ୍ତା ୧୪ତାରିଖରେ ଓଡ଼ିଶା ଗ୍ରାମ୍ୟ ବ୍ୟାଙ୍କ(ଓଜିବି) ଅଧିକାରୀମାନେ ଧର୍ମଘଟ କରିବେ। ଏନେଇ ଶନିବାର ଗୌରୀନଗର ଠାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଆସୋସିଏଶନ୍ ଅଫ୍ ଓଡିଶା ଗ୍ରାମ୍ୟ ବ୍ୟାଙ୍କ ଅଫିସର୍ସ(ଏଓଜିବିଓ) ପକ୍ଷରୁ ସୂଚନା ଦିଆଯାଇଛି।
ମିଳିଥିବା ସୂଚନା ଅନୁଯାୟୀ, ଦୀର୍ଘଦିନ ଧରି ଓଜିବି ମ୍ୟାନେଜମେଣ୍ଟ ଏବଂ ଏଓଜିବିଓ ମଧ୍ୟରେ ବିଭିନ୍ନ ଦାବି ନେଇ ଧାରଣା ଓ ଆଲୋଚନା ହୋଇଥିଲେ ମଧ୍ୟ ମ୍ୟାନେଜମେଣ୍ଟ ଆସୋସିଏଶନ୍ର ପ୍ରମୁଖ ଦାବି ପୂରଣ କରିପାରି ନାହିଁ। ଗତ ୩୦ତାରିଖରେ ଏଓଜିବିଓ ଏବଂ ବ୍ୟାଙ୍କ ମ୍ୟାନେଜମେଣ୍ଟ ମଧ୍ୟରେ ଆଲୋଚନା ହୋଇଥିଲା। ଉକ୍ତ ଆଲୋଚନାରେ ମ୍ୟାନେଜମେଣ୍ଟ କେତେକ ପ୍ରମୁଖ ଦାବି ପୂରଣ କରିବା ପାଇଁ କିଛି ଦିନ ସମୟ ମାଗିଥିଲା। ଫଳରେ ଆଲୋଚନାକ୍ରମେ ଆସୋସିଏଶନ୍ ୭ତାରିଖରେ ହେବାକୁ ଥିବା ଧର୍ମଘଟକୁ ୧୪ ତାରିଖକୁ ଘୁଞ୍ଚାଇଥିଲା। ତଥାପି ଓଜିବି ମ୍ୟାନେଜମେଣ୍ଟ କୌଣସି ଦାବି ପୂରଣ କରିବା ପାଇଁ ତତ୍ପରତା ଦେଖାଉ ନାହିଁ। ଏଣୁ ଆସୋସିଏଶନ୍ ୧୪ ତାରିଖରେ ଧର୍ମଘଟକୁ ଓହ୍ଲାଇବ ବୋଲି ସତର୍କ କରାଇଛି। ଏହି ଧର୍ମଘଟ ଫଳରେ ଓଡିଶା ଗ୍ରାମ ବ୍ୟାଙ୍କର ପ୍ରାୟ ସମସ୍ତ ଶାଖା ବନ୍ଦ ରହିବ ଏବଂ ୭୦ ଲକ୍ଷ ଗ୍ରାହକ ବ୍ୟାଙ୍କ ସେବାରୁ ନିବୃତ୍ତ ରହିବେ।