ଭୁବନେଶ୍ୱର, ୨୩।୧୨(କ୍ରୀଡ଼ା ପ୍ରତିନିଧି):ଡେରାଡୁନରେ ଚାଲିଥିବା ଉତ୍ତରାଖଣ୍ଡ ବିପକ୍ଷ ରଣଜୀ ଟ୍ରଫି କ୍ରିକେଟ ମ୍ୟାଚରେ ଓଡ଼ିଶା ପରାଜୟ ଆଶଙ୍କାରେ ପଡ଼ିଛି। ପ୍ରଥମ ଇନିଂସରେ ଓଡ଼ିଶା ୨୧୩ ରନ କରିଥିବାବେଳେ ଉତ୍ତରାଖଣ୍ଡ ୪୭୭ ରନକରି ୨୬୪ ରନରେ ଅଗ୍ରଣୀଲାଭ କରିଥିଲା। ଦ୍ୱିତୀୟ ଇନିଂସରେ ଓଡ଼ିଶା ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ଗୁରୁବାର ତୃତୀୟ ଦିବସ ଶେଷ ବେଳକୁ ୪ ଉଇକେଟ ହରାଇ ୯୭ ରନ କରିଛି। ଶାନ୍ତନୁ ମିଶ୍ର ଓ ନାଇଟ ଓ୍ବାଚମ୍ୟାନ ଶୁଭମ୍ ନାୟକ ଖାତା ଖୋଲିପାରି ନ ଥିବାବେଳେ ଅଧିନାୟକ ଶୁଭ୍ରାଂଶୁ ସେନାପତି ୧୩ ଓ ବିପ୍ଳବ ସାମନ୍ତରାୟ ୯ ରନ କରି ଆଉଟ ହୋଇଛନ୍ତି। ଓପନର ଅନୁରାଗ ଷଡ଼ଙ୍ଗୀ ୫୯ ଓ କାର୍ତ୍ତିକ ବିଶ୍ୱାଳ ୪ ରନକରି ଅପରାଜିତ ରହିଛନ୍ତି। ଉତ୍ତରାଖଣ୍ଡ ବୋଲର ମୟଙ୍କ ମିଶ୍ର ୨ଟି ଏବଂ ଦୀପକ ଧପୋଲା ଓ ଆକାଶ ମାଧ୍ୱାଲ ଗୋଟିଏ ଲେଖାଏ ଉଇକେଟ ନେଇଛନ୍ତି। ଶୁକ୍ରବାର ମ୍ୟାଚର ଶେଷ ଦିବସ ହୋଇଥିବାବେଳେ ଓଡ଼ିଶା ଆହୁରି ୧୬୭ ରନ ପଛରେ ରହିଛି।
ଜିଓ୍ବନଜୋତଙ୍କ ଦ୍ୱିଶତକ
ଦ୍ୱିତୀୟ ଦିବସର ଅସମାପ୍ତ ସ୍କୋର ୩୦୮/୩ରୁ ଖେଳ ଆରମ୍ଭ କରିଥିବା ଉତ୍ତରାଖଣ୍ଡ ତୃତୀୟ ଦିବସରେ ଆଉ ୧୬୯ ରନ ଯୋଗକରି ଅବଶିଷ୍ଟ ୭ଟି ଉଇକେଟ ହରାଇଥିଲା। ଅଧିନାୟକ ସ୍ବପ୍ନିଲ ସିଂ ଦ୍ୱିଶତକ ହାସଲ କରି ଉତ୍ତରାଖଣ୍ଡକୁ ମଜଭୁତ ସ୍ଥିତିରେ ପହଞ୍ଚାଇ ଦେଇଥିଲେ। ସେ ୩୬୩ଟି ବଲ୍ର ସମ୍ମୁଖୀନ ହୋଇ ୩୫ ଚୌକା ସହାୟତାରେ ୨୧୮ ରନ ସ୍କୋର କରିଥିଲେ। ସ୍ବପ୍ନିଲ ସିଂ ୬୫ ଓ ଆଦିତ୍ୟ ତାରେ ୫୭ ରନର ଯୋଗଦାନ ଦେଇଥିଲେ। ଓଡ଼ିଶା ବୋଲରଙ୍କ ମଧ୍ୟରେ ସୂର୍ଯ୍ୟକାନ୍ତ ପ୍ରଧାନ ସର୍ବାଧିକ ୩ଟି, ଶୁଭମ୍ ନାୟକ ଓ ଅଭିଷେକ ରାଉତ ୨ଟି ଲେଖାଏ ଏବଂ ବିପ୍ଳବ ସାମନ୍ତରାୟ ଓ ସୌରଭ କନୋଜିଆ ଗୋଟିଏ ଲେଖାଏ ଉଇକେଟ ପାଇଥିଲେ।
ସଂକ୍ଷିପ୍ତ ସ୍କୋର
ଓଡ଼ିଶା ପ୍ରଥମ ଇନିଂସ: ୨୧୩। ଉତ୍ତରାଖଣ୍ଡ ପ୍ରଥମ ଇନିଂସ: ୪୭୭/ଅଲ୍ଆଉଟ (ଜିଓ୍ବନଜୋତ ସିଂ-୨୧୮, ସ୍ବପ୍ନିଲ ସିଂ-୬୫, ଆଦିତ୍ୟ ତାରେ-୫୭, ସୂର୍ଯ୍ୟକାନ୍ତ ପ୍ରଧାନ -୩/୯୦, ଶୁଭମ୍ ନାୟକ-୨/୭୯, ଅଭିଷେକ ରାଉତ-୨/୩୩, ବିପ୍ଳବ ସାମନ୍ତରାୟ-୧/୫୨, ସୌରଭ କନୋଜିଆ-୧୨୧)। ଓଡ଼ିଶା ଦ୍ୱିତୀୟ ଇନିଂସ: ୯୭/୪ (ଅନୁରାଗ ଷଡ଼ଙ୍ଗୀ-୫୯*, ମୟଙ୍କ ମିଶ୍ର-୨/୨୯, ଦୀପକ ଧପୋଲା-୧/୮, ଆକାଶ ମାଧ୍ୱାଲ-୧/୨୧)।