ଭୁବନେଶ୍ୱର, ୨୬।୯(ତପନ ସ୍ବାଇଁ): ଏଠାରେ ଚାଲିଥିବା ଜାତୀୟ ଜୁନିୟର ବାଳିକା ଫୁଟବଲ ଚାମ୍ପିୟନଶିପ୍ରେ ଚମତ୍କାର ପ୍ରଦର୍ଶନ କରି ଓଡ଼ିଶା ସେମିଫାଇନାଲରେ ପ୍ରବେଶ କରିଛି। ସେମିଫାଇନାଲରେ ଓଡ଼ିଶା ଆସନ୍ତା ୨୮ ତାରିଖରେ କ୍ୟାପିଟାଲ ଆରେନାରେ ମଣିପୁରକୁ ଭେଟିବ। ସେହିଦିନ ତାମିଲନାଡ଼ୁ ଓ ଝାଡ଼ଖଣ୍ଡ ମଧ୍ୟରେ ଅନ୍ୟ ସେମିଫାଇନାଲ ମୁକାବିଲା ହେବ। ତାମିଲନାଡ଼ୁ-ଝାଡ଼ଖଣ୍ଡ ମ୍ୟାଚ ପୂର୍ବାହ୍ନ ୯ଟା ଏବଂ ଓଡ଼ିଶା-ମଣିପୁର ମ୍ୟାଚ ଅପରାହ୍ନ ୨ଟା ୩୦ରେ ଅନୁଷ୍ଠିତ ହେବ।
ସୋମବାର କ୍ୟାପିଟାଲ ଫୁଟବଲ ଆରେନାରେ ଅନୁଷ୍ଠିତ ଏକ ମ୍ୟାଚରେ ଓଡ଼ିଶା ୧-୦ ଗୋଲରେ ଗୁଜରାଟକୁ ପରାସ୍ତ କରିଥିଲା। ତୀବ୍ର ସଂଘର୍ଷପୂର୍ଣ୍ଣ ଏହି ମ୍ୟାଚରେ ବିଜୟୀ ଦଳ ପକ୍ଷରୁ ପ୍ରୀୟା ଓରାମ ୮୫ତମ ମିନିଟରେ ଦେଇଥିବା ଗୋଲଟି ନିର୍ଣ୍ଣାୟକ ହୋଇଥିଲା। ଏହି ପଡ଼ିଆରେ ଅନୁଷ୍ଠିତ ଅନ୍ୟ ଏକ ମ୍ୟାଚରେ ମଣିପୁର ୧-୦ ଗୋଲରେ ହରିୟାଣାକୁ ପରାସ୍ତ କରିଥିଲା। ମଣିପୁର ପକ୍ଷରୁ ନିଙ୍ଗଥୋଉଜାମ ଓଲିଭିଆ ଚାନୁ ୫୫ତମ ମିନିଟରେ ବିଜୟ ସୂଚକ ଗୋଲଟି ଦେଇଥିଲେ।
୭ମ ବାଟାଲିୟନରେ ଥିବା ଓଡ଼ିଶା ଫୁଟବଲ ଏକାଡେମୀ ପଡ଼ିଆରେ ଅନୁଷ୍ଠିତ ମ୍ୟାଚରେ ଦିଲ୍ଲୀ ୬-୦ ଗୋଲରେ ମହାରାଷ୍ଟ୍ରକୁ ପରାସ୍ତ କରିଥିଲା। ଦିଲ୍ଲୀ ପକ୍ଷରୁ ଦୀପିକା ପାଲ୍ ୨୪ ଓ ୮୪ତମ ମିନିଟରେ ୨ଟି ଏବଂ ଭାନି କାଲୁଚା ୮ମ, ଭୂମି ଶର୍ମା ୪୦, ତାରିଣୀ ସିବଲ ୪୫+୩ ଓ ତାନ୍ୟା ସିଂ ୭୩ତମ ମିନିଟରେ ଗୋଟିଏ ଲେଖାଏ ଗୋଲ ଦେଇଥିଲେ। ଏହି ଗ୍ରାଉଣ୍ଡରେ କେରଳ ଓ ଅରୁଣାଚଳ ପ୍ରଦେଶ ମଧ୍ୟରେ ଅନୁଷ୍ଠିତ ମ୍ୟାଚଟି ୪-୪ ଗୋଲରେ ଡ୍ର ରହିଥିଲା। ଅରୁଣାଚଳ ପକ୍ଷରୁ ଗୁନାଇଲୁ ତସିକ ୬୨ ଓ ୭୫ତମ ମିନିଟରେ ୨ଟି ଏବଂ ୟୁମଲାମ ଲାଲି ପେନାଲ୍ଟିରୁ ୩ୟ ଓ ନବମ ରିନା ୫୦ତମ ମିନିଟରେ ଗୋଟିଏ ଲେଖାଏ ଗୋଲ ଦେଇଥିଲେ। କେରଳର ଭାଗ୍ୟା ବିନୋଦ ୭୭, ୮୬ ଓ ୮୯ତମ ମିନିଟରେ ୩ଟି ଗୋଲ ଦେଇ ହ୍ୟାଟ୍ରିକ ଅର୍ଜନ କରିଥିଲେ। ଅଖିଳ ବି.ଏଲ. ୭୨ତମ ମିନିଟରେ ଅନ୍ୟ ଗୋଲଟି ଦେଇଥିଲେ।