ଭୁବନେଶ୍ୱର,୧୦ା୧୨(ବ୍ୟୁରୋ):ଅର୍ବାନ ଗଭର୍ନାନ୍ସ ଇଣ୍ଡେକ୍ସ (ସହରାଞ୍ଚଳ ଶାସନ ସୂଚକାଙ୍କ)-୨୦୨୦ରେ ଓଡ଼ିଶା ଶ୍ରେଷ୍ଠ ରାଜ୍ୟ ବିବେଚିତ ହୋଇଛି। ଦେଶର ପ୍ରମୁଖ ରାଜ୍ୟଗୁଡ଼ିକୁ ପଛରେ ପକାଇ ଓଡ଼ିଶା ଏକ ନମ୍ବର ସ୍ଥାନ ହାସଲ କରିଛି। ସ୍ବେଚ୍ଛାସେବୀ ସଙ୍ଗଠନ ପ୍ରଜା ଫାଉଣ୍ଡେଶନ ପକ୍ଷରୁ ଦିଲ୍ଲୀ ସମେତ ୨୮ ରାଜ୍ୟର ୪୦ ସହରକୁ ନେଇ ୩ବର୍ଷ ଧରି ସର୍ଭେ କରାଯାଇଥିଲା। ସହର ପ୍ରଶାସନର ସଶକ୍ତୀକରଣ, ନାଗରିକ ସଶକ୍ତୀକରଣ ଓ ଆର୍ଥିକ ସଶକ୍ତୀକରଣ ଭଳି ବିଭିନ୍ନ ପ୍ରସଙ୍ଗକୁ ଆଧାରକରି ରାଜ୍ୟଗୁଡିକର ର଼୍ୟାଙ୍କିଙ୍ଗ୍ ପ୍ରକାଶ ପାଇଛି। ସଶକ୍ତ ସହରାଞ୍ଚଳ ଶାସନ ବ୍ୟବସ୍ଥାରେ ଏସବୁ ମାପକାଠିଗୁଡ଼ିକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛି। ଏହାସହ ଆଞ୍ଚଳିକ ଅର୍ବାନ ପ୍ଲାନିଂ, ସଡ଼କ ଓ ରାସ୍ତାଘାଟ, ଲ୍ୟାଣ୍ଡ୍ ରେଗୁଲେଶନ, ଅର୍ଥନୈତିକ ଓ ସାମାଜିକ ଅଭିବୃଦ୍ଧି, ପାନୀୟ ଜଳ ବ୍ୟବସ୍ଥା, ଅଗ୍ନିଶମ ବ୍ୟବସ୍ଥା, ସହରାଞ୍ଚଳ ବନୀକରଣ ଭଳି ବିଭିନ୍ନ ପାରାମିଟର ମଧ୍ୟ ଏହି ସର୍ଭେରେ ଅନ୍ତର୍ଭୁକ୍ତ ରହିଥିଲା। ଓଡ଼ିଶା ୧୦୦ ନମ୍ବରରୁ ୫୬.୮୬ ସ୍କୋର୍ ପାଇ ପ୍ରଥମ ସ୍ଥାନରେ ରହିଛି। ୫୫.୧୫ ସ୍କୋର୍ ସହ ମହାରାଷ୍ଟ୍ର ଦ୍ୱିତୀୟ ଓ ୫୫.୧୫ ସହ ଛତିଶଗଡ଼ ତୃତୀୟ ସ୍ଥାନରେ ରହିଛି। ସେହିପରି କେରଳ ୪ର୍ଥ, ମଧ୍ୟପ୍ରଦେଶ ୫ମ, ତାମିଲନାଡୁ ୬ଷ୍ଠ ଓ ଗୁଜରାଟ ୭ମ ସ୍ଥାନରେ ରହିଛି। ଝାଡ଼ଖଣ୍ଡ, ଅରୁଣାଚଳ ପ୍ରଦେଶ, ମେଘାଳୟ, ମଣିପୁର ଓ ନାଗାଲାଣ୍ଡ ଏହି ସର୍ଭେରେ ୨୦ରୁ କମ୍ ସ୍କୋର କରି ତାଲିକାର ଶେଷରେ ରହିଛନ୍ତି। ସାମଗ୍ରିକଭାବେ ଦେଖିଲେ କୌଣସି ରାଜ୍ୟ ୫୭ରୁ ଅଧିକ ସ୍କୋର୍ କରିନାହାନ୍ତି। ତେଣୁ ସହରୀ ଶାସନରେ ଅଧିକ ସଂସ୍କାର ଓ ସଶକ୍ତୀକରଣର ଆବଶ୍ୟକତା ରହିଥିବା ପ୍ରଜା ଫାଉଣ୍ଡେଶନ ପକ୍ଷରୁ କୁହାଯାଇଛି।
ଅନ୍ୟପକ୍ଷରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ରାଜ୍ୟରେ ସହରାଞ୍ଚଳ ଶାସନ ବ୍ୟବସ୍ଥାରେ ବିଶେଷ ପରିବର୍ତ୍ତନ ଅଣାଯାଇଥିବା କୁହାଯାଇଛି। ରାଜ୍ୟ ସରକାରଙ୍କ ଦୂରଦୃଷ୍ଟି ସମ୍ପନ୍ନ ଯୋଜନା, ‘୫-ଟି’ ଏବଂ ‘ମୋ ସରକାର’ ଭଳି କାର୍ଯ୍ୟକ୍ରମ ଏହି ପରିବର୍ତ୍ତନ ଆଣିବାରେ ସହାୟକ ହୋଇପାରିଛି। ସେହିଭଳି ପୌରାଞ୍ଚଳ ଆଇନରେ ସଂଶୋଧନ ଦ୍ୱାରା ଲୋକଙ୍କ ଘରେ ସରକାରୀ ସେବା ପହଞ୍ଚତ୍ପାରିଛି। ବିଭିନ୍ନ କାର୍ଯ୍ୟକ୍ରମରେ ଜନସାଧାରଣଙ୍କ ମତାମତ ସଂଗ୍ରହ କରିବା ଦ୍ୱାରା ଶାସନ ବ୍ୟବସ୍ଥାରେ ସ୍ବଚ୍ଛତା ଆସିଥିବା ରାଜ୍ୟ ସରକାର କହିଛନ୍ତି। ଆଗାମୀ ଦିନରେ ଓଡ଼ିଶା ସ୍ବଚ୍ଛ ସହରାଞ୍ଚଳ କାର୍ଯ୍ୟକ୍ରମ, ବସ୍ତି ଉନ୍ନୟନ, ବର୍ଜ୍ୟ ପରିଚାଳନା, ଜୀବନଜୀବିକାର ବିକାଶ, ଇ-ଗଭର୍ନାନ୍ସ ଭଳି ବିଭିନ୍ନ ବିକାଶମୁଖୀ କାର୍ଯ୍ୟକ୍ରମ ଦ୍ୱାରା ଏହି ପରିବର୍ତ୍ତନର ଧାରାକୁ ବଜାୟ ରଖିବ ବୋଲି ଆଶା କରାଯାଉଛି। ଏହି ସଫଳତା ପାଇଁ ଗୃହ ଓ ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା ମୁଖ୍ୟମନ୍ତ୍ରୀ ଓ ବିଭାଗୀୟ ଟିମ୍କୁ ଶୁଭେଚ୍ଛା ଜଣାଇଛନ୍ତି।