ଭୁବନେଶ୍ୱର, ୨୬ା୧୧(ବ୍ୟୁରୋ):ଶିଶୁଙ୍କୁ ସମ୍ପୂର୍ଣ୍ଣ ଟିକାକରଣରେ ଓଡ଼ିଶା ଆଗରେ ରହିଛି। ଏ କ୍ଷେତ୍ରରେ ଓଡ଼ିଶାର ହାର ଦେଶରେ ସର୍ବାଧିକ ରହିଥିବାବେଳେ ଜାତୀୟ ହାରଠାରୁ ମଧ୍ୟ ଅଧିକ। ଦେଶରେ ୧୨ରୁ ୨୩ମାସ ବୟସ୍କ ଶିଶୁଙ୍କୁ ସମ୍ପୂର୍ଣ୍ଣ ଟିକାକରଣ ହାର ୭୬% ଥିବାବେଳେ ଓଡ଼ିଶାରେ ୯୦.୫% ରହିଛି। ଗତ ପାଞ୍ଚବର୍ଷ ତଳେ ଦେଶରେ ଏହି ହାର ୬୨% ଥିବାବେଳେ ଏବେ ୭୬%କୁ ବୃଦ୍ଧି ପାଇଛି। ସେହିଭଳି ଅନ୍ୟ ଶ୍ରେଷ୍ଠ ରାଜ୍ୟଗୁଡ଼ିକ ମଧ୍ୟରେ ହେଉଛି ହିମାଚଳ ପ୍ରଦେଶ (୮୯.୩ ପ୍ରତିଶତ), ତାମିଲନାଡ଼ୁ (୮୯.୨ ପ୍ରତିଶତ), ପଶ୍ଚିମବଙ୍ଗ (୮୭.୮ ପ୍ରତିଶତ), କର୍ନାଟକ (୮୪.୧ ପ୍ରତିଶତ) ଏବଂ ଗୋଆ (୮୧.୯ ପ୍ରତିଶତ) ରହିଥିବା ଜାତୀୟ ପରିବାର ସ୍ବାସ୍ଥ୍ୟ ସର୍ବେକ୍ଷଣ (ଏନ୍ଏଚ୍ଏଫ୍ଏସ୍-୫)ରୁ ଜଣାପଡ଼ିଛି।
ସମ୍ପୂର୍ଣ୍ଣ ଟିକାକରଣ ଅର୍ଥ ହେଉଛି, ଶିଶୁମାନେ ସରକାରଙ୍କ ପକ୍ଷରୁ ଦିଆଯାଉଥିବା ଟିକାକୁ ଧାର୍ଯ୍ୟ ସମୟରେ ସମ୍ପୂର୍ଣ୍ଣ କରିବା। ଓଡ଼ିଶାରେ ଜଣେ ପିଲା ସରକାରୀ ସୁବିଧାରେ ୧୨ଟି ଟିକା ନେଇଥାନ୍ତି।
ଉକ୍ତ ସର୍ବେକ୍ଷଣ ରିପୋର୍ଟ ଅନୁସାରେ, ୨୦୧୫-୧୬ରେ ଓଡ଼ିଶାରେ ସମ୍ପୂର୍ଣ୍ଣ ଟିକାକରଣ ଶିଶୁଙ୍କ ସଂଖ୍ୟା ୭୮.୬ ପ୍ରତିଶତ ଥିଲା, ଯାହାକି ସଦ୍ୟତମ ଜାତୀୟ ଆକଳନ ତୁଳନାରେ ଭଲ ଅଟେ। ସେହିଭଳି ଓଡ଼ିଶାରେ ୧୨-୨୩ ମାସ ବୟସର ୯୮.୧ ପ୍ରତିଶତ ପିଲା ଅଧିକାଂଶ ଟିକା ଜନସ୍ବାସ୍ଥ୍ୟ କେନ୍ଦ୍ରରେ ଗ୍ରହଣ କରିଛନ୍ତି। ୯୯.୧ ପ୍ରତିଶତ ପିଲା ଗ୍ରାମାଞ୍ଚଳର ହୋଇଥିବାବେଳେ ୯୧.୮ ପ୍ରତିଶତ ସହରାଞ୍ଚଳରେ ଅଛନ୍ତି। ସହରାଞ୍ଚଳର ୧.୪ ପ୍ରତିଶତ ପିଲା, ଯେଉଁମାନେ କି ଘରୋଇ ସୁବିଧାଗୁଡ଼ିକରେ ସେମାନଙ୍କର ଟିକା ନେଇଛନ୍ତି। ୯୭.୩ ପ୍ରତିଶତ ପିଲା ବିସିଜି ଟିକା ଗ୍ରହଣ କରିଥିବାବେଳେ ୯୪.୪ ପ୍ରତିଶତ ପିଲାଙ୍କର ତିନୋଟି ଡୋଜ୍ ପେଣ୍ଟା କିମ୍ବା ହେପାଟାଇଟିସ୍-ବି ଟିକା ନେଇଛନ୍ତି।