ନୂଆଦିଲ୍ଲୀ,୨୧।୮: କେନ୍ଦ୍ର ସରକାରଙ୍କ ପକ୍ଷରୁ ଆରମ୍ଭ କରାଯାଇଥିବା ଜରୁରିକାଳୀନ ପୁଞ୍ଜି ଯୋଗାଣ ଯୋଜନା ଏମର୍ଜେନ୍ସି କ୍ରେଡିଟ ଲାଇନ ଗ୍ୟାରେଣ୍ଟି ସ୍କିମ୍(ଇସିଏଲ୍ଜିଏସ୍)ରେ ଓଡ଼ିଶାର ଅଣୁ କ୍ଷୁଦ୍ର ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ)ଗୁଡିକୁ ୧୬୧୭.୬୦ କୋଟି ଟଙ୍କାର ଋଣ ଯୋଗାଇ ଦିଆଯାଇଛି। ଏଠାରେ ୧.୫୧ ଲକ୍ଷ ଆକାଉଣ୍ଟକୁ ଋଣ ପ୍ରଦାନ କରାଯିବା ଲାଗି ମଞ୍ଜୁର ହୋଇଛି। ଏହି ଆକାଉଣ୍ଟଗୁଡିକ ମଧ୍ୟରୁ ୭୭,୦୮୩ ଆକାଉଣ୍ଟକୁ ଋଣ ପ୍ରଦାନ କରାଯାଇଛି।
ଏହି ଯୋଜନାରେ ସାରା ଦେଶରେ ଏମ୍ଏସ୍ଏମ୍ଇଗୁଡିକୁ ୧ ଲକ୍ଷ କୋଟି ଟଙ୍କାରୁ ଊର୍ଦ୍ଧ୍ୱ ଅର୍ଥ ଯୋଗାଇ ଦିଆଯାଇଛି। ଉଭୟ ରାଷ୍ଟ୍ରାୟତ୍ତ ଏବଂ ଘରୋଇ ବ୍ୟାଙ୍କଗୁଡିକ ୧.୫ ଲକ୍ଷ କୋଟି ଟଙ୍କାର ଅର୍ଥ କ୍ଷୁଦ୍ର ଶିଳ୍ପଗୁ ମଞ୍ଜୁରୀ ଦେଇଥିବା ଅର୍ଥ ମନ୍ତ୍ରଣାଳୟ ପକ୍ଷରୁ ସୂଚନା ରହିଛି। ଏହି ଅର୍ଥ ମଧ୍ୟରୁ ପ୍ରାୟ ୧ ଲକ୍ଷ କୋଟି ଟଙ୍କା ପ୍ରଦାନ କରାଯାଇଛି। ଆତ୍ମନିର୍ଭର ପ୍ୟାକେଜ ଅଧୀନରେ ଏହି ଯୋଜନାକୁ ସରକାର ଘୋଷଣା କରିଥିଲେ। ମହାମାରୀ ଯୋଗୁ କ୍ଷତିଗ୍ରସ୍ତ ହୋଇଥିବା ଏମ୍ଏସ୍ଏମ୍ଇଗୁଡିକୁ ସହାୟତା ଯୋଗାଣ ଲକ୍ଷ୍ୟରେ ଏଭଳି ଯୋଜନା ଆସିଥିଲା।
ରାଷ୍ଟ୍ରାୟତ୍ତ ବ୍ୟାଙ୍କଗୁଡିକ ଇସିଏଲ୍ଜିଏସ୍ରେ ୭୬,୦୦୪.୪୪ କୋଟି ଟଙ୍କା ମଞ୍ଜୁର କରିଥିବା ବେଳେ ୫୬,୪୮୩ ଟଙ୍କାର ଋଣ ବଣ୍ଟନ କରିଛନ୍ତି। ସେହିଭଳି ଘରୋଇ ବ୍ୟାଙ୍କଗୁଡିକ ୭୪,୭୧୫.୦୨ କୋଟି ଟଙ୍କାର ଋଣ ମଞ୍ଜୁର କରିଛନ୍ତି। ଏହି ବ୍ୟାଙ୍କଗୁଡିକ ୪୫,୭୬୨.୩୬ କୋଟି ଟଙ୍କା ଋଣ ଯୋଗାଇ ଦେଇଛନ୍ତି। ଏହି ଯୋଜନାରେ ଅଧୀନରେ ଋଣ ପ୍ରଦାନ କରିଥିବା ବ୍ୟାଙ୍କଗୁଡିକ ମଧ୍ୟରେ ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ(ଏସ୍ବିଆଇ), ପଞ୍ଜାବ ନ୍ୟାଶନାଲ ବ୍ୟାଙ୍କ (ପିଏନ୍ବି), ବ୍ୟାଙ୍କ ଅଫ୍ ଇଣ୍ଡିଆ, ୟୁନିୟନ ବ୍ୟାଙ୍କ ଏବଂ ଏଚ୍ଡିଏଫ୍ସି ବ୍ୟାଙ୍କ ଆଗରେ ରହିଛନ୍ତି।