ଭୁବନେଶ୍ୱର, ୧୮ା୨(କ୍ରୀଡ଼ା ପ୍ରତିନିଧି): ଜମ୍ମୁଠାରେ ଖେଲୋ ଇଣ୍ଡିଆ ‘ଏକ୍ ଭାରତ ଶ୍ରେଷ୍ଠ ଭାରତ’ ଜାତୀୟ ସିନିୟର ବାଳିକା ରୋଲବଲ୍ ଚାମ୍ପିୟନଶିପ୍ ଚଳିତ ମାସ ୧୪ରୁ ୧୬ ପର୍ଯ୍ୟନ୍ତ ଅନୁଷ୍ଠିତ ହୋଇଯାଇଛି। ଏଥିରେ ଓଡ଼ିଶା-ମହାରାଷ୍ଟ୍ର ମିଳିତ ଦଳ ୫-୨ ଗୋଲରେ ମଧ୍ୟପ୍ରଦେଶ-ନାଗାଲାଣ୍ଡ ଦଳକୁ ହରାଇ ପ୍ରଥମ ରନରଅପ୍ ହୋଇଛନ୍ତି। ଫାଇନାଲରେ ରାଜସ୍ଥାନ-ଆସାମ ଦଳ ୪-୧ ଗୋଲରେ ତାମିଲନାଡ଼ୁ-ଜମ୍ମୁ କଶ୍ମୀର ଦଳକୁ ହରାଇ ଚାମ୍ପିୟନ ହୋଇଛି। ଓଡ଼ିଶା ସିନିୟର ବାଳିକାଙ୍କ ପାଇଁ ଏହାଥିଲା ଏକ ସ୍ମରଣୀୟ ଦିନ। କାରଣ ରୋଲବଲ୍ରେ ଓଡ଼ିଶା ବାଳିକା ଦଳ ପ୍ରଥମ ପଦାର୍ପଣରେ ହିଁ ଏହି ସଫଳତା ପାଇଛନ୍ତି। ଦଳର ମନୋବଳ ବୃଦ୍ଧି ପାଇଛି। ଆଗାମୀ ଦିନରେ ଆହୁରି ଗୌରବ ଆଣିବାକୁ ଆମେ ଚେଷ୍ଟା କରିବୁ ବୋଲି ଓଡ଼ିଶା ଦଳର ଗୋଲକିପର ଶ୍ରୀଜାଶ୍ରୀ ପ୍ରକାଶ କରିଛନ୍ତି। ପ୍ରତିଯୋଗିତାରେ ଶ୍ରୀଜାଙ୍କ ବ୍ୟତୀତ ପଲ୍ଲବୀ ସାହୁ ଓ ନଦିରା ସାହାବ ଓଡ଼ିଶା ପକ୍ଷରୁ ପ୍ରତିନିଧିତ୍ୱ କରିଥିଲେ। ଜମ୍ମୁ ସ୍ପୋଟର୍ସ କାଉନ୍ସିଲ ପକ୍ଷରୁ ସୁଧିର ଏବଂ ରୋଲବଲ୍ ଫେଡେରେଶନ ଅଫ୍ ଇଣ୍ଡିଆ ସମ୍ପାଦକ ଚେତନ ଚାମ୍ପିୟନ ଟ୍ରଫି ପ୍ରଦାନ କରିଥିଲେ। ଜମ୍ମୁ ରୋଲ ବଲ୍ ଆସୋସିଏଶନ ସମ୍ପାଦକ ମଧୁ ଶର୍ମା ଓ ଓଡ଼ିଶା ରୋଲ ଆସୋସିଏଶନ ପ୍ରତିଷ୍ଠାତା ପାର୍ଥ ସାରଥି ଜେନା ପ୍ରମୁଖ ଉପସ୍ଥିତ ଥିଲେ।