ଭୁବନେଶ୍ୱର,୧୬।୮: ବଲିଉଡ୍ ଅଭିନେତା ସୋନୁ ସୁଡଙ୍କ ନାମରେ ଓଡ଼ିଆ ଯୁବକ ଖୋଲିଲେ ଓ୍ବେଲ୍ଡିଂ ଦୋକାନ। ଶନିବାର ଦୋକାନ ସମ୍ମୁଖରେ ସ୍ବାଧୀନତା ଦିବସ ପାଳନ ଅବସରରେ ସେ ଏକ ଭିଡିଓ ପୋଷ୍ଟ କରିଥିଲେ। ଏହାକୁ ଅଭିନେତାଜଣଙ୍କ ରିଟୁଇଟ୍ କରିବା ସହ ଓଡ଼ିଶାରେ ଥିବା ମୋ ଓ୍ବେଲ୍ଡିଂ ଓ୍ବାର୍କସପ୍ରୁ ଆପଣଙ୍କୁ ସ୍ବାଧୀନତା ଦିବସର ଅଭିନନ୍ଦନ ବୋଲି ଲେଖିଛନ୍ତି। ଏହି ଭିଡିଓକୁ ୧୩ହଜାରରୁ ଅଧିକ ଲୋକ ପସନ୍ଦ କରିଥିବା ବେଳେ ୭ହଜାରରୁ ଅଧିକ ଲୋକ ରିଟୁଇଟ୍ କରିଛନ୍ତି।
ମହାମାରୀ କରୋନା ସମୟରେ ଲକ୍ଡାଉନ୍ ହେତୁ କେରଳରେ ଫସି ରହିଥିଲେ ୧୬୯ଜଣ ଓଡ଼ିଆ ପ୍ରବାସୀ। ସେମାନଙ୍କୁ ଓଡ଼ିଶା ଫେରାଇ ଆଣିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ ସୋନୁ। ମେ’ ୨୯ରେ ଓଡ଼ିଶା ଫେରିଥିବା ଉକ୍ତ ପ୍ରବାସୀଙ୍କ ମଧ୍ୟରେ ରହିଥିଲେ କେନ୍ଦ୍ରାପଡ଼ା ରାଜନଗର ବ୍ଲକ ଚିଞ୍ଚିରି ଗ୍ରାମର ପ୍ରଶାନ୍ତ କୁମାର ପ୍ରଧାନ। ସେ କୋଚି ବିମାନବନ୍ଦର ନିକଟରେ ଥିବା ଏକ କମ୍ପାନୀରେ ପ୍ଲମ୍ବର(ପାଇପ୍ ମିସ୍ତ୍ରୀ) ଭାବେ କାମ କରୁଥିଲେ। ଦିନକୁ ତାଙ୍କୁ ୭୦୦ ଟଙ୍କା ମିଳୁଥିଲା। ହେଲେ ଲକ୍ଡାଉନ୍ ପରେ ତାଙ୍କ ଚାକିରି ଚାଲିଯାଇଥିଲା। ତାଙ୍କ ପାଖରେ ଥିବା ଟଙ୍କା ସରି ସରି ଆସିଥିଲା। ସେ ଶ୍ରମିକ ସ୍ପେଶାଲ ଟ୍ରେନ୍ରେ ଫେରିବା ପାଇଁ ଟିକେଟ କରିବାକୁ ଚେଷ୍ଟା କରିଥିଲେ। ମାତ୍ର ତାହା ହୋଇପାରି ନ ଥିଲା। ଚାରିଆଡ଼ୁ ନିରାଶ ହେବା ପରେ ତାଙ୍କୁ ସହାୟତାର ହାତ ବଢ଼ାଇଥିଲେ ସୋନୁ। ସ୍ବତନ୍ତ୍ର ବିମାନ ଯୋଗେ ସୋନୁ ପ୍ରବାସୀଙ୍କ ଫେରିବାର ବ୍ୟବସ୍ଥା କରିଥିଲେ।
ଘରକୁ ଫେରିବା ପରେ ପ୍ରଶାନ୍ତ ଚାକିରି ଅନ୍ବେଷଣ କରିଥିଲେ। ହେଲେ କିଛିଦିନ ପରେ ସେ ନିଜର ଦୋକାନ ଖୋଲିବାକୁ ନିଷ୍ପତ୍ତି ନେଇଥିଲେ। ଭୁବନେଶ୍ୱରଠାରୁ ୧୪୦ କିମି ଦୂର ହାତିନାଠାରେ ସେ ଏବେ ଏକ ଓ୍ବେଲ୍ଡିଂ ଓ୍ବାର୍କସପ୍ ଖୋଲିଛନ୍ତି। ଦୋକାନର ନାଁ ସୋନୁଙ୍କ ନାମରେ ରଖିବାକୁ ସେ ଅନୁମତି ମାଗିଥିଲେ। ସୋନୁ ରାଜି ହେବା ପରେ ପ୍ରଶାନ୍ତ ସୋନୁଙ୍କ ଫଟୋ ସହ ନାମରେ ଦୋକାନ ଖୋଲିଛନ୍ତି। କେବଳ ଏତିକି ନୁହେଁ ପ୍ରଶାନ୍ତଙ୍କୁ ନୂଆ କାମ ପାଇଁ ସେ ଶୁଭେଚ୍ଛା ଜଣାଇଛନ୍ତି। ସେ ଓଡ଼ିଶା ଆସିଲେ ନିଶ୍ଚୟ ପ୍ରଶାନ୍ତଙ୍କ ଦୋକାନକୁ ଯିବେ। ଏପରିକି ନିଜେ ମଧ୍ୟ ଓ୍ବେଲ୍ଡିଂ କରିବେ ବୋଲି କହିଛନ୍ତି।
