ମାଲକାନଗିରି,୨୨ା୧୧(ଡି.ଏନ୍.ଏ): ମାଲକାନଗିରି ଜିଲା ସଦର ମହକୁମା ମୁଣ୍ଡାଗୁଡାସ୍ଥିତ କୃଷି ବିଜ୍ଞାନ କେନ୍ଦ୍ର ସମ୍ମିଳନୀ କକ୍ଷରେ ସୋମବାର ବିଶ୍ୱ ମତ୍ସ୍ୟ ଦିବସ ଜିଲା ମତ୍ସ୍ୟ ଅଧିକାରୀ ନରସିଂହ ମୁଣ୍ଡ୍ଙ୍କ ଅଧ୍ୟକ୍ଷତାରେ ଅନୁ୍ଷ୍ଠିତ ହୋଇଯାଇଛି। ଏଥିରେ ଲିଡ ବ୍ୟାଙ୍କ ଜିଲା ପରିଚାଳକ ନରସିଂହ ପାଢୀ, ନାବାର୍ଡ ଜିଲା ଉନ୍ନୟନ ଅଧିକାରୀ ଧର୍ମେନ୍ଦ୍ର ବେଉରିଆ, କୃଷି ବିଜ୍ଞାନକେନ୍ଦ୍ରର ବରିଷ୍ଠ ବୈଜ୍ଞାନିକ ନିଗମାନନ୍ଦ ବେହେରା, ବୈଜ୍ଞାନିକ ଆଶିଷ ମହାପାତ୍ର, ଜିଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀ ଡ. ୟୁ.ଏସ୍.ପି. ଶତପଥୀ, ସହକାରୀ ମତ୍ସ୍ୟ ଅଧିକାରୀ ପ୍ରଶାନ୍ତ ଗୌଡ, ପରିବେଶବିତ୍ ଦୁର୍ଯ୍ୟୋଧନ ପାତ୍ରଙ୍କ ସହ ୫୦ରୁ ଊର୍ଦ୍ଧ୍ୱ ମତ୍ସ୍ୟ ଚାଷୀ ଉପସ୍ଥିତ ଥିଲେ। ଆଜିର ଦିବସ ମତ୍ସ୍ୟ ଚାଷୀଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ଦିବସ । ଆମ ରାଜ୍ୟରେ ମାଛର ଚାହିଦା ଦିନକୁ ଦିନ ବୃଦ୍ଧି ପାଉଛି। ପୃଥିବୀରେ ଚୀନ୍ ମାଛ ଚାଷରେ ପ୍ରଥମ ସ୍ଥାନ ଅଧିକାର କରିଥିବା ବେଳେ ଭାରତ ଦ୍ୱିତୀୟ ସ୍ଥାନରେ ରହିଛି। ଆମ ଦେଶ କଥା ଆକଳନ କଲେ ଆନ୍ଧ୍ରପ୍ରଦେଶ ମାଛ ଚାଷରେ ପ୍ରଥମ ହୋଇଥିବା ବେଳେ ଓଡିଶା ଚତୁର୍ଥ ସ୍ଥାନରେ ରହିଛି। ଆନ୍ଧ୍ର ଆମ ରାଜ୍ୟର ପ୍ରତି ଜିଲାକୁ ପ୍ରତେହ ମାଛ ରପ୍ତାନି କରି ଆମ ଚାହିଦା ପୂରଣ କରୁଛି ବୋଲି ଜିଲା ମତ୍ସ୍ୟ ଅଧିକାରୀ ନରସିଂହ ମୁଣ୍ଡ୍ କହିଥିଲେ।
ମାଛ ଚାଷର ଉନ୍ନତି ପାଇଁ ଓଡିଶାରେ ୨୦୧୮ରେ ପଞ୍ଚାୟତ ଓ ପାନୀୟ ଜଳ ବିଭାଗ ପକ୍ଷରୁ ଏକ ନୀତି ନିର୍ଦ୍ଧାରଣ କରାଯାଇ ପଞ୍ଚାୟତ ପୋଖରୀଗୁଡିକୁ ମାଛ ଚାଷ ପାଇଁ ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ ୫ ବର୍ଷ ଲିଜ୍ ସୂତ୍ରରେ ପ୍ରଦାନ କରାଯାଉଛି। ମତ୍ସ୍ୟ ଚାଷୀଙ୍କୁ ଆବଶ୍ୟକ ଯନ୍ତ୍ରପାତି, ଅନ୍ୟ ସରଞ୍ଜାମର ବହୁଳ ବ୍ୟବହାର ଲାଗି ସ୍ବତନ୍ତ୍ର ପ୍ରୋତ୍ସାହନ, ନୂତନ ପଦ୍ଧତିରେ ମାଛ ଚାଷ କରି ଦ୍ୱିଗୁଣିତ ଲାଭବାନ, ମତ୍ସ୍ୟ ଜାଆଁଳ ଉତ୍ପାଦନ, ମାଛ ଚାଷ ପାଇଁ ନୂତନ ପୋଖରୀ ଖନନ ପାଇଁ ସରକାର ଆଥିକ ସହ ଯୋଗ, ବ୍ୟାଙ୍କ ଋଣ, ବୈଷୟିକ ଜ୍ଞାନ କୌଶଳ, ମତ୍ସ୍ୟ ବୃଦ୍ଧି ପାଇଁ ଖାଦ୍ୟ, ରୋଗମୁକ୍ତ ପାଇଁ ଔଷଧ ଆଦି ଯୋଗାଇ ସରକାର ଦେଇ ଆସୁଛନ୍ତି। ଏହା ସତ୍ୱେ ମତ୍ସ୍ୟ ଚାଷୀମାନେ ଅଧିକ ଉତ୍ପାଦନକ୍ଷମ ହୋଇ ନ ଥିବାରୁ ଆନ୍ଧ୍ର ଦେଶରେ ପ୍ରଥମ ସ୍ଥାନ ଅଧିକାର କରି ଆମ ରାଜ୍ୟକୁ ମାଛ ଯୋଗାଉଛି। ମାଲକାନଗିରି ଜିଲାର ମହିଳା ଏବଂ ପୁରୁଷ ମତ୍ସ୍ୟ ଚାଷୀ, ସ୍ବୟଂ ସହାୟକ ଗୋଷ୍ଠୀ କିପରି ଉନ୍ନତମାନର ମାଛ ଚାଷ କରି ନିଜେ ଲାଭବାନ ହେବା ସହ ଜିଲାରେ ମାଛ ଉତ୍ପାଦନ ବୃଦ୍ଧି କରି ଆନ୍ଧ୍ରରୁ ଆସୁଥିବା ମାଛକୁ ରୋକି ପାରିବେ ସେଥିପାଇଁ ସଚେତନ ହେବା ଆବଶ୍ୟକ ବୋଲି ମଞ୍ଚାସୀନ ଅତିଥିମାନେ ଉପସ୍ଥିତ ମାଛ ଚାଷୀଙ୍କୁ ପରାମର୍ଶ ଦେଇଥିଲେ। ସହକାରୀ ଜିଲା ମତ୍ସ୍ୟ ଅଧିକାରୀ ସୁଶାନ୍ତ ଗୌଡ କାର୍ଯ୍ୟକ୍ରମ ପରିଚାଳନା କରିଥିଲେ।