ଭୁବନେଶ୍ୱର,୨୮।୮(ବ୍ୟୁରୋ): ରାଜ୍ୟରେ ନଦୀବାଲିର ସୁବିନିଯୋଗ ଓ ସୁପରିଚାଳନା ପାଇଁ ଓଡ଼ିଶା ନଦୀବାଲି ନୀତି-୨୦୨୧ କାର୍ଯ୍ୟକାରୀ କରିବା ପାଇଁ ରାଜ୍ୟ ସରକାର ପଦକ୍ଷେପ ନେଇଛନ୍ତି। ବାଲି ଚାହିଦା ଯୋଗାଣ, ଅଟକଳ, ବାଲି ଉତ୍ସ ଚିହ୍ନଟ, ବାଲି ଉତ୍ସର ଡିଜିପିଏସ୍ ସର୍ଭେ, ନିଲାମ ଅଧିକାରୀ, ମାଇନିଂ ପ୍ଲାନ ଅନୁମୋଦନ, ପରିବେଶ ମଞ୍ଜୁରୀ ଓ ଅନ୍ୟାନ୍ୟ ବୈଧାନିକ ମଞ୍ଜୁରୀ, ବାଲିଖାଦାନ ପରିଚାଳନା, ଆନ୍ତଃ ରାଜ୍ୟ ପରିବହନ ଏବଂ ତଦାରଖ ଓ ପ୍ରବର୍ତ୍ତନ ଇତ୍ୟାଦି ଏହି ବାଲି ନୀତିର ପ୍ରମୁଖ ବୈଶିଷ୍ଟ୍ୟ ରହିଛି । ରାଜସ୍ବ ବିଭାଗ ପକ୍ଷରୁ ପ୍ରସ୍ତୁତ କରାଯାଇଥିବା ଓଡ଼ିଶା ବାଲି ଚିଠା ନୀତିକୁ ରାଜ୍ୟ କ୍ୟାବିିନେଟ ଅନୁମୋଦନ କରିଛି। ଓଡ଼ିଶା ଖଣି ଓ ଭୂତତ୍ତ୍ୱ ସେବାର ଖଣିିଜ ପ୍ରଶାସନ ଓ୍ବିଙ୍ଗ ପାଇଁ କ୍ୟାଡର ନିୟମାବଳୀ ପରିବର୍ତ୍ତନ କରାଯାଇ ଓଡ଼ିଶା ଖଣିଜ ପ୍ରଶାସନ ସେବା କ୍ୟାଡର(ନିଯୁକ୍ତି ନିୟମ ଏବଂ ସେବା ସର୍ତ୍ତାବଳୀ) ୨୦୨୧ ପ୍ରକାଶ କରାଯାଇଛି। ଏହାଦ୍ୱାରା ଉନ୍ନତ ଖଣିଜ ପ୍ରଶାସନ ମାଧ୍ୟମରେ ଖଣିଜ ବିକାଶକୁ ସୁନିଶ୍ଚିତ କରିବା ସହିତ ରାଜ୍ୟରେ ଖଣିଜ ରାଜସ୍ବ ଆୟ ବୃଦ୍ଧିରେ ସହାୟକ ହୋଇପାରିବ। ଖଣି ଓ ଇସ୍ପାତ ବିଭାଗ ଦ୍ୱାରା ଦିଆଯାଇଥିବା ଏହି ପ୍ରସ୍ତାବକୁ ରାଜ୍ୟ କ୍ୟାବିନେଟ ଅନୁମୋଦନ କରିଛି।