ଭୁବନେଶ୍ୱର,୧୯।୭(ଶର୍ମିଷ୍ଠା ପାଣିଗ୍ରାହୀ):ଓଡ଼ିଶା ସାହିତ୍ୟ ଏକାଡେମୀର ସଚିବ ପ୍ରବୋଧ କୁମାର ରାଉତଙ୍କର ମଙ୍ଗଳବାର ସା ୭ଟାରେ କଟକସ୍ଥିତ ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ପରଲୋକ ହୋଇଯାଇଛି। ତାଙ୍କୁ ୫୩ ବର୍ଷ ବୟସ ହୋଇଥିଲା। ଗତ ରବିବାର କଟକର ବିଜୁ ପଟ୍ଟନାୟକ ଛକଠାରେ ସେ ଏକ ସଡ଼କ ଦୁର୍ଘଟଣାରେ ଗୁରୁତର ଆହତ ହୋଇ ହସ୍ପିଟାଲରେ ଚିକିତ୍ସାଧୀନ ଥିଲେ। ତାଙ୍କ ବିୟୋଗରେ ବିଭିନ୍ନ ମହଲରେ ଶୋକର ଛାୟା ଖେଳିଯାଇଥିବାବେଳେ ଓଡ଼ିଆ ଭାଷା, ସାହିତ୍ୟ ସଂସ୍କୃତି ବିଭାଗର ମନ୍ତ୍ରୀ ଅଶ୍ୱିନୀ କୁମାର ପାତ୍ର, ନିର୍ଦ୍ଦେଶକ ଦିଲୀପ ରାଉତରାଏ ଏବଂ ଓଡ଼ିଶା ସାହିତ୍ୟ ଏକାଡେମୀର ସଭାପତି ଡ. ହୃଷୀକେଶ ମଲ୍ଲିକ, ଉପସଭାପତି ସଂଗ୍ରାମ ଜେନାଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଶୋକ ପ୍ରକାଶ କରିଛନ୍ତି। ତାଙ୍କ ମରଶରୀରକୁ ପୁରୀ ସ୍ବର୍ଗଦ୍ୱାର ନିଆଯାଇ ଶେଷକୃତ୍ୟ ସମ୍ପନ୍ନ କରାଯାଇଛି।
ଧର୍ମାନନ୍ଦ ରାଉତ ଓ ପ୍ରମିଳା ଦେବୀଙ୍କ ପୁତ୍ର ପ୍ରବୋଧ ଏକାଧାରରେ ଜଣେ କବି, ଗୀତିକାର ଓ ନାଟ୍ୟକାର ଥିଲେ। ସେ ଓଡ଼ିଶା ସାହିତ୍ୟ ଏକାଡେମୀର ସଚିବ ପଦ ସହିତ ଓକାକ୍ରେ ପ୍ରଶାସନିକ ଅଧିକାରୀ ଭାବେ ଦାୟିତ୍ୱରେ ଥିଲେ। ସେ ଜଗତ୍ସିଂହପୁର ଜିଲାର କାଦୁଆପଡ଼ା ଗ୍ରାମ ନିକଟସ୍ଥ ଗୋପାଳପୁର ଗ୍ରାମରେ ୧୯୭୦ ମସିହା ମେ ୧୫ରେ ଜନ୍ମଗ୍ରହଣ କରିଥିଲେ। ସେ କଟକଠାରେ ସହଧର୍ମିଣୀ, ପୁଅ ଓ ଝିଅଙ୍କ ସହିତ ରହୁଥିଲେ। ରାଉତ ରେଭେନ୍ଶା ମହାବିଦ୍ୟାଳୟରୁ ଅର୍ଥନୀତିରେ ସ୍ନାତକୋତ୍ତର ଶିକ୍ଷା ପରେ ଆଇନ, ସମବାୟ ପରିଚାଳନା ଓ ରପ୍ତାନି ପରିଚାଳନାରେ ଉଚ୍ଚତର ଶିକ୍ଷା ଲାଭ କରିଥିଲେ। ସେ କବିତା ପୁସ୍ତକ ‘ଅଳ୍ପ ଅଶିଣ ପାପ’ ଏବଂ ଏକାଙ୍କିକା ପୁସ୍ତକ ‘ଦ ମିଷ୍ଟ୍ରି ଅଫ୍ ଦ ବ୍ରୋକନ ଟ୍ରଙ୍କ୍’ ଏବଂ ଗଳ୍ପ ସଙ୍କଳନ ‘ଅଜନ୍ତା ଏଲୋରା ପରି’ ପ୍ରଭୃତି ରଚନା କରିଥିଲେ। ସେ ବେତାର ନାଟକ ପୁରସ୍କାର-୨୦୦୪, ରାଜ୍ୟ କୃଷି ବିପଣନ ପରିଷଦ ପକ୍ଷରୁ କିଷାନ ପରିବାର ସମ୍ମାନ, ଫକୀରମୋହନ ସ୍ମୃତି ସଂସଦ ସମ୍ମାନ, ରାଷ୍ଟ୍ରୀୟ କିଷାନ ପରିବାର ସମ୍ମାନ, ଆଦିକବି ସାରଳା ଦାସ ସାରସ୍ବତ ସମ୍ମାନ, ଶ୍ରେଷ୍ଠ ଯୁବ ସାହିତି୍ୟକ ସମ୍ମାନ, ଜାତୀୟ ସାହିତ୍ୟ ରତ୍ନ ସମ୍ମାନ-୨୦୧୭ ଆଦି ବିଭିନ୍ନ ସମ୍ମାନରେ ସମ୍ମାନିତ ହୋଇଥିଲେ।
