ଭୁବନେଶ୍ୱର, ୧୩।୧୨(ବ୍ୟୁରୋ): ଓଡ଼ିଶା ଷ୍ଟିଭେଡର୍ସ ଲିମିଟେଡ୍ (ଓଏସ୍ଏଲ୍)ର ନିର୍ଦ୍ଦେଶକ ତଥା ଶିଳ୍ପପତି ମହିମାନନ୍ଦ ମିଶ୍ରଙ୍କ ପୁଅ ଚର୍ଚ୍ଚିତ ମିଶ୍ର ସୋମବାର ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ରେ ହାଜର ହୋଇଥିଲେ। ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ଗିରଫ ହୋଇ ଜେଲ ଯାଇଥିବା ଆଇଏଫ୍ଏସ୍ ଅଫିସର ଅଭୟକାନ୍ତ ପାଠକଙ୍କ ବିଏମଡବ୍ଲ୍ୟୁ କିଣା ଲିଙ୍କ୍ରେ ଚର୍ଚ୍ଚିତଙ୍କୁ ଇଡି ପୂର୍ବରୁ ନୋଟିସ କରିଥିଲା। ତେବେ ସେ ଓକିଲଙ୍କ ସହ ନିର୍ଦ୍ଧାରିତ ସମୟରେ ଇଡି କାର୍ଯ୍ୟାଳୟରେ ପହଞ୍ଚତ୍ବା ପରେ ଅଧିକାରୀମାନେ ତାଙ୍କୁ ୨ ଘଣ୍ଟାରୁ ଅଧିକ ସମୟ ଜେରା କରିଥିଲେ। ଚାକିରିରୁ ବହିଷ୍କୃତ ଆଇଏଫ୍ଏସ୍ ଅଧିକାରୀ ଅଭୟଙ୍କ ବେଆଇନ ଟଙ୍କା କାରବାର ତଦନ୍ତ କରୁଛି ଇଡି। ଅଭୟଙ୍କ ଦାମି ଗାଡି ବିଏମ୍ଡବ୍ଲ୍ୟୁ ଚର୍ଚ୍ଚିତଙ୍କ ଶୋ’ରୁମ୍ରୁ କିଣାଯାଇଥିଲା ବୋଲି ଇଡି ସୁରାକ ପାଇଥିଲା। ଗାଡି କିଣା ବାବଦ ଟଙ୍କାକୁ ନେଇ ଇଡି ଖୋଳତାଡ଼ କରୁଥିବାବେଳେ ଏ ସଂକ୍ରାନ୍ତରେ ଇଡି ଅଧିକାରୀମାନେ ଚର୍ଚ୍ଚିତଙ୍କୁ ପଚରାଉଚରା କରିଛନ୍ତି। ତେବେ ଚର୍ଚ୍ଚିତ ବାହାରିବା ପରେ ସମସ୍ତ ଡକ୍ୟୁମେଣ୍ଟ୍ ଇଡି ପାଖରେ ଦାଖଲ କରିବା ସହ ତଦନ୍ତରେ ସହଯୋଗ କରିଥିବା କହିଛନ୍ତି।
