ଭୁବନେଶ୍ୱର, ୧୩।୧(କ୍ରୀଡ଼ା ପ୍ରତିନିଧି)- ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ କଟକର ବାରବାଟୀ ଷ୍ଟାଡିୟମରେ ଚାଲିଥିବା ଏମ୍ଜିଏମ୍ ଟି୨୦ କ୍ରିକେଟ ଲିଗ୍ର ଫାଇନାଲରେ ଓଡ଼ିଶା ପାନ୍ଥର୍ସ ଓ ଲାୟନ୍ସ ମଧ୍ୟରେ ମୁକାବିଲା ହେବ। ବୁଧବାର ଫାଇନାଲ ଅନୁଷ୍ଠିତ ହେବ। ମଙ୍ଗଳବାର ଅନୁଷ୍ଠିତ ପ୍ରଥମ ସେମିଫାଇନାଲରେ ଟାଇଗର୍ସକୁ ୫ ଉଇକେଟରେ ହରାଇ ଓଡ଼ିଶା ପାନ୍ଥର୍ସ ଫାଇନାଲରେ ପ୍ରବେଶ କରିଥିଲା। ପ୍ରଥମେ ବ୍ୟାଟିଂ କରିଥିବା ଟାଇଗର୍ସ ୨୦ ଓଭରରେ ୯ ଉଇକେଟ ହରାଇ ୧୧୭ ରନ କରିଥିବାବେଳେ ପାନ୍ଥର୍ସ ୧୯.୫ ଓଭରରେ ୫ ଉଇକେଟ ହରାଇ ୧୨୧ ରନ ସଂଗ୍ରହ କରି ନେଇଥିଲା। ସେହିପରି ଦ୍ୱିତୀୟ ମ୍ୟାଚରେ ଲାୟନ୍ସ ୭୫ ରନରେ ଓଡ଼ିଶା ପୁମାସ୍କୁ ପରାସ୍ତ କରିଥିଲା। ଲାୟନ୍ସ ୨୦ ଓଭରରେ ୨ ଉଇକେଟ ହରାଇ ୧୭୨ ରନ କରିଥିବାବେଳେ ପୁମାସ ୧୮.୨ ଓଭରରେ ୯୭ ରନକରି ଅଲଆଉଟ ହୋଇ ଯାଇଥିଲା।
ପ୍ରଥମ ମ୍ୟାଚରେ ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେଇଥିଲା ପାନ୍ଥର୍ସ। ଅଧିନାୟକଙ୍କ ନିଷ୍ପତ୍ତିକୁ ଉଚିତ ସାବ୍ୟସ୍ତ କରି ବୋଲରମାନେ ବ୍ୟାଟିଂ ବିପର୍ଯ୍ୟୟ ଘଟାଇ ଟାଇଗର୍ସକୁ ବ୍ୟାକ୍ଫୁଟ୍କୁ ଠେଲି ଦେଇଥିଲେ। ଟାଇଗର୍ସ ପକ୍ଷରୁ ଅଧିନାୟକ ଦେବାଶିଷ ସାମନ୍ତରାୟ ସର୍ବାଧିକ ୩୧ ଓ ଉଇକେଟ କିପର ଦିବ୍ୟଶକ୍ତି ଚକ୍ରବର୍ତ୍ତୀ ୨୯ ରନ କରିଥିଲେ। ବିପକ୍ଷ ଦଳର ଜୟନ୍ତ ବେହେରା ୩ଟି, ଶୁଭମ୍ ନାୟକ ୨ଟି ଏବଂ ଆଲୋକ ସାହୁ ଗୋଟିଏ ଉଇକେଟ ନେଇଥିଲେ। ୧୧୮ ରନ ବିଜୟ ଲକ୍ଷ୍ୟନେଇ ପଡ଼ିଆକୁ ଓହ୍ଲାଇଥିବା ପାନ୍ଥର୍ସ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟରେ ପଡ଼ି ୨୨ ରନ ମଧ୍ୟରେ ୩ଟି ଉଇକେଟ ହରାଇଥିଲେ ହେଁ ୫ ନମ୍ବର ବ୍ୟାଟ୍ସମ୍ୟାନ ଅଭିଷେକ ଯାଦବଙ୍କ ଦ୍ରୁତ ଅର୍ଦ୍ଧଶତକ ବଳରେ ବିଜୟ ହାସଲ କରିଥିଲା। ଅଭିଷେକ ୩୯ ବଲ୍ରୁ ୫ ଚୌକା ଓ ୧ ଛକା ସହ ୫୦ ରନରେ ଅପରାଜିତ ରହିଥିଲେ। ଆଲୋକ ସାହୁ ୧୨ ବଲ୍ରୁ ୧୬(୩ ଚୌକା) ରନରେ ଅପରାଜିତ ଥିବାବେଳେ ବିନିତ ମହାନ୍ତି ୧୬ ରନ କରି ଆଉଟ ହୋଇଥିଲେ। ପରାଜିତ ଦଳର ଶେଖର ମାଝି ୨ଟି ଏବଂ ମିନାଲ ପରିଡ଼ା, ହର୍ଷିତ ରାଠୋଡ ଓ ଦେବାଶିଷ ସାମନ୍ତରାୟ ଗୋଟିଏ ଲେଖାଏ ଉଇକେଟ ନେଇଥିଲେ। ମ୍ୟାଚ ବିଜୟୀ ଇନିଂସ ପାଇଁ ଅଭିଷେକ ମ୍ୟାନ୍ ଅଫ୍ ଦି ମ୍ୟାଚ ବିବେଚିତ ହୋଇଥିଲେ। ଓସିଏ ସଦସ୍ୟ ଯୁଗଳ କିଶୋର ସାମଲ ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ।
ସ୍ବସ୍ତିକଙ୍କ ଶତକ
ଦ୍ୱିତୀୟ ମ୍ୟାଚରେ ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଲାୟନ୍ସ ଓପନର ସ୍ବସ୍ତିକ ସାମଲଙ୍କ ବିସ୍ଫୋରକ ଶତକ ସହାୟତାରେ ବଡ଼ ସ୍କୋର ଛିଡ଼ା କରିଥିଲା। ୬୮ଟି ବଲ୍ର ସମ୍ମୁଖୀନ ହୋଇଥିବା ସ୍ବସ୍ତିକ ୭ ଚୌକା ଓ ୭ ଛକା ସହାୟତାରେ ୧୧୦ ରନ କରି ଅପରାଜିତ ରହିଥିଲେ। ସୁଜିତ ଲେଙ୍କା ୩୦ ବଲ୍ରୁ ୨ ଚୌକା ଓ ୧ ଛକା ସହ ୩୭ ରନରେ ଅପରାଜିତ ଥିଲେ। ବିପକ୍ଷ ଦଳର ଜୀତେନ୍ଦ୍ର ଥାପ୍ପା ଓ ଟୁକୁନା ସାହୁ ଗୋଟିଏ ଲେଖାଏ ଉଇକେଟ ନେଇଥିଲେ। ୧୭୩ ରନ ବିଜୟ ଲକ୍ଷ୍ୟନେଇ ପଡ଼ିଆକୁ ଓହ୍ଲାଇଥିବା ପୁମାସ ଶୀଘ୍ର ଉଇକେଟମାନ ହରାଇ ବ୍ୟାକ୍ଫୁଟ୍କୁ ଚାଲି ଯାଇଥିଲା। ଦଳ ପକ୍ଷରୁ ସନ୍ଦିପ ପଟ୍ଟନାୟକ ସର୍ବାଧିକ ୨୬ ଓ ଜୀତେନ୍ଦ୍ର ଥାପ୍ପା ୨୧ ରନ କରିଥିଲେ। ବିଜୟୀ ଦଳର ବୋଲରଙ୍କ ମଧ୍ୟରେ ଶିବାଶିଷ ସାହୁ ସର୍ବାଧିକ ୪ଟି, ବିକାଶ ରାଉତ ୩ଟି ଏବଂ ଆଲୋକ ମଙ୍ଗରାଜ, ଦୀପକ ବେହେରା ଓ ନଉତ୍ତମ ଭଞ୍ଜ ଗୋଟିଏ ଲେଖାଏ ଉଇକେଟ ନେଇଥିଲେ।
