ଭୁବନେଶ୍ୱର, ୯।୧ (ତପନ ସ୍ବାଇଁ): ବ୍ୟାଟିଂ ବିଫଳତା ଯୋଗୁ ଓଡ଼ିଶା ଚଳିତ ରଣ୍ଜୀ ସିଜନରେ ନିଜର ପ୍ରଥମ ମ୍ୟାଚ୍ରେ ପରାଜୟ ସ୍ବାଦ ଚାଖିଛି। ଭଦୋଦରାର ମୋତିବାଗ ଷ୍ଟାଡିୟମରେ ଶେଷ ହୋଇଥିବା ରଣଜୀ ଟ୍ରଫି କ୍ରିକେଟ ମ୍ୟାଚରେ ଓଡ଼ିଶା ୧୪୭ ରନରେ ବରୋଦାଠାରୁ ହାରିଯାଇଛି। ବିଜୟ ଲକ୍ଷ୍ୟ ୪୩୨ ଥିବାବେଳେ ଓଡ଼ିଶା ଦ୍ୱିତୀୟ ଇନିଂସରେ ୨୮୪ ରନରେ ଅଲ୍ଆଉଟ ହୋଇ ଯାଇଥିଲା। ବରୋଦାର ପ୍ରଥମ ଇନିଂସ ୩୫୧ ରନ ଜବାବରେ ଓଡ଼ିଶା ବ୍ୟାଟିଂ ବିପର୍ଯ୍ୟୟରେ ପଡ଼ି ପ୍ରଥମ ଇନିଂସରେ ମାତ୍ର ୧୭୮ରେ ଅଲ୍ଆଉଟ ହୋଇଥିଲା। ବରୋଦା ଏହାର ଦ୍ୱିତୀୟ ଇନିଂସକୁ ୨୫୮/୪ରେ ଘୋଷଣା କରିଥିଲା।
ତୃତୀୟ ଦିବସର ଅସମାପ୍ତ ସ୍କୋର ୧୦୩/୧ରୁ ଖେଳ ଆରମ୍ଭ କରିଥିବା ଓଡ଼ିଶାକୁ ଅନ୍ତିମ ଦିବସରେ ମ୍ୟାଚ ଡ୍ର ରଖିବାକୁ ହେଲେ ସତର୍କତାର ସହ ଦିନସାରା ବ୍ୟାଟିଂ କରିବା ଜରୁରୀ ଥିଲା। ଟପ୍ ଅର୍ଡରର ୩ ବ୍ୟାଟରଙ୍କ ଉପଯୋଗୀ ଅବଦାନ ଯୋଗୁ ଦଳ ଠିକ୍ ପଥରେ ମଧ୍ୟ ଅଗ୍ରସର ହୋଇଥିଲା। ଦଳ ଏକଦା ୨ ଉଇକେଟରେ ୧୯୨ ରନରେ ପହଞ୍ଚତ୍ ଭଲ ସ୍ଥିତିରେ ମଧ୍ୟ ଥିଲା। ମାତ୍ର ଅଧିନାୟକ ଶାନ୍ତନୁ ମିଶ୍ର ଓ ସନ୍ଦୀପ ପଟ୍ଟନାୟକଙ୍କ ମଧ୍ୟରେ ଭାଗୀଦାରି ଭାଙ୍ଗିବା ସହ ଓଡ଼ିଶାର ବ୍ୟାଟିଂ ବିପର୍ଯ୍ୟୟ ଆରମ୍ଭ ହୋଇ ଯାଇଥିଲା।
ଦୁହେଁ ଦ୍ୱିତୀୟ ଉଇକେଟରେ ୨୩୬ ବଲ୍ରୁ ୮୯ ରନ ଯୋଡ଼ି ଦଳ ପାଇଁ ଡ୍ର’ ଆଶା ସଞ୍ଚାର କରିଥିଲେ। ଅର୍ଦ୍ଧଶତକ ହାସଲ କରିବାପରେ ସନ୍ଦୀପ ୫୧ ରନ୍କରି ଆଉଟ ହେବା ସହ ପାର୍ଟନରଶିପ୍ ଭାଙ୍ଗିଥିଲା। ଶାନ୍ତନୁ ଦଳ ପକ୍ଷରୁ ସର୍ବାଧିକ ୭୮ ରନ ସଂଗ୍ରହ କରିଥିଲେ ହେଁ ଅପରପଟରୁ ସେପରି ସମର୍ଥନ ମିଳି ନ ଥିଲା। ୯୨ ରନ ମଧ୍ୟରେ ଓଡ଼ିଶାର ୮ ଉଇକେଟ ପଡ଼ି ଯାଇଥିଲା। ଶୁଭ୍ରାଂଶୁ ସେନାପତି ୧, କାର୍ତ୍ତିକ ବିଶ୍ୱାଳ ୦ ଓ ଗୋବିନ୍ଦ ପୋଦ୍ଦାର ୧୪ ରନ କରି ଆଉଟ ହେବାରୁ ଓଡ଼ିଶା ପରାଜୟ ମୁହାଁ ହୋଇଥିଲା। ଆଶୀର୍ବାଦ ସ୍ବାଇଁ ୨୧ ଏବଂ ଶେଷ ଭାଗରେ ସୂର୍ଯ୍ୟକାନ୍ତ ପ୍ରଧାନ ଆକ୍ରମଣାତ୍ମକ ୪୬ (୩୫ ବଲ, ୨ ଚୌକା, ୪ ଛକା) ରନ କରିଥିଲେ। ଓଡ଼ିଶା ଦଳକୁ ବଡ଼ କ୍ଷତି ପହଞ୍ଚାଇଥିଲେ ୨୨ ବର୍ଷୀୟ ଅଫ୍ ସ୍ପିନର ମହେଶ ପିଥିୟା। ସେ କ୍ୟାରିୟର ଶ୍ରେଷ୍ଠ ବୋଲିଂ କରି ୬୧ ରନ ବିନିମୟରେ ୫ ଉଇକେଟ ସଫଳତା ପାଇଥିଲେ। ଜ୍ୟୋତ୍ସ୍ନିଲ ସିଂ ୨ଟି ଏବଂ ଅତୀତ ସେଠ୍ ଓ ନିନାଦ ରଥଭା ଗୋଟିଏ ଲେଖାଏ ଉଇକେଟ ନେଇଥିଲେ।