୧୯୩୬ ଏପ୍ରିଲ ୧ରେ ଭାଷା ଭିତ୍ତିରେ ସ୍ବତନ୍ତ୍ର ଓଡ଼ିଶା ପ୍ରଦେଶ ଗଠନ ହେଲା। ଠିକ୍ ଆଜିକୁ ୮୫ବର୍ଷ ବିତିଯାଇଥିଲେ ସୁଦ୍ଧା ଓଡ଼ିଶାର ସୀମା ସ୍ପଷ୍ଟ ହୋଇପାରୁନି। ପଡୋଶୀ ରାଜ୍ୟଗୁଡ଼ିକ ବାରମ୍ବାର ଓଡ଼ିଶା ଭିତରକୁ ପଶି ଆସି ଗାଁ ଦଖଲ କରୁଛନ୍ତି। ରାସ୍ତାଘାଟ ନିର୍ମାଣ ସହ ସରକାରୀ କାର୍ଯ୍ୟକ୍ରମ ଜାରି ରଖୁଛନ୍ତି। ଏବେ ସୀମାନ୍ତ ଗ୍ରାମଗୁଡିକର ଲୋକେ ଅନ୍ୟ ରାଜ୍ୟରେ ଭୋଟ ଦେବା ପରେ ଓଡ଼ିଶା ଭୂଖଣ୍ଡର ପ୍ରକୃତ ସ୍ଥିତିକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। କିଛିଦିନ ପୂର୍ବରୁ କୋଟିଆରେ ଆନ୍ଧ୍ର ପ୍ରଦେଶ ସରକାର ନିର୍ବାଚନ କରାଇଥିବାବେଳେ ଏବେ ବାଲେଶ୍ୱର ଜିଲା ଭୋଗରାଇ ତହସିଲ ଅନ୍ତର୍ଗତ ଶଙ୍ଖାମେଦୀ ଗାଁର ଲୋକେ ପଶ୍ଚିିମବଙ୍ଗ ନିର୍ବାଚନରେ ଭାଗନେଇ ଭୋଟ ଦେଇଛନ୍ତି। ଆଜି ରାଜ୍ୟବାସୀ ଓଡ଼ିଶା ଦିବସ ପାଳନ କରିବେ। ଏପରିସ୍ଥିତିରେ ସୀମା ବିବାଦ ଓ ଓଡ଼ିଶା ଲୋକେ ଅନ୍ୟ ରାଜ୍ୟରେ ଭୋଟ ଦେବା ପ୍ରସଙ୍ଗକୁ ନେଇ ସ୍ବତନ୍ତ୍ର ଉପସ୍ଥାପନା…
ସ୍ବତନ୍ତ୍ର ବିଭାଗ ହେଉ, ସୀମାନ୍ତ ଲୋକଙ୍କୁ ସୁବିଧା ଦିଆଯାଉ
କେନ୍ଦ୍ର ସରକାର ସମସ୍ତ ରାଜ୍ୟରେ ‘ଗୋଟିଏ ଦେଶ, ଗୋଟିଏ ପରିଚୟପତ୍ର’ ପ୍ରଚଳନ କରିବା ଉଚିତ। ଏହାଦ୍ୱାରା ୨ଟି ସ୍ଥାନରେ ଲୋକେ ଭୋଟ ଦେଇପାରିବେ ନାହିଁ। ସେହିଭଳି ସୀମା ବିବାଦର ସ୍ଥାୟୀ ସମାଧାନ ପାଇଁ ଓଡ଼ିଶା ସରକାରଙ୍କ ରାଜସ୍ବ ବିଭାଗ ଅଧୀନରେ ସ୍ବତନ୍ତ୍ର ବିଭାଗ କରାଯାଉ। ଏଥିସହ ସୀମାବର୍ତ୍ତୀ ଗ୍ରାମଗୁଡିକରେ ସୀମାନ୍ତ ଗ୍ରାମ୍ୟ ବିକାଶ ପରିଷଦ ଗଠନ ହେଉ। ପରିଷଦ ସଦସ୍ୟମାନେ ଅନ୍ୟ ରାଜ୍ୟର ଆକର୍ଷଣକୁ ପ୍ରତିହତ କରିବା ସହ ଓଡ଼ିଶାର ସୀମାନ୍ତ ଗ୍ରାମର ଲୋକଙ୍କୁ ନିଜ ରାଜ୍ୟରେ ଭୋଟ ଦେବାକୁ ବୁଝାଇବେ।
– ଅଦ୍ୱୈତ ପାତ୍ର, ରାଜ୍ୟ ସଭାପତି, ଉତ୍କଳ ସମ୍ମିଳନୀ
ଓଡ଼ିଶା ସରକାରଙ୍କ ଅପାରଗତା
ଓଡିଶାର ସ୍ବାର୍ଥ ପ୍ରତି ରାଜ୍ୟ ସରକାର ବା ପ୍ରଶାସନିକ ଅଧିକାରୀଙ୍କର ଆନ୍ତରିକତା ନାହିଁ। ଯେଉଁଥିପାଇଁ ଆଜି ଶଙ୍ଖାମେଦୀର ଲୋକେ ପଶ୍ଚିମବଙ୍ଗ ନିର୍ବାଚନରେ ଭାଗନେଇ ଭୋଟ ଦେଇଛନ୍ତି। ପୂର୍ବରୁ ମଧ୍ୟ ରାଜ୍ୟ ସରକାରଙ୍କ ଅପାରଗତା କାରଣରୁ ଓଡ଼ିଶାରୁ ଖରସୁଆଁ ଓ ଷଢେଇକଳା ବିହାରରେ ମିଶିଗଲା, ଯାହାକି ଏବେ ଝାଡ଼ଖଣ୍ଡରେ ରହିଛି।
ମନୋରଞ୍ଜନ ଦାସ, ପ୍ରାଧ୍ୟାପକ
ସୀମା ନିର୍ଦ୍ଧାରଣ ପାଇଁ ସମୟ ଆସିଛି
ଓଡ଼ିଶା ଲୋକେ ପଶ୍ଚିମବଙ୍ଗରେ ଭୋଟ ଦେବା ନିଶ୍ଚିତ ସମ୍ବେଦନଶୀଳ ପ୍ରସଙ୍ଗ। ଏବେ ପ୍ରକୃଷ୍ଟ ସମୟ ଆସିଛି ପଡୋଶୀ ରାଜ୍ୟ ସହ ଓଡ଼ିଶା ସୀମା ନିର୍ଦ୍ଧାରଣ ପାଇଁ॥ ୧୯୩୬ରେ ଭାଷା ଭିତ୍ତିରେ ସ୍ବତନ୍ତ୍ର ଓଡ଼ିଶା ପ୍ରଦେଶ ଗଠନ ହେବା ପରେ ରାଜସ୍ବ ସର୍ଭେ ଓ ନକ୍ସା ଜରିଆରେ ବାସ୍ତବ ସୀମା ନିର୍ଦ୍ଧାରିତ ହୋଇନାହିଁ। କେଉଁଠି ପାହାଡ଼ ମୁଣ୍ଡିଆ ବା କେଉଁଠି ନଦୀକୁ ସୀମା ଭାବେ ଧରି ନିଆଯାଇଛି। ୧୯୩୮ରେ ବାଲେଶ୍ୱରର ତତ୍କାଳୀନ ଜିଲାପାଳ ସୁବର୍ଣ୍ଣରେଖା ନଦୀକୁ ପଶ୍ଚିମବଙ୍ଗ ଓ ଓଡ଼ିଶା ସୀମା ଭାବେ ଧରି ନେଇଥିଲେ। ଯୁଗ୍ମ ସର୍ଭେ ଜରିଆରେ ଓଡ଼ିଶାର ସୀମା ନିର୍ଦ୍ଧାରିତ ହେବା ଆବଶ୍ୟକ।
-ସୌଭାଗ୍ୟ ସୁନ୍ଦରରାୟ, ସ୍ତମ୍ଭକାର
ଶାସନରେ ଜନ ଅସନ୍ତୋଷର ଚିହ୍ନ
ଶଙ୍ଖାମେଦୀ ଗ୍ରାମର ଲୋକେ ପଶ୍ଚିମବଙ୍ଗରେ ଭୋଟ ଦେଉଥିବା ନିଶ୍ଚୟ ଦୁର୍ଭାଗ୍ୟଜନକ। ଯାହା ଜଣାପଡୁଛି, ସେଠାକାର ଲୋକେ ଓଡ଼ିଶା ସରକାରଙ୍କଠାରୁ ନିଜର ଅଧିକାର ଓ ପ୍ରାପ୍ୟ ପାଇବାରୁ ବଞ୍ଚିତ ହେଉଥିବେ। ଏହି ସୁଯୋଗରେ ପଶ୍ଚିମବଙ୍ଗ ସରକାର ସେମାନଙ୍କୁ ସମସ୍ତ ପ୍ରକାର ସୁବିଧା ସୁଯୋଗ ଯୋଗାଇ ବାସିନ୍ଦା କରିବା ସହ ଭୋଟ ଦେବାକୁ ଉତ୍ସାହିତ କରିଥିବେ।
ବିଶ୍ୱପ୍ରିୟ କାନୁନ୍ଗୋ, ମାନବ ଅଧିକାର କର୍ମୀ
ପଡ଼ୋଶୀ ରାଜ୍ୟ ସହ ଆଲୋଚନା କରି ପଦକ୍ଷେପ ନେଉ ଓଡ଼ିଶା
ଓଡ଼ିଶାରେ ରହି ସୀମାନ୍ତ ଗ୍ରାମବାସୀ ପଶ୍ଚିମବଙ୍ଗ ନିର୍ବାଚନରେ ଭୋଟ ଦେବା ଘଟଣାକୁ ସରକାର ଗୁରୁତ୍ୱର ସହ ନିଅନ୍ତୁ। ଜନଗଣନାରେ ତ୍ରୁଟି ରହିଥିଲେ ସଂଶୋଧନ ହେବା ଉଚିତ। ନଚେତ ଅଧିକ ସୁବିଧା ପାଇବା ଲୋଭରେ ଲୋକମାନେ ଅନ୍ୟ ରାଜ୍ୟରେ ଭୋଟ ଦେଉଥିବେ।
– ଲକ୍ଷ୍ମୀକାନ୍ତ ପାଲିତ, ସଙ୍ଗୀତ ନିର୍ଦ୍ଦେଶକ