ନୂଆଦିଲ୍ଲୀ,୧।୧:ଦେଶ ମଧ୍ୟରେ ଇଜ୍ ଅଫ୍ ଡୁଇଁ ବିଜ୍ନେସ ସଂସ୍କାର ପ୍ରକ୍ରିୟାକୁ ଏବେ ଅଗ୍ରାଧିକାର ଦିଆଯାଉଛି। ଓଡ଼ିଶା ଏଭଳି ପ୍ରକ୍ରିୟା ହାତକୁ ନେବାରେ ସକ୍ଷମ ହୋଇଛି। ଏହି ଧାରା ଆଗକୁ ନେବା ଲାଗି ରାଜ୍ୟ ୧,୪୨୯ କୋଟି ଟଙ୍କା ଖୋଲାବଜାରରୁ ଋଣ କରିବ। କେନ୍ଦ୍ର ଅର୍ଥ ମନ୍ତ୍ରଣାଳୟ ପକ୍ଷରୁ ଉକ୍ତ ପ୍ରସ୍ତାବକୁ ମଞ୍ଜୁରୀ ଦିଆଯାଇଥିବା ସୂଚନା ମିଳିଛି। ଏଭଳି ଅନୁମତି ଲାଭ କରିବାରେ ଓଡ଼ିଶା ଅନ୍ୟ ୬ଟି ରାଜ୍ୟ ସହ ଯୋଡ଼ିହୋଇଛି। ଆନ୍ଧ୍ର ପ୍ରଦେଶ, କର୍ନାଟକ, ମଧ୍ୟପ୍ରଦେଶ, ରାଜସ୍ଥାନ, ତାମିଲନାଡୁ ଏବଂ ତେଲଙ୍ଗାନା ଭଳି ରାଜ୍ୟକୁ ପୂର୍ବରୁ ଏଭଳି ଅନୁମତି ମିଳିଛି। ଏହି ୭ ରାଜ୍ୟ ମୋଟ ୨୦,୮୮୮ କୋଟି ଟଙ୍କା ଋଣ ଉଠାଇବେ ବୋଲି ଜଣାପଡ଼ିଛି।
ଦେଶ ମଧ୍ୟରେ ନିବେଶ ଉପଯୋଗୀ ବାଣିଜି୍ୟକ ପରିବେଶ ସୃଷ୍ଟି କରିବା ଦିଗରେ ଇଜ୍ ଅଫ୍ ଡୁଇଁ ବିଜ୍ନେସ୍କୁ ଏକ ପ୍ରମୁଖ ମାନକ ଭାବେ ବିଚାରକୁ ନିଆଯାଉଛି। ଏହି ବର୍ଗରେ ଯଦି ରାଜ୍ୟ ସଂସ୍କାର ପ୍ରକ୍ରିୟା ହାତକୁ ନେଉଥାନ୍ତି, ତେବେ ଅତିରିକ୍ତ ଋଣ ଉଠାଣ ଲାଗି ଅନୁମତି ଦେବାକୁ ଚଳିତ ବର୍ଷ ମେ ମାସରେ କେନ୍ଦ୍ର ସରକାର ନିଷ୍ପତ୍ତି ଗ୍ରହଣ କରିଥିଲେ। ଏହା ଅଧୀନରେ ଜିଲା ସ୍ତରରେ ବାଣିଜ୍ୟ ସଂସ୍କାର ଆକ୍ସନ ପ୍ଲାନ୍ ଭଳି ଅନ୍ୟ ପ୍ରମୁଖ ଯୋଜନାକୁ ସାମିଲ କରାଯାଇଛି। କୋଭିଡ୍-୧୯ ଯୋଗୁ ପୁଞ୍ଜି ଯୋଗାଡ଼ କରିବାରେ ରାଜ୍ୟ ବର୍ତ୍ତମାନ ଅନେକ ଚ୍ୟାଲେଞ୍ଜକୁ ସାମ୍ନା କରୁଛି। ଏହାକୁ ଧ୍ୟାନରେ ରଖି କେନ୍ଦ୍ର ସରକାର ରାଜ୍ୟଗୁଡିକର ଋଣ ଉଠାଇବା ସୀମାକୁ ରାଜ୍ୟ ଜିଡିପିର ୨% ବଢ଼ାଇଥିଲେ। ଓ୍ବାନ୍ ନେଶନ ଓ୍ବାନ୍ ରାଶନ କାର୍ଡ, ଇଜ୍ ଅଫ୍ ଡୁଇଁ ବିଜ୍ନେସ, ସହରାଞ୍ଚଳ ଶାସନ ବ୍ୟବସ୍ଥା ଏବଂ ଶକ୍ତି କ୍ଷେତ୍ର ଭଳି ଜନକଲ୍ୟାଣକାରୀ ସଂସ୍କାରକୁ କାର୍ଯ୍ୟକାରୀ କରାଇବା ଦିଗରେ ଏହି ଋଣ ଅର୍ଥ ଖର୍ଚ୍ଚ କରାଯିବ। ସୂଚନାଯୋଗ୍ୟ, ୧୦ ରାଜ୍ୟ ଏବେ ସୁଦ୍ଧା ଓ୍ବାନ୍ ନେଶନ ଓ୍ବାନ୍ ରାଶନ କାର୍ଡ ସିଷ୍ଟମ ଲାଗୁ କରିଛନ୍ତି। ୭ ରାଜ୍ୟ ଇଜ୍ ଅଫ୍ ଡୁଇଁ ବିଜ୍ନେସ ଏବଂ ୨ ରାଜ୍ୟ ସ୍ଥାନୀୟ ଶାସନ ବ୍ୟବସ୍ଥା କ୍ଷେତ୍ରରେ ସଂସ୍କାର ପ୍ରକ୍ରିୟା ଗ୍ରହଣ କରିଛନ୍ତି। ବର୍ତ୍ତମାନ ସୁଦ୍ଧା ରାଜ୍ୟଗୁଡ଼ିକୁ ୫୧,୬୮୨ କୋଟି ଟଙ୍କାର ଅତିରିକ୍ତ ଋଣ ଉଠାଣ ଲାଗି ଅନୁମତି ପ୍ରଦାନ କରାଯାଇଛି।