ଭୁବନେଶ୍ୱର, ୨୯।୧୧(ତପନ ସ୍ବାଇଁ): ଅହମଦାବାଦର ଅଦାନୀ ସ୍ପୋଟର୍ସ ଲାଇନ୍ ରିଭର୍ଟଫ୍ରଣ୍ଟ ସ୍ପୋଟର୍ସ ପାର୍କରେ ଜାତୀୟ ପିକଲବଲ୍ ଚାମ୍ପିୟନଶିପ୍ ଡିସେମ୍ବର ୧ରୁ ୩ ପର୍ଯ୍ୟନ୍ତ ଅନୁଷ୍ଠିତ ହେବ। ଏଥିରେ ପ୍ରଥମଥରପାଇଁ ଓଡ଼ିଶା ଅଂଶଗ୍ରହଣ କରିବ। ହାଇଓ୍ବେ ହୋଣ୍ଡା ସ୍ପୋଟର୍ସ କମ୍ପ୍ଲେକ୍ସରେ ନବନିର୍ମିତ ପିକଲବଲ୍ କୋର୍ଟରେ ଓଡ଼ିଶା ପିକଲବଲ୍ ଆସୋସିଏଶନ ସଭାପତି ଶକ୍ତି ରଞ୍ଜନ ଦାସ ଉକ୍ତ ପ୍ରତିଯୋଗିତା ପାଇଁ ଦଳ ଘୋଷଣା କରିଛନ୍ତି। ୪ଟି ଯାକ କୋର୍ଟ ଅତି ସୁନ୍ଦର। ହାଇଓ୍ବେ ହୋଣ୍ଡା ସ୍ପୋଟର୍ସ କମ୍ପ୍ଲେକ୍ସର ଦ୍ୱିତୀୟ ମହଲାରେ ଥିବା ଛାତ ବିଶିଷ୍ଟ କୋର୍ଟ ଭାରତର ପ୍ରଥମ ପିକଲବଲ୍ ରଫ୍ ଟପ୍ କୋର୍ଟ ବୋଲି ଆସୋସିଏଶନ ସମ୍ପାଦକ ଶୁଭ୍ରାଂଶୁ ଷଡ଼ଙ୍ଗୀ ପ୍ରକାଶ କରିଛନ୍ତି। ଆସୋସିଏଶନ ଉପସଭାପତି ଆଦିତ୍ୟ ପାତ୍ରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ କୋର୍ଟ ଗୁଡ଼ିକର କାର୍ଯ୍ୟ ରେକର୍ଡ ସମୟ ମଧ୍ୟରେ ସମ୍ପନ୍ନ ହୋଇଛି ବୋଲି ସେ କହିଛନ୍ତି। ପିକଲବଲ୍ କୋର୍ଟ ଉଦ୍ଘାଟନ ଅବସରରେ ଶକ୍ତି ଦାସ କହିଲେ ଯେ, ଟେନିସ, ଟେବୁଲ ଟେନିସ ଓ ବ୍ୟାଡ୍ମିଣ୍ଟନ ଖେଳରେ ରୁଚି ରଖୁଥିବା ଯେ କୌଣସି ବ୍ୟକ୍ତି ଏହି ଗେମ୍ ଖେଳି ପାରିବେ। ଆମେରିକା ଓ ୟୁରୋପରେ ଲୋକପ୍ରିୟତା ହାସଲ କରିଥିବା ପିକଲବଲ୍କୁ ଯେ କୌଣସି ବୟସ ବର୍ଗର ବ୍ୟକ୍ତି ଖେଳିପାରିବେ। ଜାତୀୟ ଚାମ୍ପିୟନଶିପ୍ରେ ରାଜ୍ୟପକ୍ଷରୁ ପ୍ରତିନିଧିତ୍ୱ କରିବାକୁ ଯାଉଥିବା ଶକ୍ତି ରଞ୍ଜନ ଦାଶ ଓ ଶୁଭ୍ରାଂଶୁ ଷଡ଼ଙ୍ଗୀ ଯଥାକ୍ରମେ ୫୦+ ଓ ୬୦+ ବର୍ଗରେ ଖେଳିବେ। ଏକଲବ୍ୟ ମହାପାତ୍ର ଓ ଶକ୍ତି ରଞ୍ଜନ ଦାଶ ପୁରୁଷ ଡବଲ୍ସ, ସ୍ପନ୍ଦନ ଶତପଥୀ ଉଭୟ ୧୯ ବର୍ଷରୁ କମ୍ ଓ ପୁରୁଷ ସିଙ୍ଗଲ୍ସ, ଅର୍ନବ ବରାଳ ଓ ପ୍ରଥୁଲ ବିଶ୍ୱାଳ ଉଭୟ ୧୪ ବର୍ଷରୁ କମ୍ ସିଙ୍ଗଲ୍ସ ଓ ଡବଲ୍ସରେ ଭାଗନେବେ। ସେହିପରି ସୋହୁମ ପଟ୍ଟନାୟକ ୧୪ ଓ ୧୬ ବର୍ଷରୁ କମ୍ ସିଙ୍ଗଲ୍ସ, ବିନାୟକ ଚନ୍ଦ୍ର ବେହେରା ୧୬ ଓ ୧୯ ବର୍ଷରୁ କମ୍ ବର୍ଗ ସିଙ୍ଗଲ୍ସରେ ଅଂଶଗ୍ରହଣ କରିବେ।
