ଭୁବନେଶ୍ୱର,୭।୩(ସ୍ପୋର୍ଟ୍ସ ବ୍ୟୁରୋ): ଏଠାରେ ଚାଲିଥିବା ଓଡ଼ିଶା ଓମେନ୍ସ ଲିଗ୍ (ଓଡବ୍ଲ୍ୟଏଲ୍)ରେ ଶନିବାର ଦୁଇଟି ମ୍ୟାଚ୍ ଅନୁଷ୍ଠିତ ହୋଇଥିଲା ଓ ଏଥିରେ ସାଇ- ଏସ୍ଟିସି ଓ ରାଇଜିଂ ଷ୍ଟୁଡେଣ୍ଟ ବିଜୟ ହାସଲ କରିଛନ୍ତି। ଲିଗ୍ର ପଞ୍ଚମ ମ୍ୟାଚ୍ରେ ସାଇ-ଏସ୍ଟିସି ୨-୧ ଗୋଲରେ ଓଜିପି କ୍ଲବ୍କୁ ହରାଇଛି। ସାଇ ପକ୍ଷରୁ ଦୀପା ନାୟକ ଅଷ୍ଟମ ଓ ୪୭ତମ ମିନିଟ୍ରେ ଦୁଇଟି ଗୋଲ ସ୍କୋର କରିଥିବା ବେଳେ ଓଜିପି ତରଫରୁ ୨୬ତମ ମିନିଟ୍ରେ ଏ. କ୍ରିତିକା ଗୋଟିଏ ଗୋଲ ଦେଇଥିଲେ। ଜ୍ୟୋତିରଞ୍ଜନ ସ୍ବାଇଁ, ଦୁର୍ଗାମାଧମ ଆଚାର୍ଯ୍ୟ, ଚନ୍ଦ୍ରକାନ୍ତ ବାରିକ, ବିଚିତ୍ର ପ୍ରଧାନ ଓ ସୁଦୀପ୍ତା ଦାହ ମ୍ୟାଚ ପରିଚାଳନା କରିଥିଲେ।
ସେହିପରି ଲିଗ୍ର ଷଷ୍ଠ ମ୍ୟାଚ୍ରେ ରାଇଜିଂ ଷ୍ଟୁଡେଣ୍ଟ ୧-୦ ଗୋଲରେ ଇଷ୍ଟ କୋଷ୍ଟ ରେଲଓ୍ବେକୁ ହରାଇଛି। ରାଇଜିଂ ତରଫରୁ ୬୫ତମ ମିନିଟ୍ରେ ଭାରତୀ ଦାସ ମ୍ୟାଚ୍ର ଏକମାତ୍ର ଗୋଲ ସ୍କୋର କରିଥିଲେ। ଚିତ୍ରାମ୍ବଦା ପାତ୍ର, ଦିଗ୍ବିଜୟ ଦାସ, ଲକ୍ଷ୍ମୀପ୍ରସାଦ ନାୟୁଡୁ, ବିଷ୍ଣୁପ୍ରିୟା ଦାସ ଓ ଦୁର୍ଗାମାଧବ ନାୟକ ଏହି ମ୍ୟାଚ୍ ପରିଚାଳନା କରିଥିଲେ। ୮ ତାରିଖ ସୋମବାର ୩ଟି ମ୍ୟାଚ୍ ଖେଳାଯିବ। ପ୍ରଥମ ମ୍ୟାଚ୍ରେ ସାଇ-ଏସ୍ଟିସି ଓ ଇଷ୍ଟକୋଷ୍ଟ ରେଲଓ୍ବେ, ଦ୍ୱିତୀୟ ମ୍ୟାଚ୍ରେ ଓଡ଼ିଶା ପୋଲିସ ଓ ରାଇଜିଂ ଷ୍ଟୁଡେଣ୍ଟ କ୍ୟାପିଟାଲ ଗ୍ରାଉଣ୍ଡରେ ମୁହାଁମୁହିଁ ହେବେ। ସେହିପରି ତୃତୀୟ ମ୍ୟାଚ୍ରେ ସ୍ପୋଟର୍ସ ହଷ୍ଟେଲ ଓ ଓଜିପି କ୍ଲବ ଯଥାକ୍ରମେ କଳିଙ୍ଗ ଷ୍ଟାଡିୟମରେ ପରସ୍ପରକୁ ଭେଟିବେ।
