ଭୁବନେଶ୍ୱର,୨୮।୩(ସ୍ପୋର୍ଟ୍ସ ବ୍ୟୁରୋ): ଓଡ଼ିଶା ଓମେନ୍ସ ଲିଗ୍ ଶନିବାର ଉଦ୍ଯାପିତ ହୋଇଛି। ରାଇଜିଂ ଷ୍ଟୁଡେଣ୍ଟ କ୍ଲବ ଏହି ଫୁଟ୍ବଲ ଲିଗ୍ରେ ଚାମ୍ପିୟନ ହେବାର ଗୌରବ ଅର୍ଜନ କରିଛି। ଏଥିସହିତ ରାଇଜିଂ ଷ୍ଟୁଡେଣ୍ଟ ଆଗାମୀ ୨୦୨୦-୨୧ ଇଣ୍ଡିଆନ ଓମେନ ଲିଗ୍ (ଆଇଡବ୍ଲ୍ୟୁଏଲ୍) ଖେଳିବାକୁ ଯୋଗ୍ୟତା ହାସଲ କରିଛି। ଲିଗ୍ ଶେଷରେ ରାଇଜିଂ ଷ୍ଟୁଡେଣ୍ଟ ୧୦ଟି ମ୍ୟାଚ୍ ଖେଳି ୯ ବିଜୟ ଓ ୧ ପରାଜୟ ସହ ୨୭ ପଏଣ୍ଟ ହାସଲ କରିଥିଲା। ସେହିପରି ଇଷ୍ଟ କୋଷ୍ଟ ରେଲଓ୍ବେ ମଧ୍ୟ ୧୦ଟି ମ୍ୟାଚ୍ ଖେଳି ୯ ବିଜୟ ଓ ୧ ପରାଜୟ ସହ ସମାନ ୨୭ ପଏଣ୍ଟ ହାସଲ କରିଥିଲା। ତେବେ ଗୋଲ ବ୍ୟବଧାନକୁ ଦୃଷ୍ଟିରେ ରଖି ରାଇଜିଂ ଷ୍ଟୁଡେଣ୍ଟକୁ ଚାମ୍ପିୟନ ବୋଲି ଘୋଷଣା କରାଯାଇଛି। ରାଇଜିଂର ଗୋଲ ବ୍ୟବଧାନ ୨୧ ଥିବାବେଳେ ରେଲଓ୍ବେର ୨୦ ରହିଥିଲା। ମାତ୍ର ଏକ ପଏଣ୍ଟ ପାଇଁ ଇଷ୍ଟକୋଷ୍ଟ ରେଲଓ୍ବେ ରନର୍ସଅପ୍ରେ ସନ୍ତୁଷ୍ଟ ହୋଇଥିଲା। ସେହିପରି ସ୍ପୋଟର୍ସ ହଷ୍ଟେଲ ୧୬, ସାଇ- ଏସ୍ଟିସି ୧୧, ଓଡ଼ିଶା ପୋଲିସ ୪ ଓ ଓଜିପି-କ୍ଲବ ୩ ପଏଣ୍ଟ ହାସଲ କରି ଯଥାକ୍ରମେ ତାଲିକାରେ ତୃତୀୟ, ଚତୁର୍ଥ, ପଞ୍ଚମ ଓ ଷଷ୍ଠ ସ୍ଥାନ ଅଧିକାର କରିଛନ୍ତି।
ଶନିବାର ଲିଗ୍ର ଶେଷ ୩ଟି ମ୍ୟାଚ ଖେଳାଯାଇଥିଲା। ୨୮ ନମ୍ବର ମ୍ୟାଚ୍ରେ ଓଜିପି କ୍ଲବ ୧-୦ ଗୋଲରେ ଓଡ଼ିଶା ପୋଲିସ୍କୁ ହରାଇଥିଲା। ବିଜୟୀ ଦଳ ତରଫରୁ ପ୍ରଜ୍ଞା କିଷାନ ୫୫ତମ ମିନିଟ୍ରେ ମ୍ୟାଚ୍ର ଏକମାତ୍ର ଗୋଲ ସ୍କୋର କରିଥିଲେ। ସେହିପରି ୨୯ ନମ୍ବର ମ୍ୟାଚ୍ରେ ଇଷ୍ଟକୋଷ୍ଟ ରେଲଓ୍ବେ ୩-୧ ଗୋଲରେ ସ୍ପୋଟର୍ସ ହଷ୍ଟେଲକୁ ହରାଇଥିଲା। ରେଲଓ୍ବେ ତରଫରୁ ସରୋଜିନୀ ତିର୍କୀ ୪୯ ଓ ୭୮ତମ ମିନିଟ୍ରେ ଦୁଇଟି ଗୋଲ ଦେଇଥିଲେ। ସେହିପରି ଲହରୀ ମଙ୍ଗରାଜ ୫୨ତମ ମିନିଟ୍ରେ ଗୋଟିଏ ଗୋଲ ଦେଇଥିଲେ। ସ୍ପୋଟର୍ସ ହଷ୍ଟେଲ ତରଫରୁ ସୁସ୍ମିତା ତନ୍ତୀ ୯୩ତମ ମିନିଟ୍ରେ ଗୋଟିଏ ଗୋଲ ଦେଇଥିଲେ। ଅନ୍ୟପଟେ ୩୦ ନମ୍ବର ମ୍ୟାଚ୍ରେ ରାଇଜିଂ ଷ୍ଟୁଡେଣ୍ଟ ୩-୦ ଗୋଲରେ ସାଇ-ଏସ୍ଟିସିକୁ ହରାଇଥିଲା। ରାଇଜିଂ ତରଫରୁ ଯଶୋଦା ମୁଣ୍ଡା ୧୨, ୪୮ ଓ ୫୩ତମ ମିନିଟ୍ରେ ୩ଟି ଗୋଲ ଦେଇ ହ୍ୟାଟ୍ରିକ ଅର୍ଜନ କରିଛନ୍ତି।
ଉଦ୍ଯାପନୀ ଉତ୍ସବରେ ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ ପ୍ରମୁଖ ସଚିବ ବିଶାଳ ଦେବ ମୁଖ୍ୟ ଅତିଥିଭାବେ ଯୋଗ ଦେଇଥିଲେ। ସେହିପରି ଫୁଟ୍ବଲ ଆସୋସିଏଶନ ଅଫ୍ ଓଡ଼ିଶା (ଫାଓ) ସମ୍ପାଦକ ଆଶୀର୍ବାଦ ବେହେରା ଉତ୍ସବରେ ସଭାପତିତ୍ୱ କରିଥିଲେ। ଫାଓ ଉପସଭାପତି ଦିଲୀପ କୁମାର ସାହୁ, କୋଷାଧ୍ୟକ୍ଷ ଭକ୍ତ ବଲ୍ଲଭ ଦାସ, ଉପସଭାପତି ହୃଦୟ ରଞ୍ଜନ ବେହେରା, ଯୁଗ୍ମ ସମ୍ପାଦକ ଅଭିଜିତ ପଲ ଓ ୧୫ ବର୍ଷରୁ କମ୍ ଜାତୀୟ ଟିମ୍ କୋଚ୍ ଶୁଭେନ୍ଦୁ ପଣ୍ଡା ଏହି ଅବସରରେ ଉପସ୍ଥିତ ଥିଲେ।