ଭୁବନେଶ୍ୱର,୮।୬(ବ୍ୟୁରୋ): ଓଡ଼ିଶାରେ ପର୍ଯ୍ୟଟକମାନେ ପାଇବେ କ୍ରୁଜ୍ର ମଜା। ଚିଲିକା ହ୍ରଦରେ ପ୍ରଥମ ଥର ପାଇଁ କ୍ରୁଜ୍ (ବୋଟ୍) ଚାଲିବ। ଚିଲିକାର ବରକୂଳରେ ଥିବା ବିକାଶ ଇକୋ ରିସଟର୍ସ ପକ୍ଷରୁ ୩ କୋଟି ଟଙ୍କା ବ୍ୟୟରେ ପ୍ରସ୍ତୁତ ଏହି କ୍ରୁଜ୍ର ନାମ ‘ଗରୁଡ଼’ ରଖାଯାଇଛି। ଏହାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆସନ୍ତା ୯ ତାରିଖରେ ଉଦ୍ଘାଟନ କରିବେ। ଚିଲିକା ସହ ସାତପଡ଼ାରେ ମଧ୍ୟ ଏହା ଉପଲବ୍ଧ ହେବ। ବରକୂଳରେ ଥିବା ପାନ୍ଥନିବାସ ଦ୍ୱାରା କ୍ରୁଜ୍ର ସେବା ମିଳିବ। ଏବେ ପର୍ଯ୍ୟଟକମାନେ ଏହି ବିଳାସପୂର୍ଣ୍ଣ ବୋଟ୍ (କ୍ରୁଜ୍) ମାଧ୍ୟମରେ ଚିଲିକାକୁ ଅଧିକ ଉପଭୋଗ କରିପାରିବେ।
ସିଙ୍ଗଲ ଓ୍ବିଣ୍ଡୋ ବ୍ୟବସ୍ଥା ଦ୍ୱାରା ଏହି ପ୍ରକଳ୍ପକୁ ଓଡ଼ିଶା ପର୍ଯ୍ୟଟନ ବିଭାଗ ଅନୁମୋଦନ ଦେଇଛି। ଏଥିଲାଗି ଚିଲିକା ବିକାଶ ପ୍ରାଧିକରଣ, ବନ୍ଦର ନିର୍ଦ୍ଦେଶାଳୟ ଏବଂ ଆଭ୍ୟନ୍ତରୀଣ ଜଳ ପରିବହନ ନିର୍ଦ୍ଦେଶାଳୟରୁ ଆଇନଗତ ଅନୁମତି ଗ୍ରହଣ କରାଯାଇଛି। ପର୍ଯ୍ୟଟନ ନିର୍ଦ୍ଦେଶକ ସଚିନ ଯାଦବ ଓଡ଼ିଶାରେ କ୍ରୁଜ ଚାଲିବା ନେଇ ନଦୀ ବା ସମୁଦ୍ରଭିତ୍ତିକ ଓ ରଣନୀତିକ ସୁବିଧାର ବିକାଶ ପାଇଁ ରାଜ୍ୟ ସରକାରଙ୍କ ଏହି ପଦକ୍ଷେପକୁ ମେ ୧୪ ଓ ୧୫ ତାରିଖରେ ମୁମ୍ବାଇରେ ହୋଇଥିବା କ୍ରୁଜ୍ ସମ୍ମିଳନୀରେ ଦର୍ଶାଇଥିଲେ। ଉକ୍ତ କ୍ରୁଜ୍ ବୋଟ୍ରେ ୨ଟି ସୁବିଧାଜନକ ଓ ୪ଟି ପ୍ରମୁଖ କୋଠରି ରହିଛି। ଏହାବ୍ୟତୀତ ବୈଠକ ଲାଗି ଓପନ ଏୟାର ଲବି, ବାର୍, ରେସ୍ତୋରଁା ଏବଂ ଛୋଟ ପିଲାଙ୍କ ପାଇଁ ସୁଇମିଂ ପୁଲ୍ ରହିଛି। ସେହିପରି ରାତ୍ରରହଣୀ, ଖାଦ୍ୟପେୟ ଓ ଅନ୍ୟାନ୍ୟ କାର୍ଯ୍ୟ ନିମନ୍ତେ ମଧ୍ୟ ବ୍ୟବସ୍ଥା ରହିଛି।