ଭୁବନେଶ୍ୱର,୩ା୧: ଦେଶର ବିକାଶ ପାଇଁ ଅର୍ଥନୀତିର ଭିତ୍ତିଭୂମି ସଜାଡିବା ସହ ସାମଗ୍ରୀ ଓ ସେବା ଶୁଳ୍କ (ଜିଏସ୍ଟି) ସଂଗ୍ରହ କ୍ଷେତ୍ରରେ ଓଡ଼ିଶାର ଆୟ ୪୩% ଅଭିବୃଦ୍ଧି ଘଟିଛି। ୨୦୨୧ ଡିସେମ୍ବର ଶେଷ ସୁଦ୍ଧା ମୋଟ ୪୦୮୦.୧୪ କୋଟି ଟଙ୍କାର ଶୁଳ୍କ ଆଦାୟ ହୋଇପାରିଛି। ଗତ ୨୦୨୦ରେ ମଧ୍ୟ ଓଡ଼ିଶାର ଜିଏସ୍ଟି ଆଦାୟ ୨୮୬୦.୨୦ କୋଟି ଟଙ୍କା ଥିଲା। ଗତ ଡିସେମ୍ବର ଶେଷ ସୁଦ୍ଧା ହୋଇଥିବା ଆକଳନ ଅନୁଯାୟୀ ଦେଶର ଜିଏସ୍ଟି ଆୟ ସମୁଦାୟ ୧, ୨୯, ୭୮୦ କୋଟି ଟଙ୍କା ହୋଇଛି। ମୋଟ ଜିଏସ୍ଟି ଆୟରୁ କେନ୍ଦ୍ରୀୟ ଜିଏସ୍ଟି ଆକାରରେ ୨୨,୫୭୮ କୋଟି ଟଙ୍କା ମିଳିଥିବା ବେଳେ ରାଜ୍ୟ ଜିଏସ୍ଟି ଆକାରରେ ୨୮, ୬୫୮ କୋଟି ମିଳିଛି। ସେହିପରି ଆଇଜିଏସ୍ଟି ବାବଦରେ ୬୯,୧୫୫ କୋଟି ଟଙ୍କା ଏବଂ ସେସ୍ ବାବଦରେ ୯,୩୮୯ କୋଟି ଟଙ୍କା ଭାରତ ସରକାର ପାଇଛନ୍ତି। ରାଜ୍ୟଗୁଡିକ ମଧ୍ୟରେ ସର୍ବାଧିକ ଜିଏସ୍ଟି ଆୟ ମହାରାଷ୍ଟ୍ରର ହୋଇଛି। ଏହି ରାଜ୍ୟକୁ ୧୯, ୫୯୨ କୋଟି ଟଙ୍କା ଜିଏସ୍ଟି ୨୦୨୧ରେ ମିଳିଛି। ୨୦୨୦ରେ ୧୭, ୬୯୯ କୋଟି ଥିଲା। ବଡ଼ ରାଜ୍ୟ ଭାବେ ଗୁଜରାଟରେ ୭, ୩୩୬ କୋଟି, ଉତ୍ତରପ୍ରଦେଶରେ ୬୦୨୯ କୋଟି, କର୍ନାଟକରେ ୮, ୩୩୫ କୋଟି, ତାମିଲନାଡୁରେ ୬, ୬୩୫ କୋଟି ଜିଏସ୍ଟି ଆଦାୟ ହୋଇଛି। ଓଡ଼ିଶାର ପଡ଼ୋଶୀ ରାଜ୍ୟ ପଶ୍ଚିମବଙ୍ଗର ଜିଏସ୍ଟି ୩, ୭୦୭ କୋଟି ହୋଇଛି। ପୂର୍ବବର୍ଷ ୪,୧୧୪ କୋଟି ହୋଇଥିଲା।