ସମ୍ବଲପୁର,୩୦ା୧୧(ପ୍ରମୋଦ ବହିଦାର): କର୍ନାଟକର ମାଙ୍ଗାଲୁରୁଠାରେ ଅନୁଷ୍ଠିତ ୧୯ ତମ ଜାତୀୟ ମାଷ୍ଟର୍ସ ସନ୍ତରଣ ପ୍ରତିଯୋଗିତାରେ ଓଡ଼ିଶା ମାଷ୍ଟର୍ସ ସନ୍ତରଣ ପ୍ରତିଯୋଗୀଙ୍କୁ ମିଳିଛି ବିପୁଳ ସଫଳତା। ବିଭିନ୍ନ ପ୍ରତିଯୋଗିତାରେ ଗୋଟିଏ ସ୍ବର୍ଣ୍ଣ ସହ ୭ ପଦକ ହାସଲ କରିଛି ଓଡ଼ିଶା ଦଳ। ମାଙ୍ଗାଲୁରୁସ୍ଥିତ ୟେମେକେରା ସନ୍ତରଣାଗାରରେ ଭାରତୀୟ ସନ୍ତରଣ ମହାସଂଘ ଆନୁକୂଲ୍ୟରେ ଗତ ୨୬ ତାରିଖରେ ଅନୁଷ୍ଠିତ ମାଷ୍ଟର୍ସ ସନ୍ତରଣ ପ୍ରତିଯୋଗିତାରେ ସମ୍ବଲପୁରର ଜୟନ୍ତ ପାଣ୍ଡେ ବ୍ୟକ୍ତିଗତ ପାଞ୍ଚଟି ପଦକ ହାସଲ କରିଛନ୍ତି। ସେଥିମଧ୍ୟରେ ୬୫ରୁ ଊର୍ଦ୍ଧ୍ୱ ବର୍ଷ ବୟସ୍କ ବର୍ଗର ୧୦୦ ମିଟର ବ୍ୟାକଷ୍ଟ୍ରୋକରେ ସ୍ବର୍ଣ୍ଣପଦକ, ୫୦ ମିଟର ବ୍ୟାକ୍ଷ୍ଟ୍ରୋକ୍, ୨ଶହ ମିଟର ଫ୍ରିଷ୍ଟାଇଲ୍ରେ ରୌପ୍ୟପଦକ ଓ ୫୦ ମିଟର୍ ବଟରଫ୍ଲାଏରେ ବ୍ରୋଞ୍ଜପଦକ ରହିଛି। ସେହିପରି ସମ୍ବଲପୁରର ସୁରେନ୍ଦ୍ର ନାଏକଙ୍କୁ ୬୫ରୁ ଊର୍ଦ୍ଧ୍ୱ ବର୍ଗର ୫୦ ମିଟର୍ ବଟରଫ୍ଲାଏରେ ବ୍ରୋଞ୍ଜପଦକ, ୪ ଗୁଣା ୫୦ ମିଟର ଫ୍ରିଷ୍ଟାଇଲ୍ରେ ସୁରେନ୍ଦ୍ର ନାଏକ ବ୍ରୋଞ୍ଜ ପଦକ ବିଜୟୀ ହୋଇଥିବା ବେଳେ ଜୟନ୍ତ ପାଣ୍ଡେ, ପରମେଶ୍ୱର ବାଗ ଓ ସୁରଜ ବାଗଙ୍କୁ ନେଇ ଗଠିତ ଓଡ଼ଶାଦଳ ବ୍ରୋଞ୍ଜପଦକ ବିଜେତା ହୋଇଛି। ଏଥିରେ ଓଡ଼ିଶା ଦଳ ଗୋଟିଏ ସ୍ବର୍ଣ୍ଣପଦକ ସହିତ ଦୁଇଟି ରୌପ୍ୟ ଓ ୪ଟି ବ୍ରୋଞ୍ଜ ପଦକ ସକ ମୋଟ ୭ଟି ପଦକ ହାସଲ କରିଛନ୍ତି। ସମସ୍ତ ପ୍ରତିଯୋଗୀ ଓଡ଼ିଶା ମାଷ୍ଟର୍ସ ସୁଇମର୍ସ କ୍ଲବର ସଦସ୍ୟ ଅଟନ୍ତି। ଏହି ସଫଳତା ପାଇଁ ସମସ୍ତ ପ୍ରତିଯୋଗୀଙ୍କୁ ବୁଧବାର ଓଡ଼ିଶା ମାଷ୍ଟର୍ସ ସୁଇମର୍ସ କ୍ଲବର ସଭାପତି ପ୍ରେମ ରଞ୍ଜନ ପ୍ରଧାନ, ସମ୍ପାଦକ ସୁନ୍ଦରମଣୀ ବାରିକ ଅଭିନନ୍ଦନ ଜଣାଇବା ସହ ସମସ୍ତଙ୍କୁ ପୁଷ୍ପଗୁଚ୍ଛ ଦେଇ ସମ୍ବର୍ଦ୍ଧନା ଜ୍ଞାପନ କରିଛନ୍ତି।
