ଜଗତ୍ସିଂହପୁର ଅଫିସ,୧୦।୪: ଜଗତ୍ସିଂହପୁର ଜିଲାର ୧୫୧ ଉଚ୍ଚ ବିଦ୍ୟାଳୟରେ ୧୪୦୧ ଶିକ୍ଷକ ପଦବୀ ଥିବାବେଳେ ସେଥିରୁ ୩୫୯ଟି ଖାଲି ପଡିଛି। ଶିକ୍ଷାବର୍ଷ ଆରମ୍ଭ ହୋଇଯାଇଥିବାବେଳେ ପଦବୀଗୁଡିକ ଖାଲି ପଡ଼ିଥିବାରୁ ଶିକ୍ଷାଦାନରେ ଗୁରୁତର ବାଧା ସୃଷ୍ଟି ହେବା ଆଶଙ୍କା ରହିଛି।
ଜଗତ୍ସିଂହପୁର ଏକ ଶିକ୍ଷିତ ଜିଲା ଭାବେ ପରିଗଣିତ। କିନ୍ତୁ କୋଭିଡ୍-୧୯ ଯୋଗୁ ୨ ବର୍ଷ କାଳ ବିଦ୍ୟାଳୟରେ ଶିକ୍ଷାଦାନ ବନ୍ଦ ଥିଲା। ଅନ୍ଲାଇନ୍ ମାଧ୍ୟମରେ କାମଚଳା ଶିକ୍ଷାଦାନ ଚାଲିଥିଲେ ସୁଦ୍ଧା ବାସ୍ତବ ଲକ୍ଷ୍ୟ ପୂରଣ ହୋଇପାରିନାହିଁ। ମୋଟାମୋଟିଭାବେ ଛାତ୍ରୀଛାତ୍ରମାନେ ବହୁ ମାତ୍ରାରେ କ୍ଷତିଗ୍ରସ୍ତ ହୋଇଛନ୍ତି। ଏବେ ବିଦ୍ୟାଳୟଗୁଡ଼ିକ ଖୋଲିଥିଲେ ସୁଦ୍ଧା ଶିକ୍ଷକଙ୍କ ଅଭାବ ଚିନ୍ତାର କାରଣ ପାଲଟିଛି। ଜିଲା ଶିକ୍ଷା ବିଭାଗରୁ ମିଳିଥିବା ସୂଚନା ଅନୁଯାୟୀ, ଗତ ମାର୍ଚ୍ଚ ସୁଦ୍ଧା ଜିଲାରେ ୧୬ କ୍ଲାସ୍-୨ ପ୍ରଧାନ ଶିକ୍ଷକ ପଦବୀ ମଧ୍ୟରୁ ୯ ଓ ୧୩୫ ସିନିୟର ଏସ୍ଇଏସ୍ ପ୍ରଧାନ ଶିକ୍ଷକ ପଦବୀରୁ ୩୧ଟି ଖାଲି ପଡ଼ିଛି। ସେହିପରି କଳା ଶିକ୍ଷକ ୩୯୭ରୁ ୧୦୩, ପିସିଏମ୍ ୨୦୯ରୁ ୪୭, ସିବିଜେଡ୍ ୧୯୨ରୁ ୪୭, ହିନ୍ଦୀ ୧୪୭ରୁ ୪୭, ସଂସ୍କୃତ ୧୫୦ରୁ ୪୫, ପିଇଟି ୧୪୫ରୁ ୨୬ ଏବଂ ଊର୍ଦ୍ଦୁରେ ୧୦ରୁ ୪ଟି ପଦବୀ ଖାଲି ପଡ଼ିଛି। ଏହାବାଦ୍ ୨ କିରାଣି ଓ ୯ଟି ପିଅନ ପଦବୀ ଖାଲି ରହିଛି। ଏତେ ସଂଖ୍ୟକ ପଦବୀ ଖାଲିଥିବାବେଳେ ସରକାରଙ୍କ ପକ୍ଷରୁ ପାଖାପାଖି ୨୦୦ ଅତିଥି ଶିକ୍ଷକ ନିଯୁକ୍ତି ଦିଆଯାଇଥିଲା। ଏହାଦ୍ୱାରା ସମସ୍ୟାର କେତେକାଂଶରେ ସମାଧାନ ହୋଇପାରିଥିଲା। ଏବେ କିନ୍ତୁ ଏହି ଅତିଥି ଶିକ୍ଷକମାନଙ୍କ କାର୍ଯ୍ୟକାଳ ସମାପ୍ତ ହୋଇଯାଇଛି। ସରକାର ତୁରନ୍ତ ଖାଲି ପଦବୀ ପୂରଣ କ୍ଷେତ୍ରରେ ପଦକ୍ଷେପ ଗ୍ରହଣ ନ କଲେ ଆଗକୁ ଛାତ୍ରୀଛାତ୍ରମାନେ ନାହିଁ ନ ଥିବା ସମସ୍ୟାର ସମ୍ମୁଖୀନ ହେବେ ବୋଲି ଅନେକ ଅଭିଭାବକ ମତପ୍ରକାଶ କରିଛନ୍ତି।
ଏ ସମ୍ପର୍କରେ ଜିଲା ଶିକ୍ଷା ଅଧିକାରୀ ନିରଞ୍ଜନ ବେହେରାଙ୍କୁ ପଚାରିବାରୁ ଅତିଥି ଶିକ୍ଷକମାନଙ୍କ ଚୁକ୍ତି ଅବଧି ବଢାଇବା ପାଇଁ ସରକାର ପଦକ୍ଷେପ ନେଉଛନ୍ତି। ଖୁବଶୀଘ୍ର ପାଖାପାଖି ୨୦୦ ଅତିଥି ଶିକ୍ଷକଙ୍କୁ ପୁନଃ ଶିକ୍ଷାଦାନ ପାଇଁ ସୁଯୋଗ ଦିଆଯିବ। ଏହାଦ୍ୱାରା ସମ୍ଭାବ୍ୟ ପରିସ୍ଥିତିକୁ କେତେକାଂଶରେ ଏଡ଼ାଇ ଦିଆଯାଇପାରିବ ବୋଲି ସେ ମତବ୍ୟକ୍ତ କରିଛନ୍ତି।