ନୂଆଦିଲ୍ଲୀ,୨୫।୨: ଅଭିଯୋଗ ମିଳିବାର ୨୪ ଘଣ୍ଟା ମଧ୍ୟରେ ସୋସିଆଲ ମିଡ଼ିଆରୁ ଆପତ୍ତିଜନକ କଣ୍ଟେଟ୍ ହଟାଇବାକୁ ପଡ଼ିବ। ଏନେଇ ଭାରତ ସରକାରଙ୍କ ପକ୍ଷରୁ ସୋସିଆଲ ମିଡ଼ିଆ ଏବଂ ଓଟିଟି (ଓଭର ଦ ଟପ୍) ପ୍ଲାଟଫର୍ମ ପାଇଁ ଗୁରୁବାର ମାର୍ଗଦର୍ଶିକା ଜାରି କରିଛନ୍ତି। ଏସମ୍ପର୍କିତ ସୂଚନା କେନ୍ଦ୍ର ମନ୍ତ୍ରୀ ପ୍ରକାଶ ଜାଭେଡ୍କର ଏବଂ ରବିଶଙ୍କର ପ୍ରସାଦ ଏକ ଗଣମାଧ୍ୟମ ପ୍ରତିନିଧି ସମ୍ମିଳନୀରେ ପ୍ରଦାନ କରିଛନ୍ତି। ନୂଆ ମାର୍ଗଦର୍ଶିକା ୩ ମାସ ମଧ୍ୟରେ ଲାଗୁ କରାଯିବାର ଯୋଜନା ହୋଇଛି। ଭାରତରେ ସୋସିଆଲ ମିଡ଼ିଆ କମ୍ପାନୀଙ୍କୁ କାରବାର ଲାଗି ସ୍ବାଗତ କରାଯାଉଛି। ସମାଲୋଚନା ପାଇଁ ସରକାର ପ୍ରସ୍ତୁତ। ତେବେ ଅଭିଯୋଗକୁ ମଧ୍ୟ ଗୁରୁତ୍ୱଦେବାର ଆବଶ୍ୟକତା ରହିଥିବା ରବିଶଙ୍କର ପ୍ରସାଦ କହିଛନ୍ତି। ଭାରତରେ ହ୍ବାଟସ୍ଆପ୍ର ୫୩ କୋଟି ୟୁଜର ଥିବାବେଳେ ଫେସବୁକ୍ ୟୁଜରଙ୍କ ସଂଖ୍ୟା ୪୦ କୋଟିରୁ ଅଧିକ ରହିଛି। ସେହିପରି ଟୁଇଟରରେ ଏକ କୋଟିରୁ ଅଧିକ ୟୁଜର ରହିଛନ୍ତି। ଦେଶରେ ସୋସିଆଲ୍ ମିଡ଼ିଆର ବ୍ୟବହାର ବଢୁଛି। ଏପରିସ୍ଥଳେ ଆପତ୍ତିଜନକ କଣ୍ଟେଟ୍ ନେଇ ସତର୍କ ରହିବାର ଆବଶ୍ୟକତା ରହିଛି ବୋଲି ରବିଶଙ୍କର କହିଛନ୍ତି। ସୋସିଆଲ ମିଡ଼ିଆ ଏବଂ ଓଟିଟି ପ୍ଲାଟଫର୍ମ ପାଇଁ ମାର୍ଗଦର୍ଶିକା ଜାରି ହେବା ନେଇ ପ୍ରକାଶ ଜାଭେଡ୍କର କହିଛନ୍ତି ଯେ, ଏବେ ଏସବୁ ଫ୍ଲାଟଫର୍ମକୁ ସେମାନଙ୍କର କାର୍ଯ୍ୟର ସୂଚନା ଦେବାକୁ ପଡ଼ିବ। ଏହା ସହିତ ସେଲ୍ଫ ରେଗୁଲେଶନ ମଧ୍ୟ ଲାଗୁ କରିବାକୁ ପଡ଼ିବ ବୋଲି ସେ ସୂଚନା ଦେଇଛନ୍ତି।