ଭାରତର କେତେକ ପ୍ରାନ୍ତରରେ ପେଟ୍ରୋଲ ଓ ଡିଜେଲ ଦର ଶତକ ଛୁଇଁଥିବା ବେଳେ ଓଡ଼ିଶା ସେହି ଦିଗରେ ମୁହଁାଇଛି। ଏହି ସମୟରେ ଏଲ୍ପିଜି ମୂଲ୍ୟ ୫୦ ଟଙ୍କା ବୃଦ୍ଧି ପାଇ ୧୪.୨ କିଲୋ ବିଶିଷ୍ଟ ରନ୍ଧନ ସିଲିଣ୍ଡର ୮୦୦ ଟଙ୍କା ହେବାକୁ ଯାଇଛି। ପେଟ୍ରୋଲିୟମ୍ଜାତ ପଦାର୍ଥ ମୂଲ୍ୟ ବଢ଼ୁଥିବାରୁ ଅତ୍ୟାବଶ୍ୟକ ସାମଗ୍ରୀ ବାଡ଼ବତା ମାନୁ ନାହିଁ। ସାଧାରଣ ଲୋକ ଅତିଷ୍ଠ ହୋଇପଡ଼ିଥିଲେ ମଧ୍ୟ ସେମାନଙ୍କ ଦୁଃଖ ବୁଝିବାକୁ ସରକାରୀ ବ୍ୟବସ୍ଥା କାମ ଦେଉନି। କେନ୍ଦ୍ର ସରକାର ସଫେଇ ଦେଉଛନ୍ତି ଯେ, ଏସବୁ ବଜାର ନିୟନ୍ତ୍ରିତ ହୋଇଯାଇଥିବାରୁ ମୂଲ୍ୟ ନିୟନ୍ତ୍ରଣ କରିବା ସମ୍ଭବ ହୋଇପାରୁ ନାହିଁ। ଏଭଳି ସ୍ଥଳେ ଓଡ଼ିଶା ପ୍ରଦେଶ କଂଗ୍ରେସ ତରଫରୁ ତେଲ ଦର ବିରୋଧରେ ୧୫ ଫେବୃୟାରୀରେ ରାଜ୍ୟବ୍ୟାପୀ ବନ୍ଦ ଡାକରା ଦିଆଯାଇଥିଲା। ଗତାନୁଗତିକ କଂଗ୍ରେସ ଢାଞ୍ଚାରେ ଗୁଣ୍ଡାମିର ଆଶଙ୍କା ଥିବା ବେଳେ ଏଥରକ କଂଗ୍ରେସ କର୍ମୀଙ୍କ ସହିତ ସାଧାରଣ ନାଗରିକଙ୍କ ସମର୍ଥନ ମିଳିଥିବାରୁ କୌଣସି ଅଘଟଣର ଖବର ମିଳିନାହିଁ। ତେଲ ଦର ବୃଦ୍ଧି କଷ୍ଟ କାହାରିକୁ ବାଦ୍ ପକାଉ ନାହିଁ। ସେଥିପାଇଁ, ସ୍ବଇଚ୍ଛାରେ, ସବୁ ଶ୍ରେଣୀ ଏବଂ ସବୁ ଦିଗରୁ ଏହି ବନ୍ଦକୁ ସମର୍ଥନ ମିଳିଥିବା କଥା ସ୍ବାଭାବିକ ମନେ ହେଉଛି। ଉଲ୍ଲେଖଯୋଗ୍ୟ ଯେ, ବିଶ୍ୱ ବଜାରରେ ତୈଳ ଦର ବୃଦ୍ଧି ଘଟୁ ନ ଥିବା ବେଳେ ଭାରତରେ ଏହାର ଲଗାତର ମୂଲ୍ୟବୃଦ୍ଧି ବ୍ୟସ୍ତ କଲାଣି। ହୁଏତ ‘ଧରିତ୍ରୀ’ ଏକମାତ୍ର ଖବରକାଗଜ, ଯିଏ ପେଟ୍ରୋଲ ଓ ଡିଜେଲ ଦରବୃଦ୍ଧିକୁ ପ୍ରଥମ ପୃଷ୍ଠାରେ ଦେଇଆସୁଛି। ଏହାର କାରଣ ହେଉଛି ଜନସାଧାରଣଙ୍କ ଜୀବନକୁ ଛୁଉଁଥିବା ପ୍ରତ୍ୟେକ ସରକାରୀ ନିଷ୍ପତ୍ତିକୁ ଲୋକେ ଜାଣିବା ଦରକାର। ଆଜିର ପରିସ୍ଥିତିରେ ଗଣମାଧ୍ୟମ ତାହାର ଏହି ଗୁରୁଦାୟିତ୍ୱକୁ ଭୁଲିଯାଉଛି।