ନୂଆଦିଲ୍ଲୀ: କରୋନା କାଳରେ ସାରା ଦେଶରେ ପେଟ୍ରୋଲ ଏବଂ ଡିଜେଲ ଦର ଆକାଶଛୁଆଁ ହୋଇଛି। ବୁଧବାର ନୂଆଦିଲ୍ଲୀରେ ତେଲ ଦର ୧୦୦ ଟଙ୍କା ଛୁଇଁଛି। ତେଲର ଏଭଳି ଅହେତୁକ ଦର ବୃଦ୍ଧିକୁ ନେଇ ବୁଧବାର ନେଟିଜେନ୍ସ ଟୁଇଟରେ ନିଜର ପ୍ରତିକ୍ରିୟା ରଖିଛନ୍ତି। ଟୁଇଟରରେ ହାସ୍ଟ୍ୟାଗ୍ ପେଟ୍ରୋଲ-ଡିଜେଲ ପ୍ରାଇସ ହାଇକ୍ ଏବଂ ହାସ୍ଟ୍ୟାଗ୍ ପେଟ୍ରୋଲ ୧୦୦ ନଟ୍ ଆଉଟ ଭଳି ଟ୍ରେଣ୍ଡ କରୁଥିବା ଦେଖାଯାଇଛି। ଲୋକମାନେ ତେଲ ଦର ବୃଦ୍ଧିକୁ ନେଇ ଅତିଷ୍ଠ ହୋଇ ରହିଥିବା ବେଳେ ଟୁଇଟରରେ ସେମାନଙ୍କ ରୋଷ ଦେଖାଉଛନ୍ତି। ସରକାରଙ୍କୁ ତାତ୍ସଲ୍ୟ ଏବଂ ଗାଳି କରୁଥିବା ଦେଖାଯାଇଛି।
ଏଥିଲାଗି ଲୋକମାନେ ନୂଆ ମିମ୍ସ ଏବଂ ଜୋକ ବ୍ୟବହାର କରୁଛନ୍ତି। ଲୋକେ ବାଇସାଇକେଲ ଛବି ପୋଷ୍ଟକରି ଲେଖିଛନ୍ତି, ତେଲ ଦର ବଢ଼ିବା ପରେ ଭାରତୀୟମାନେ କେବଳ ଏଭଳି ବାଇକ ଚଳାଇବାକୁ ସକ୍ଷମ ହେବେ। ଟୁଇଟରରେ ଏହାକୁ ‘ଦେଶୀ ବାଇକ ଆଫ୍ଟର ପେଟ୍ରୋଲ, ଡିଜେଲ ହାଇକ’ ହାସ୍ଟ୍ୟାଗ୍ରେ ପୋଷ୍ଟ କରାଯାଇଛି। ନରେନ୍ଦ୍ର ମୋଦିଙ୍କୁ ସମାଲୋଚନାକରି ଏକ ପୋଷ୍ଟରେ ଲେଖାଯାଇଛି, ‘କାଶ ବୋ ବୁରେ ଦିନ ହି ଓ୍ବାପସ ଆୟେ’( ସେହି ଖରାପ ଦିନ ପୁଣି ଫେରି ଆସୁ)। ଏଠାରେ ମୋଦିଙ୍କ ୨୦୧୪ ନିର୍ବାଚନ ସମୟର ଏକ ଫଟୋ ପୋଷ୍ଟ କରାଯାଇଛି, ଯେଉଁଥିରେ ଲେଖାଅଛି, ‘ଅଚ୍ଛେ ଦିନ୍ ଆଏଙ୍ଗେ’ (ଭଲ ଦିନ ଆସିବ)। ମାତ୍ର ଲୋକମାନେ ଦର ବୃଦ୍ଧି ସହୁଥିବାରୁ ସେମାନଙ୍କ ଅସନ୍ତୋଷ ଏଭଳି ଉପାୟରେ ଦେଖାଉଛନ୍ତି।
ଟୁଇଟରେ ୧୯୬୩ର ପେଟ୍ରୋଲ ବିଲ୍ ଉପରେ ଏକ ଫଟୋ ପୋଷ୍ଟ ହୋଇଛି, ଯେଉଁଠାରେ ତେଲ ଦର ଲିଟର ପିଛା ୭୨ ପଇସା ରହିଛି। ଏହା ବେଶି ଟ୍ରେଣ୍ଡ କରୁଥିବା ଦେଖାଯାଇଛି। ଏଥିରେ ଲୋକମାନେ ରିପ୍ଲାଇ କରି କହିଛନ୍ତି, ‘ଯଦି ଟାଇମ ମେଶିନ ଥାନ୍ତା ତେବେ ସେହି ସମୟକୁ ଯାଇ ପେଟ୍ରୋଲ ଭରି ଆସିବା ସହଜ ହୋଇଥାନ୍ତା’। ଉଲ୍ଲେଖଯୋଗ୍ୟ, ବୁଧବାର ପେଟ୍ରୋଲ ୩୫ ପଇସା ଏବଂ ଡିଜେଲ ୨୩ ପଇସା ବଢ଼ିଛି। ନୂଆଦିଲ୍ଲୀ ଶେଷ ମେଟ୍ରୋ ସହର ଥିଲା ଯେଉଁଠାରେ ତେଲ ଦର ବର୍ତ୍ତମାନ ୧୦୦ ଛୁଇଁଛି। ମୁମ୍ବାଇ, ଚେନ୍ନାଇ, ହାଇଦ୍ରାବାଦ ଏବଂ ପୁଣେ ଭଳି ସ୍ଥାନରେ ତେଲ ଦର ପୂର୍ବରୁ ଶତକ ମାରିଛି। କୋଲକାତାରେ ମଧ୍ୟ ଦର ୧୦୦ ଛୁଇଁଛି। ଅନ୍ୟ ଜଣେ ୟୁଜର ଲେଖିଛନ୍ତି, ତେଲ ଦରରେ ଷ୍ଟପେଜ ନାହିଁ। ପ୍ରତି ସକାଳେ ଉଠିଲେ ଏହି ଖବର। ଯେଭଳି ଆଉ କିଛି ଖବର ହିଁ ନାହିଁ। କେବଳ ନିର୍ବାଚନ ହିଁ ସାଧାରଣ ଲୋକଙ୍କୁ ଏଭଳି ସମସ୍ୟାରୁ ବଞ୍ଚାଇପାରିବ। ଅନ୍ୟ ଏକ ପୋଷ୍ଟରେ ଏମିତି କିଛି ଲେଖା ଅଛି, ପେଟ୍ରୋଲ ଡିଜେଲ ୧୦୦ ଛୁଇଁଥିବା ବେଳେ ମୋଦି କ୍ୟାବିନେଟ ସମ୍ପ୍ରସାରଣ କରୁଛନ୍ତି। ଏହା ମୋଦିଙ୍କ ମାଷ୍ଟରଷ୍ଟ୍ରୋକ। ଅନ୍ୟ ଜଣେ ୟୁଜର ଲେଖିଛନ୍ତି, ଦର ଦାମରୁ ଲୋକଙ୍କୁ ବର୍ତ୍ତମାନ ତ୍ରାହି ମିଳୁନି। ଏଭଳି ସ୍ଥିତିରେ ସରକାର ତେଲ ଦର ୧୦୦ ଟଙ୍କା କରିଛନ୍ତି। ଏଭଳି ପୋଷ୍ଟକୁ ଦେଖିଲେ ତେଲ ଦର ବୃଦ୍ଧିକୁ ନେଇ ଲୋକଙ୍କ ମଧ୍ୟରେ ହତାଶା ସ୍ପଷ୍ଟ ଭାବେ ବାରି ହୋଇପଡୁଛି। ଅଙ୍କିତ ଗୌତମ(୨୮) ନାମକ ଜଣେ ୟୁଜର କହିଛନ୍ତି, ତେଲ ଦର ବଢ଼ିବାରୁ ପୂର୍ବାପେକ୍ଷା ତାଙ୍କୁ ୩୦% ଅଧିକ ଖର୍ଚ୍ଚ କରିବାକୁ ପଡୁଛି। ଅତି ଦରକାର ନ ହେଲେ କାରକୁ ବର୍ତ୍ତମାନ ନା କହିବାକୁ ପଡ଼ୁଛି।