ନୂଆଦିଲ୍ଲୀ,୬।୯: ପେଟ୍ରୋଲିୟମ ରପ୍ତାନି ରାଷ୍ଟ୍ର ସଂଘ (ଓପେକ୍) ଏବଂ ଏହାର ସହଯୋଗୀ ତୈଳ ଉତ୍ପାଦନ ହ୍ରାସ କରିବାକୁ ନିଷ୍ପତ୍ତି ନେବା ପରେ ସୋମବାର ଅନ୍ତର୍ଜାତୀୟ ବଜାରରେ ଅଶୋଧିତ ତେଲ ଦର ୩ ପ୍ରତିଶତରୁ ଅଧିକ ବୃଦ୍ଧି ପାଇଛି। ଏହାର ପ୍ରଭାବରେ ଭାରତରେ ପେଟ୍ରୋଲ ଓ ଡିଜେ ଦର ବଢ଼ିବା ସମ୍ଭାବନା ସୃଷ୍ଟି ହୋଇଛି। ଓପେକ୍ ଦୈନିକ ଲକ୍ଷେ ବ୍ୟାରେଲ୍ ତୈଳ ଉତ୍ପାଦନ ହ୍ରାସ କରିବାକୁ ନିଷ୍ପତ୍ତି ନେଇଛି। ଅକ୍ଟୋବର ୫ରେ ବୈଠକରେ ପରବର୍ତ୍ତୀ ନିଷ୍ପତ୍ତି ନିଆଯିବ। ବ୍ରେଣ୍ଟ କ୍ରୁଡ୍ ଫ୍ୟୁଚର୍ସ ୩.୪୩ ଡଲାର ବୃଦ୍ଧି ପାଇ ୯୬.୪୫ ଡଲାର ହୋଇଛି। ସେହିପରି ଆମେରିକା ଓ୍ବେଷ୍ଟ ଟେକ୍ସାସ ଇଣ୍ଟରମିଡିଏଟ୍ କ୍ରୁଡ୍ ୨.୯୪ ଡଲାର ଅର୍ଥାତ୍ ୩.୪ ପ୍ରତିଶତ ବୃଦ୍ଧି ପାଇ ୮୯.୮୭ ଡଲାର ହୋଇଥିବା ଜଣାପଡ଼ିଛି। ମାନ୍ଦାବସ୍ଥା ଆଶଙ୍କାରେ ଅଶୋଧିକ ତୈଳ ହ୍ରାସ ପାଇଥିବାରୁ ଉତ୍ପାଦନକାରୀ ରାଷ୍ଟ୍ର ଅସନ୍ତୁଷ୍ଟ ଥିଲେ। ବର୍ଷେରୁ ଊର୍ଦ୍ଧ୍ୱ ସମୟ ପରେ ରୁଷିଆ ସମେତ ଓପେକ୍ ରାଷ୍ଟ୍ର ତୈଳ ଉତ୍ପାଦନ କମାଇବାକୁ ନିଷ୍ପତ୍ତି ନେଇଛନ୍ତି। ଯେକୌଣସି ସମୟରେ ତୈଳ ଉତ୍ପାଦନ ହ୍ରାସ ପାଇଁ ନିଷ୍ପତ୍ତି ହୋଇପାରେ ବୋଲି ଗତ ମାସରେ ସାଉଦି ଆରବ ଶକ୍ତି ମନ୍ତ୍ରୀ ସୂଚନା ଦେଇଥିଲେ।