ଖାଦ୍ୟରେ ଓମେଗା-୩ ତେଲର ଅଭାବ ଜଣେ ବ୍ୟକ୍ତିର ଆୟୁଷକୁ କମ କରିପାରେ। ସିଗାରେଟ ଟାଣିବାଠାରୁ ମଧ୍ୟ ଏହା ଅଧିକ ବିପଜ୍ଜନକ ହୋଇପାରେ। ଏକ ନୂତନ ଅଧ୍ୟୟନରେ ଏହା ଦାବି କରାଯାଇଛି। ମାଛକୁ ଓମେଗା -୩ର ଏକ ଭଲ ଉତ୍ସ ଭାବରେ ବିବେଚନା କରାଯାଏ। ବିଶେଷଜ୍ଞମାନେ ପରାମର୍ଶ ଦେଇଛନ୍ତି ଯେ, ଲୋକମାନେ ନିୟମିତ ଭାବରେ ସେମାନଙ୍କ ଖାଦ୍ୟରେ ଓମେଗା-୩ ଅନ୍ତର୍ଭୁକ୍ତ କରିବା ଉଚିତ୍। ଏହି ଅଧ୍ୟୟନରେ, ଅନୁସନ୍ଧାନକାରୀମାନେ ଜାଣିବାକୁ ପାଇଛନ୍ତି ଯେ ଧୂମପାନ ଦ୍ୱାରା ଜଣେ ବ୍ୟକ୍ତିର ସମ୍ଭାବ୍ୟ ଆୟୁ ଚାରି ବର୍ଷ ପର୍ଯ୍ୟନ୍ତ ହ୍ରାସ ହୋଇପାରେ। କିନ୍ତୁ ତେଲିଆ ମାଛରେ ମିଳୁଥିବା ଫ୍ୟାଟି ଏସିଡର ଅଭାବ ଜଣେ ବ୍ୟକ୍ତିର ଆୟୁଷକୁ ପାଞ୍ଚ ବର୍ଷ ପର୍ଯ୍ୟନ୍ତ ହ୍ରାସ କରିପାରେ। ମାଛ ତେଲ ହାର୍ଟ ପାଇଁ ବହୁତ ଭଲ ବୋଲି ବିବେଚନା କରାଯାଏ। ଏହା ରକ୍ତ ଜମାଟ ବାନ୍ଧିବା ସମସ୍ୟାରୁ ମଧ୍ୟ ମୁକ୍ତି ଦେଇଥାଏ। ବିଶେଷଜ୍ଞମାନେ କହିଛନ୍ତି ଯେ ଖାଦ୍ୟରେ ୮ ପ୍ରତିଶତ କିମ୍ବା ଅଧିକ ଓମେଗା- ୩ ସ୍ବାସ୍ଥ୍ୟ ପାଇଁ ଭଲ। ଏହାର ସୂଚକାଙ୍କ ସ୍ତର ଚାରିରୁ କମ ହେବା ଉଚିତ୍ ନୁହେଁ। କାନାଡାର ଗୁଏଲଫ ୟୁନିଭରସିଟିର ଅଧ୍ୟୟନର ମୁଖ୍ୟ ଗବେଷକ ଡକ୍ଟର ମାଇକେଲ ମ୍ୟାକବର୍ନିଙ୍କ ଅନୁଯାୟୀ ଜାପାନର ଓମେଗା -୩ ସୂଚକାଙ୍କ ୮ ପ୍ରତିଶତରୁ ଅଧିକ। ବୋଧହୁଏ ଏହି କାରଣରୁ ଆମେରିକାରେ ରହୁଥିବା ଲୋକଙ୍କ ତୁଳନାରେ ଏହି ଦେଶର ଲୋକଙ୍କ ଆୟୁ ପାଞ୍ଚ ବର୍ଷ ଅଧିକ। ଏହି ଅଧ୍ୟୟନ ‘ଆମେରିକୀୟ ଜର୍ନାଲ ଅଫ କ୍ଲିନିକାଲ ନ୍ୟୁଟ୍ରିସନ୍’ରେ ପ୍ରକାଶିତ ହୋଇଛି।
ବି-ଦ୍ର: ସିଗାରେଟ୍ ଟାଣିବା ସ୍ବାସ୍ଥ୍ୟ ପ୍ରତି ହାନିକାରକ