ଭୁବନେଶ୍ୱର, ୧୫।୩(ବ୍ୟୁରୋ): ଓଡ଼ିଶାର ବିଭିନ୍ନ ସରକାରୀ ଓ ଘରୋଇ ବୈଷୟିକ ଶିକ୍ଷାନୁଷ୍ଠାନରେ ଇଞ୍ଜିନିୟରିଂ, ମ୍ୟାନେଜମେଣ୍ଟ, ବି-ଫାର୍ମ ଓ ଏମ୍-ଫାର୍ମ ପାଠ୍ୟକ୍ରମରେ ନାମ ଲେଖା ପାଇଁ ଉଦ୍ଦିଷ୍ଟ ଓଡ଼ିଶା ଯୁଗ୍ମ ପ୍ରବେଶିକା ପରୀକ୍ଷା-୨୦୨୨ (ଓଜେଇଇ) ଜୁନ୍ ପ୍ରଥମ କିମ୍ବା ଦ୍ୱିତୀୟ ସପ୍ତାହରେ ଅନୁଷ୍ଠିତ ହେବ। ଏ ନେଇ ଓଜେଇଇ ପକ୍ଷରୁ ସୂଚନା ଦିଆଯାଇଛି। ଏହି ପରୀକ୍ଷା କମ୍ପ୍ୟୁଟରଭିତ୍ତିକ ହେବ। ଏଥିପାଇଁ ୧୪ରୁ ଅନ୍ଲାଇନ ଆବେଦନ ଆରମ୍ଭ ହୋଇଥିବାବେଳେ ଏପ୍ରିଲ ୧୩ ତାରିଖ ପର୍ଯ୍ୟନ୍ତ ଚାଲିବ। ପରୀକ୍ଷା ଦେବାକୁ ଆଗ୍ରହୀ ଛାତ୍ରୀଛାତ୍ର ଓଜେଇଇ ଓ୍ବେବ୍ସାଇଟ୍ www.ojee.nic.inରେ ଆବେଦନ କରିପାରିବେ। ଏଠାରେ ଉଲ୍ଲେଖଯୋଗ୍ୟ, ସରକାରୀ ନିୟମ ଅନୁସାରେ ରାଜ୍ୟ ବାହାରର ଛାତ୍ରୀଛାତ୍ର ଓଡ଼ିଶାର ସରକାରୀ କଲେଜଗୁଡ଼ିକରେ ନାମ ଲେଖାଇପାରିବେ ନାହିଁ। କିନ୍ତୁ ସେମାନେ ଘରୋଇ କଲେଜଗୁଡ଼ିକରେ ନାମ ଲେଖାଇପାରିବେ।