ସମ୍ବଲପୁର,୧୪।୧(ବ୍ୟୁରୋ): ପଶ୍ଚିମ ଓଡ଼ିଶାରେ ହାଇକୋର୍ଟ ସ୍ଥାୟୀ ବେଞ୍ଚ ଦାବି ନେଇ ଆନ୍ଦୋଳନ ସମୟରେ କୋର୍ଟ ପରିସରରେ ଭଙ୍ଗାରୁଜା ସହ ବିଚାରପତିମାନଙ୍କୁ ବାହାର କରିଦେବା ଭଳି ଘଟଣା ଘଟିଥିଲା। ଘଟଣାରେ ୩୦ ଓକିଲଙ୍କ ସମେତ ୮ କିନ୍ନର ଓ ଜଣେ ସାଧାରଣ ଲୋକ ଦୀର୍ଘ ଏକମାସ ହେବ ଜେଲରେ ଅଛନ୍ତି। ଏମାନଙ୍କୁ ଭେଟିବା ସହ ସ୍ଥିତି ପରଖିବା ପାଇଁ ଅଲ ଓଡ଼ିଶା ଓକିଲ ସଂଘ (ଓଲା)ର ଏକ ପ୍ରତିନିଧି ଦଳ ଶୁକ୍ରବାର ସମ୍ବଲପୁର ଗସ୍ତରେ ଆସିଥିଲେ। ସେମାନେ ଜେଲ ଭିତରେ ଗିରଫ ଓକିଲମାନଙ୍କ ସହ ଆଲୋଚନା କରିଥିଲେ। ପରେ ଜିଲାପାଳ ଅନନ୍ୟା ଦାସ, ଉତ୍ତରାଞ୍ଚଳ ପୋଲିସ ଆଇଜି ଡ. ଦିପକ କୁମାର ଓ ଜିଲା ଓକିଲ ସଂଘ ସଦସ୍ୟଙ୍କୁ ଭେଟିଥିଲେ।
ଗଣମାଧ୍ୟମକୁ ସୂଚନା ଦେଇ ସେମାନେ କହିଥିଲେ, ଜେଲ ଭିିତରେ ଗିରଫ ଓକିଲମାନଙ୍କ ସହ ଆଲୋଚନା ହୋଇଥିଲା। ପରେ ଜିଲାପାଳ ଓ ଆଇଜିଙ୍କୁ ଭେଟି ଘଟଣା ଜାଣିବା ପରେ ସହଯୋଗ କରିବା ଦିଗରେ ଆଲୋଚନା କରାଯାଇଥିଲା। ଓକିଲ ସଂଘ ସଦସ୍ୟମାନଙ୍କ ସହ ଆଲୋଚନା କରି କୋର୍ଟ କାର୍ଯ୍ୟ ଚାଲିବା ଉପରେ କଥାବାର୍ତ୍ତା ହୋଇଥିଲା। କୋର୍ଟ କାର୍ଯ୍ୟ ଏବେ ସ୍ବାଭାବିକ ଭାବେ ଚାଲିଥିବା ଦେଖିବାକୁ ମିଳିଥିଲା। ହାଇକୋର୍ଟରେ ଗିରଫମାନଙ୍କ ଜାମିନ ପାଇଁ ଆବେଦନ କରାଯାଇଛି। ଶୁଣାଣି ପାଇଁ ଦିନ ଧାର୍ଯ୍ୟ ହୋଇ ନାହିଁ। ଜାମିନ ମିଳିଯିବ ବୋଲି ଆଶା ରହିଛି। ସୁପ୍ରିମକୋର୍ଟରେ ମଧ୍ୟ ପକ୍ଷ ରଖାଯାଇଛି। ରାଜ୍ୟ ବାର୍ କାଉନ୍ସିଲ ଅଧ୍ୟକ୍ଷ ନିର୍ବାଚିତ ନ ହେବାରୁ ଏଭଳି ସମସ୍ୟା ହୋଇଥିଲ। ପଶ୍ଚିମ ଓଡ଼ିିଶାରେ ହାଇକୋର୍ଟ ସ୍ଥାୟୀ ବେଞ୍ଚ ଆନ୍ଦୋଳନ ବହୁବର୍ଷର। କେବେ ଏଭଳି ହୋଇ ନ ଥିଲା। ଡିସେମ୍ବର ୧୨ରେ ଘଟିଥିବା ଘଟଣା ଏକ ଦୁର୍ଘଟଣା। ଓକିଲମାନଙ୍କ ସମସ୍ୟା ବାର୍ କାଉନସିଲରେ ଆଲୋଚନା ହୋଇଥାଏ। କିଭଳି ସମସ୍ୟାର ସମାଧାନ କରାଯିବ କାଉନସିଲ ସଦସ୍ୟମାନେ ପରାମର୍ଶ ଦେଇଥାନ୍ତି। ହେଲେ ହାଇକୋର୍ଟ ବେଞ୍ଚ ଆନ୍ଦୋଳନ ସମୟରେ କାଉନସିଲ ନ ଥିବାରୁ ପଶ୍ଚିମ ଓଡ଼ିଶା ସମେତ ଅନ୍ୟ ବାର୍ ସଦସ୍ୟମାନେ ଏତେ ବଡ ସମସ୍ୟାର ସମ୍ମୁଖୀନ ହୋଇଛନ୍ତି। ତେଣୁ ଶୀଘ୍ର ବାର୍ କାଉନସିଲ ନିର୍ବାଚନ କରାଯାଉ ବୋଲି ସେ ଦାବି କରିଥିଲେ। ପ୍ରତିନିଧି ଦଳରେ ଅଧ୍ୟକ୍ଷ ଜ୍ଞାନରଞ୍ଜନ ମହାନ୍ତି, ବୀରେନ୍ଦ୍ର ପଟ୍ଟନାୟକ, ସଞ୍ଜିତ କୁମାର ପାଣିଗ୍ରାହୀ, ସୁବାସ ମିଶ୍ର, ଭୂପେଶ ପ୍ରଧାନ, ଭିଷ୍ମଦେବ ସରାଫ, ଦିଲୀପ ଦାଶ, ମନୋରଞ୍ଜନ ମହାନ୍ତି, ଦିଲୀପ କୁମାର ସାହୁଙ୍କ ସମେତ ବିଭିନ୍ନ ଜିଲାର ଓକିଲ ସଂଘର ସଦସ୍ୟମାନେ ସାମିଲ ଥିଲେ।