ଭୁବନେଶ୍ୱର,୧୮ା୧୨(ବ୍ୟୁରୋ): ରାଜ୍ୟ ସରକାର ସବୁ ଜିଲାରେ ପୁରୁଣା ବୃଦ୍ଧାଶ୍ରମରେ ଭିତ୍ତିଭୂମି ସୁଦୃଢ଼ କରିବା ସହ ନୂଆ ବୃଦ୍ଧାଶ୍ରମ ଖୋଲିବା ପାଇଁ ନିଷ୍ପତ୍ତି ନେଇଛନ୍ତି। ଏହି ମର୍ମରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗ (ଏସ୍ଏସ୍ଇପିଡି) ପକ୍ଷରୁ ସମସ୍ତ ଜିଲାପାଳଙ୍କଠାରୁ ନୂଆ ଏବଂ ପୁରୁଣା ବୃଦ୍ଧାଶ୍ରମ ସମ୍ପର୍କରେ ପ୍ରସ୍ତାବ ମଗାଯାଇଛିି। ରାଜ୍ୟରେ ଭାରତ ସରକାରଙ୍କ ଅଟଳ ବୟୋ ଅଭ୍ୟୁଦୟ ଯୋଜନା (ଅଭୟ) ଅଧୀନରେ ସମୁଦାୟ ୯୧ଟି ବୃଦ୍ଧାଶ୍ରମ ଚାଲୁଛି। ସେହିପରି ଏସ୍ଏସ୍ଇପିଡି ବିଭାଗ ପକ୍ଷରୁ ମଧ୍ୟ କିଛି ଜିଲାରେ ବୃଦ୍ଧାଶ୍ରମ ଖୋଲାଯାଇଛି। ସରକାରଙ୍କ ପକ୍ଷରୁ ଏଗୁଡ଼ିକୁ ବେସରକାରୀ ଅନୁଷ୍ଠାନ ପରିଚାଳନା କରୁଛନ୍ତି। ପରିଚାଳନା ବାବଦରେ ବାର୍ଷିକ ପ୍ରାୟ ୭୦ ଲକ୍ଷ ଟଙ୍କାର ଅନୁଦାନ ପ୍ରଦାନ କରାଯାଉଛି। ଇତିମଧ୍ୟରେ ବୃଦ୍ଧାଶ୍ରମର ଆବଶ୍ୟକତା ବୃଦ୍ଧି ପାଇଛି। ଏହି ପରିପ୍ରେକ୍ଷୀରେ ବିଭାଗ ପକ୍ଷରୁ ନୂଆ ବୃଦ୍ଧାଶ୍ରମ ପ୍ରତିଷ୍ଠା ପାଇଁ ଜିଲାପାଳମାନଙ୍କ ଠାରୁ ପ୍ରସ୍ତାବ ଆହ୍ବାନ କରାଯାଇଛି। ଏଥିସହ କାର୍ଯ୍ୟକ୍ଷମ ଥିବା ବୃଦ୍ଧାଶ୍ରମ ପାଇଁ ଅଧିକ ଅର୍ଥ ବ୍ୟୟ କରିବା ପାଇଁ ନିଷ୍ପତ୍ତି ହୋଇଛି। ଏସ୍ଏସ୍ଇପିଡି ବିଭାଗର ଅନୁସଚିବ ସତ୍ୟବ୍ରତ ସାମଲ ସବୁ ଜିଲାର ଜିଲାପାଳମାନଙ୍କୁ ପତ୍ର ଲେଖି କହିଛନ୍ତି ଯେ ଅନୁଦାନ ପାଇବା ପାଇଁ ସରକାରଙ୍କୁ ଯେଉଁ ପ୍ରସ୍ତାବ ପଠାଯିବ ତାହା ଜିଲାସ୍ତରରେ ଭଲ ଭାବେ ଯାଞ୍ଚ କରାଯିବା ସହିତ ଜିଲାସ୍ତରୀୟ ପ୍ରକଳ୍ପ ପରିଯୋଜନା କମିଟି (ଡିଏଲ୍ପିଏସି)ର ଅନୁମୋଦନ ଲାଭ କରିବା ଆବଶ୍ୟକ। ଡିସେମ୍ବର ୨୨ ତାରିଖ ସୁଦ୍ଧା ଇ-ଅନୁଦାନ ପୋର୍ଟାଲ ମାଧ୍ୟମରେ ବୃଦ୍ଧାଶ୍ରମ ସମ୍ପର୍କିତ ପ୍ରସ୍ତାବ ଦାଖଲ କରିବା ପାଇଁ ଜିଲାପାଳମାନଙ୍କୁ କୁହାଯାଇଛି। ୨୦୨୬ ସୁଦ୍ଧା ରାଜ୍ୟରେ ବୃଦ୍ଧବ୍ୟକ୍ତିଙ୍କ ସଂଖ୍ୟା ୬୩ ଲକ୍ଷରେ ପହଞ୍ଚିବ ବୋଲି ଆକଳନ କରାଯାଇଛି।
