ନୂଆପଡ଼ା ଅଫିସ,୨୯।୧୦ ନୂଆପଡା ସଦର ବ୍ଲକ ଧରମବନ୍ଧା ଥାନା ଅଧୀନ ପାରେଗାଁର ବୃଦ୍ଧ କାନ୍ତା କେଉଟ ହତ୍ୟା ଘଟଣାର ପର୍ଦ୍ଦାଫାଶ କରିଛି ପୋଲିସ। ହତ୍ୟାକାଣ୍ଡରେ ସମ୍ପୃକ୍ତ ଦେଓସିଂ କେଉଟ (୨୬)ଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି। ଏହା ଗୁଣିଗାରେଡି ସନ୍ଦେହରେ ହତ୍ୟା ବୋଲି ନୂଆପଡା ଉପଖଣ୍ଡୀୟ ପୋଲିସ ଅଧିକାରୀ ପ୍ରଶାନ୍ତ କୁମାର ପଟ୍ଟନାୟକ ଶୁକ୍ରବାର ଏକ ଖବରଦାତା ସମ୍ମିଳନିରେ ସୂଚନା ଦେଇଛନ୍ତି। ସୂଚନା ଅନୁସାରେ ଗତ ୨୩ ତାରିଖ ପୂର୍ବାହ୍ନ ପ୍ରାୟ ୧୦ଟାରେ ପାରେଗାଁର (ସେଠଜାମପାନି) ଗାଁର ମନୋଜ କେଉଟ ତାଙ୍କ ବାପା କାନ୍ତା କେଉଟ ନିଜ ଜମିକୁ ମାଛ ଧରିବାକୁ ଯାଇ ଫେରି ନ ଥିବା ଧରମବନ୍ଧା ଥାନାରେ ଅଭିଯୋଗ କରିଥିଲେ। ଧରମବନ୍ଧା ଥାନାଧିକାରୀ ଗେନ୍ଦରାମ ସତନାମୀଙ୍କ ନେତୃତ୍ୱରେ ଏକ ପୋଲିସ ଦଳ ଘଟଣାସ୍ଥଳରୁ ମତଦେହ ଜବତ କରିଥିଲା। ଏହା ଏକ ସୁପରିକଳ୍ପିତ ହତ୍ୟା ବୋଲି ଅଭିଯୋଗ ପରେ ସନ୍ଧାନି କୁକୁର ସହ ସାଇଣ୍ଟିଫିକ୍ ଟିମ୍ ଦ୍ୱାରା ତଦନ୍ତ ଆରମ୍ଭ କରିଥିଲା। ଏସ୍ଡିପିଓ ପଟ୍ଟନାୟକଙ୍କ ନେତୃତ୍ୱରେ ଜୋଙ୍କ ଥାନା ଅଧିକାରୀ କୈଳାସ ଚନ୍ଦ୍ର ସେଠୀ, ଧରମବନ୍ଧା ଥାନା ଅଧିକାରୀ ଗେନ୍ଦରାମ ସତନାମୀ, ଲଖନା ଥାନା ଅଧିକାରୀ ଗୁରୁଦେବ କର୍ମୀଙ୍କୁ ନେଇ ଏକ ସ୍ବତନ୍ତ୍ର ତଦନ୍ତକାରୀ ଦଳ ଗଠନ କରି ତଦନ୍ତ ଜାରି ରହିଥିଲା। ଉକ୍ତ ଗାଁର ଦେଓସିଂଙ୍କ ଉପରେ ସନ୍ଦେହ ହେବାରୁ ତାଙ୍କୁ ଥାନାକୁ ଆଣି ପଚାରାଉଚରା କରିବାରେ ସେ ହତ୍ୟା କରିଛି ବୋଲି ସ୍ବୀକାର କରିବା ସହ ହତ୍ୟାରେ ବ୍ୟବହୁତ ଛୁରି ମଧ୍ୟ ଦେଖାଇଥିଲେ। ଗତ ୫ ବର୍ଷ ତଳେ ଦେଓସିଂଙ୍କ ବଡଭାଇ ପରମାନନ୍ଦଙ୍କ ମୃତ୍ୟୁ ହୋଇଥିବା ବେଳେ ଗତ ୧୮ରେ ଦେଓସିଂଙ୍କ ସ୍ତ୍ରୀ କମଳାଙ୍କ ମୃତ୍ୟୁ ହୋଇଥିଲା। ୨୨ରେ ଦେଓସିଂ ଶୋଇଥିବା ବେଳେ କିଏ ତାଙ୍କ ତଣ୍ଡିକୁ ଚାପି ଦେଉଥିବା ସେ ଅନୁଭବ କରିଥିଲେ। ଏସବୁ ଘଟଣାକୁ ନେଇ ଦେଓସିଂ ମନରେ ସଦେହ ଜାତ ହୋଇଥିଲା ଯେ କାନ୍ତା କେଉଟ ଗୁଣି ଗାରେଡି କରି ଆମ ପରବାରକୁ ଧ୍ୱଂସ କରୁଛି ବୋଲି ପ୍ରତିଶୋଧ ପରାୟଣ ହୋଇଥିଲେ। ୨୩ ତାରିଖ ସକାଳୁ ଏକ ଛୁର ନେଇ ଜମିକୁ ଯାଇଥିଲେ। କାନ୍ତା ମାଛ ଧରିବା ସମୟରେ ପଛପଟୁ ଛୁରିରେ ଗଳା କାଟି ଦେଇଥିଲେ। ଏ ନେଇ ଧରମବନ୍ଧା ଥାନାରେ ଧାରା ୩୦୨ରେ ଏକ ମାମଲା (ନଂ.୬୭/୨୨) ରୁଜୁ କରି ଅଭିଯୁକ୍ତଙ୍କୁ କୋର୍ଟ ଚାଳାଣ କରାଯାଇଛି।