ନୟାଗଡ଼ ଅଫିସ,୨୭।୩: ନୟାଗଡ଼ ସହରର ତ୍ରିନାଥ ଛକରେ ଆମ ପାଇଁ ବଡ଼ ଆମ ନୟାଗଡ଼ ସେଲଫି ପଏଣ୍ଟ ରବିବାର ଲୋକାର୍ପିିତ ହେବା ପରେ ସେଲଫି ନେବାକୁ ଭିଡ଼ ହୋଇଥିଲା। ତେବେ ସେଲଫି ପଏଣ୍ଟକୁ ଲାଗି ରହିଥିବା ଗାନ୍ଧୀଙ୍କର ପୁରୁଣା ମୂର୍ତ୍ତି ହଟିଯାଇଛି। ସେଲଫି ପଏଣ୍ଟ ଭିତରେ ବ୍ରୋଞ୍ଚର ନୂଆ ଗାନ୍ଧି ମୂର୍ତ୍ତି ଉଦ୍ଘାଟିତ ହୋଇଛି। ପୂର୍ବରୁ ଯାହା ଅନୁମାନ କରାଯାଉଥିଲା ତାହା ହିଁ ସତ୍ୟରେ ପରିଣତ୍ ହୋଇଛି। ତେବେ ସେଲଫି ପଏଣ୍ଟ ଭିତରେ ପୁରୁଣା ଗାନ୍ଧୀ ମୂର୍ତ୍ତିର ଉଦ୍ଘାଟକମାନଙ୍କର ନାଁ ଯଥା ପୂର୍ବତନ ବିଧାୟକ ସୀତାକାନ୍ତ ମିଶ୍ରଙ୍କ ନାଁ ରହିଥିବା ନାମ ଫଳକ ରହିଛି। ନାମଫଳକଟି ନୂଆକରି ରଖାଯାଇଛି।
କାଦୁଅ ପଚପଚରେ ଉଦ୍ଘାଟନ
ନୟାଗଡ଼ ନାଉଖାଲ ୨୧ ନଂ. ରାଜ୍ୟ ରାଜପଥ କଡ଼ରେ ଉଦ୍ଘାଟିତ ହୋଇଛି ସେଲଫି ପଏଣ୍ଟ। ସେଲଫି ପଏଣ୍ଟ ସମ୍ମୁଖ ରାଜପଥ ଓ ଏହାର ପାର୍ଶ୍ୱ କାଦୁଅ ପଚ ପଛ ହୋଇ ରହିଥିଲା। ମ୍ୟୁନିସିପାଲିଟିର ଜଣେ ସଫେଇ କର୍ମଚାରୀ ସେଲଫି ପଏଣ୍ଟ ସମ୍ମୁଖରେ ଜମା ହୋଇଥିବା ପାଣିକୁ ଖାଲି କରିଥିଲେ ହେଁ ପୁଣି ପାଣି ଜମା ହୋଇ ଯାଇଥିଲା। ଅନ୍ୟପକ୍ଷେ ସେଲଫି ପଏଣ୍ଟ ନିଟକରେ ରମ୍ବଲସ ୪ଟି କରାଯାଇଥିବାବେଳେ ଏହା ହମ୍ପସ ପରି ହେଉଥିବାରୁ ଚଳାଚଳ ବେଳେ ଯାନବାହାନ ଚକର ପାଣି କାଦୁଅ ଅଧିକ ଅସୁବିଧା ସୃଷ୍ଟି କରିଥିଲା। ଉଦ୍ଘାଟନ ସମୟରେ ବର୍ଷା ବାଧକ ସାଜିଥିବା କୁହାଯାଇଥିଲା।
ବାଘୁଆ ନୟାଗଡ଼ର
ସ୍ମୃତି ରହିଲାନି
ଆମ ପାଇଁ ବଡ଼ ଆମ ନୟାଗଡ଼ ସେଲଫି ପଏଣ୍ଟ ପରିସରରେ ବାଘୁଆ ନୟାଗଡ଼ର ସ୍ମୃତି ରହି ନ ଥିବାରୁ କେତେଜଣ ଲୋକ ଅସନ୍ତୋଷ ବ୍ୟକ୍ତ କରିଛନ୍ତି। ଆମ ପାଇଁ ବଡ଼ ଆମ ନୟାଗଡ଼ ଲେଖାଥିବା ସେଲଫି ପଏଣ୍ଟ ପଛ ପାଖରେ ଜଳ ଫୁଆରା ରହିଛି। ଏଠାରେ ଜଳ ଉପରକୁ ଉଠି ପୁଣି ତଳକୁ ଖସି ରାତିର ସୌନ୍ଦର୍ଯ୍ୟକୁ ଦ୍ୱିଗୁଣିତ କରୁଛି। ପଛା ପାଖରେ ଏକ ପ୍ରାଚୀର ପରି କରାଯାଇ ପାହାଡ଼ ସଦୃଶ ସୌନ୍ଦର୍ଯ୍ୟକରଣ କରାଯାଇଛି। ଏହି ପ୍ରାଚୀର ଉପରେ ଏକ ବାଘ ମୂର୍ତ୍ତିଟିଏ ରଖିଥିଲେ ଜିଲାର ସ୍ମୃତିକୁ ମନେ ପକାଇଥାନ୍ତା ବୋଲି କୁହାଯାଉଛି।
୧୦ ମିନଟ୍ର ରାସ୍ତାକୁ
୪୦ ମିନିଟ୍
ନୟାଗଡ଼ ସହରର ଟ୍ରାଫିକ ଛକ ନିକଟସ୍ଥ ଲେମ୍ବୁ ବିକ୍ରି ଛକଠାରୁ ନୟାଗଡ଼ କୋଏନା ଢ଼ାବା ପର୍ଯ୍ୟନ୍ତ ଆସିବାକୁ ୧୦ ମିନିଟ୍ ସମୟ ବାଇକ୍ରେ ଲାଗିଥାଏ। ଏବେ ଏହି ରାସ୍ତାରେ ବାଇକ୍ ଆସିବାକୁ ଅଧ ଘଣ୍ଟାଏରୁ ୪୦ ମିନିଟ୍ ଲାଗୁଛି। ଖାଲଖମା ରାସ୍ତାକୁ ଟ୍ରାଫିକ୍ ଜାମ କାରଣରୁ ଗାଡ଼ି ଚଳାଇବା ବିଳମ୍ବ ହେଉଛି। ନୟାଗଡ଼ ସହରର ଟ୍ରାଫିକ ଛକ ନିକଟସ୍ଥ ଲେମ୍ବୁ ବିକ୍ରି ଛକଠାରୁ କୋଏନା ଢ଼ାବା ପର୍ଯ୍ୟନ୍ତ ଉନ୍ନତୀକରଣ ପାଇଁ ୨କୋଟି ୮୦ ଲକ୍ଷ ମଞ୍ଜୁର ହୋଇଛି। ନୟାଗଡ଼ ବିଧାୟକ ଅରୁଣ ସାହୁ ଏହାକୁ ଉଦ୍ଘାଟନ କରିଥିଲେ ହେଁ ଫଳକରେ ବିକାଶ ଅଟକି ରହିଥିବାରୁ ସମାଲୋଚନା କରାଯିବା ସହ ଅସନ୍ତୋଷ ବଢୁଛି।