କଟକ ଅଫିସ,୧୪ା୧୧: ରକ୍ତ ସମ୍ପର୍କ ନ ହୋଇ ମଧ୍ୟ ଜଣେ ରିକ୍ସାଚାଳକଙ୍କୁ ନିଜର ସବୁ ସମ୍ପତ୍ତିର ଉତ୍ତରାଧିକାରୀ କରିବା ପାଇଁ ମନସ୍ଥ କରି କଟକ ସୂତାହାଟ ଅଞ୍ଚଳର ମିନତି ପଟ୍ଟନାୟକ(୬୩) ମହାନତା ଦେଖାଇଛନ୍ତି। ମିନତିଙ୍କ ଅକୁଣ୍ଠ ସ୍ନେହ, ମମତା, ଭଲ ପାଇବା ଏବେ ସମସ୍ତଙ୍କ ପାଇଁ ଉଦାହରଣ ପାଲଟିଛି।
ସମ୍ବଲପୁରର ଝିଅ ମିନତି ସୂତାହାଟ ଅଞ୍ଚଳର କୃଷ୍ଣକୁମାର ପଟ୍ଟନାୟକଙ୍କୁ ବିବାହ କରିଥିଲେ। ବେଶ୍ ସ୍ବଚ୍ଛଳ ପରିବାର ତାଙ୍କର। ୨୦୨୦ରେ କୃଷ୍ଣକୁମାରଙ୍କର ଦେହାନ୍ତ ହୋଇଯାଇଥିଲା। ଝିଅ ମୁହଁକୁ ଚାହିଁ ବାକି ଜୀବନ ବିତାଇବେ ବୋଲି ଭାବିଥିଲେ ମିନତି। ହେଲେ ବିଧିର ବିଧାନ ଥିଲା ଅଲଗା। ସ୍ବାମୀଙ୍କ ଦେହାନ୍ତର ୬ମାସ ପରେ ଝିଅ କମଲଙ୍କର ହୃଦ୍ଘାତରେ ମୃତ୍ୟୁ ଘଟିଥିଲା। ଏହାପରେ ସମ୍ପୂର୍ଣ୍ଣ ଭାବେ ଭାଙ୍ଗି ପଡିଥିଲେ ମିନତି। ସମ୍ପର୍କୀୟଙ୍କ ସେଭଳି ସହଯୋଗ ନ ମିଳିବାରୁ ସେ ନିଜକୁ ଏକୁଟିଆ ବୋଲି ଭାବୁଥିଲେ। ଏହି ଅସମୟରେ ରିକ୍ସାଚାଳକ ବୁଢ଼ା ସାମଲ ତାଙ୍କ ପାଖରେ ଛିଡା ହୋଇଥିଲେ। ମିନତିଙ୍କ ପରିବାର ସହ ବୁଢାଙ୍କ ସମ୍ପର୍କ ଦୀର୍ଘବର୍ଷର। ବୁଢା କମଲଙ୍କୁ ସ୍କୁଲ ନେବାଆଣିବା କରୁଥିଲେ। ସେହିପରି ତାଙ୍କ ଘରର ବୋଲହାକଠାରୁ ଆରମ୍ଭ କରି ସବୁକିଛି କରିଆସୁଛନ୍ତି। ତାଙ୍କର ଏହି ନିଃସ୍ବାର୍ଥପର ସେବା ଦେଖି ମିନତି ତାଙ୍କ ତିନିମହଲା କୋଠା ସହ ଆସବାବପତ୍ର ଓ ସୁନାଅଳଙ୍କାର ଦେବା ପାଇଁ ଚୁକ୍ତି କରିଛନ୍ତି। ଏଥିସହ ମୃତ୍ୟୁ ପର୍ଯ୍ୟନ୍ତ ବୃଢାଙ୍କ ପରିବାର ମେଳରେ ରହି ଦିନ କାଟିବାକୁ ସ୍ଥିର କରିଛନ୍ତି। ସ୍ନେହ, ଶ୍ରଦ୍ଧା, ଭଲପାଇବା ଓ ସେବା ଆଗରେ ସମ୍ପତ୍ତି ତୁଚ୍ଛ ବୋଲି ସେ ପ୍ରମାଣ କରିଦେଇଛନ୍ତି। ବୁଢାଙ୍କ ଗୋଟିଏ ଝିଅ ବାହା ହୋଇଯାଇଥିବାବେଳେ ସ୍ତ୍ରୀ, ୨ ପୁଅ ଓ ବୋହୂ ସ୍ଥାନୀୟ ସିଦ୍ଧେଶ୍ୱର ସାହିରେ ଭଡାଘରେ ରହୁଥିଲେ। ହେଲେ ୩ ମାସ ହେବ ସେମାନେ ମିନତିଙ୍କ ଘରେ ରହିଆସୁଛନ୍ତି। ସେବେଠାରୁ ବୁଢାଙ୍କର ପରିବାର ଲୋକେ ମିନତିଙ୍କ ସେବା କରିଆସୁଛନ୍ତି।
ଏ ସମ୍ପର୍କରେ ମିନତି କହିଛନ୍ତି, ପ୍ରଥମେ ସ୍ବାମୀ ଆରପାରିକୁ ଚାଲିଗଲେ। ପରେ ଝିଅର ମୃତ୍ୟୁ ଘଟିଲା। ମୋ ସଂସାର ଉଜୁଡି ଗଲା, ସବୁ ତୁଚ୍ଛ ଲାଗିଲା। ଜୀବନର ସବୁଠାରୁ କଠିନ ସମୟରେ ବୁଢା ମୋ ପାଖରେ ଠିଆ ହୋଇଥିଲା। ସେଥିଲାଗି ମୁଁ ମୋର ସବୁ ସମ୍ପତ୍ତି ତାଙ୍କୁ ଦେବାକୁ ନିଷ୍ପତ୍ତି ନେଇଥିଲି। ଏଥିପାଇଁ ସମ୍ପର୍କୀୟମାନେ ମୋତେ ବିରୋଧ କରିଥିଲେ। ହେଲେ ମୁଁ କାହାକୁ ଖାତିର ନ କରି ମୋ’ ନିଷ୍ପତ୍ତିରେ ଅଟଳ ରହିଲି। ଅନ୍ୟପକ୍ଷରେ ବୁଢା କହିଛନ୍ତି, ମା’ ଙ୍କ ସହ ସମ୍ପର୍କ ୨୫ ବର୍ଷରୁ ଊର୍ଦ୍ଧ୍ୱ ସମୟ ହେବ। ତାଙ୍କ ଏହି ନିଷ୍ପତ୍ତିରେ ମୁଁ ବହୁତ ଖୁସି। ହେଲେ ଏହି ସମ୍ପତ୍ତିରେ ମୋର ଲୋଭ ନାହିଁ। ମୁଁ ମୋ ପରିବାର ଲୋକେ ମା’ଙ୍କ ଶେଷ ସମୟ ପର୍ଯ୍ୟନ୍ତ ସେବା କରିବୁ। ଏଥିରେ କୌଣସି ହେଳା କରିବୁ ନାହିଁ।