ରାଜନଗର, ୧ା୩(ଡି.ଏନ.ଏ.): କେନ୍ଦ୍ରାପଡ଼ା ଜିଲା ଗହୀରମଥା ସାମୁଦ୍ରିକ ଅଭୟାରଣ୍ୟରେ ଅଲିଭ୍ରିଡ୍ଲେ ଅନ୍ତଃସତ୍ତ୍ୱା କଇଁଛମାନଙ୍କ ଅଣ୍ଡାଦାନ ପର୍ବ ବିକ୍ଷିପ୍ତ ଭାବେ ଆରମ୍ଭ ହୋଇଛି। ଏଥିପାଇଁ ସାମୁଦ୍ରିକ ଅଭୟାରଣ୍ୟର ନୀଳ ଜଳରାଶିରେ ଏବେ ଲକ୍ଷାଧିକ ଅନ୍ତଃସତ୍ତ୍ୱା କଇଁଛ ପ୍ରକୃତିର ବିବର୍ତ୍ତମାନରେ ଗଣଅଣ୍ଡାଦାନ କରିବାକୁ କୂଳମୁହଁା ହେବାରେ ଲାଗିଛନ୍ତି। ୨୦୨୨ ମାର୍ଚ୍ଚ ୨ୟ ସପ୍ତାହ ପରେ ଗଣଅଣ୍ଡାଦାନ ପ୍ରକ୍ରିୟା ଆରମ୍ଭ ହୋଇଥିଲା। ଆଗକୁ ଦୋଳପୂର୍ଣ୍ଣିମା ଥିବାରୁ କଇଁଛ ବିଶେଷଜ୍ଞମାନେ ଅନୁକୂଳ ପାଗକୁ ଚାତକ ପରି ଚାହିଁ ରହିଛନ୍ତି। ଦକ୍ଷିଣା ପବନ ପ୍ରବାହିତ ହେଲେ ନୀଳ ଜଳରାଶିର ଢେଉକୁ ଅତିକ୍ରମ କରି ବାବୁବାଲି ଦ୍ୱୀପ, ସାତଭାୟାର ବିସ୍ତୀର୍ଣ୍ଣ ବେଳାଭୂମି, ନାସୀ-୧, ୨ ଏବଂ ବରୁଣେଇ ମୁହାଣ ସଂଲଗ୍ନ ପେଣ୍ଠ ବେଳାଭୂମିରେ ଗଣଅଣ୍ଡାଦାନ କରିବାକୁ ଅଲିଭ୍ରିଡ୍ଲ କଇଁଛମାନଙ୍କ ଆଗମନକୁ ଅପେକ୍ଷା କରାଯାଇଛି। ରାଜନଗର ବନ ବିଭାଗ ପକ୍ଷରୁ କଇଁଛମାନଙ୍କ ଗଣଅଣ୍ଡାଦାନ ପ୍ରକ୍ରିୟା କିପରି ସୂଚାରୁ ରୂପେ ସମାପନ ହେବ, ସେଥିପାଇଁ ଡିଏଫ୍ଓ ସୁଦର୍ଶନ ଗୋପୀନାଥ ଯାଦବ ସମସ୍ତ ପ୍ରସ୍ତୁତି ଶେଷ କରିଛନ୍ତି। ଇତିମଧ୍ୟରେ ଋଷିକୁଲ୍ୟା ମୁହାଣରେ ଲକ୍ଷାଧିକ ଅଲିଭ୍ରିଡ୍ଲେ କଇଁଛ ଗଣଅଣ୍ଡାଦାନ ଜାରି ରଖିଛନ୍ତି। ଇତିମଧ୍ୟରେ ବିକ୍ଷିପ୍ତ ଭାବେ ୩୮ଟି କଇଁଛ ୪୭୬୧ ଅଣ୍ଡା ଦେଇ ସାରିଛନ୍ତି। ନାସୀ-୨ରେ ୩୫ଟି କଇଁଛ ୪୩୨୯ ଅଣ୍ଡା ଦେଇଥିବା ବେଳେ ଏକକୁଳା ନାସୀରେ ୩ଟି କଇଁଛ ୪୩୨ଟି ଅଣ୍ଡା ଦେଇଛନ୍ତି। ୨୦୨୨ରେ ଗହୀରମଥାରେ ୫ ଲକ୍ଷ ୧,୧୫୭ କଇଁଛ, ଋଷିକୁଲ୍ୟା ମୁହାଣରେ ୫ ଲକ୍ଷ ୫୦ ହଜାର ଗଣଅଣ୍ଡାଦାନ ପ୍ରକ୍ରିୟାରେ ସାମିଲ ହୋଇଥିଲେ। ଉଲ୍ଲେଖଯୋଗ୍ୟ, ଅଷ୍ଟ୍ରେଲିଆର ବିଶିଷ୍ଟ ପ୍ରାଣୀ ବୈଜ୍ଞାନିକ ଏଚ୍ଆର ବଷ୍ଟାର୍ଡ ସର୍ବପ୍ରଥମ ବ୍ୟକ୍ତି ଭାବେ ଗହୀରମଥାରେ ପାଦ ରଖି ଲକ୍ଷାଧିକ ଅଲିଭ୍ରିଡ୍ଲେ କଇଁଛଙ୍କ ଗଣଅଣ୍ଡାଦାନ ପ୍ରକ୍ରିୟାକୁ ଦେଖି ବିମୋହିତ ହୋଇଥିଲେ। ବିଶ୍ୱବାସୀଙ୍କୁ ଗହୀରମଥାକୁ ଅଲିଭ୍ରିଡ୍ଲେ କଇଁଛଙ୍କ ସର୍ବଶ୍ରେଷ୍ଠ ଅନ୍ତୁଡ଼ିଶାଳ ଭାବେ ଜଣାଇବା ସହ ବିଶ୍ୱ ପର୍ଯ୍ୟଟନ ମାନଚିତ୍ରରେ ନୂତନ ଦିଗନ୍ତ ଉନ୍ମୋଚନ କରିଥିଲେ। ସେବେଠାରୁ ଗହୀରମଥା ସାମୁଦ୍ରିକ ଅଭୟାରଣ୍ୟ ଅଲିଭ୍ରିଡ୍ଲେ କଇଁଛଙ୍କ ଅନ୍ତୁଡ଼ିଶାଳ ରୂପେ ଖ୍ୟାତି ଅର୍ଜନ କରିଛି।
