ଗଞ୍ଜାମ,୧୬।୧୨(ଡି.ଏନ.ଏ.): ଗଞ୍ଜାମ ବ୍ଲକ ପାଳିବନ୍ଧ ପଞ୍ଚାୟତ ପୁରୁଣାବନ୍ଧ ଗ୍ରାମ ନିକଟ ଋଷିକୁଲ୍ୟା ମୁହାଣଠାରେ ଅଲିଭ ରିଡ୍ଲେ କଇଁଛଙ୍କ ମିଳନ ପର୍ବ ଆରମ୍ଭ ହୋଇଛି। ଚଳିତଥର ନଭେମ୍ବର ଦ୍ୱିତୀୟ ସପ୍ତାହରୁ ଏହି ପ୍ରକ୍ରିୟା ଆରମ୍ଭ ହୋଇଥିଲେ ମଧ୍ୟ ସମୁଦ୍ର ମଧ୍ୟରେ ପ୍ରାୟ ୨୦ କି.ମି. ଦୂରରେ କାଁଭାଁ କଇଁଛଙ୍କ ମିଳନ ଚାଲୁଥିବା ବନ ବିଭାଗର ପାଟ୍ରୋଲିଂ ବେଳେ ଦେଖାଯାଇଥିଲା । ଏବେ ଦଳ ଦଳ କଇଁଛଙ୍କ ମିଳନ ଚାଲିଛି ବୋଲି ଡିଏଫଓ ଅମ୍ଲାନ ନାୟକ କହିଛନ୍ତି। ସମୁଦ୍ରରେ ଘଣ୍ଟାଘଣ୍ଟା ଧରି ଏହି ମେଟିଙ୍ଗ ଦେଖାଦେବ। ଏହା ପରେ ସମୁଦ୍ର ଉପକୂଳରେ ଦକ୍ଷିଣା ପବନ ବହିଲେ ସାମୂହିକ ଅଣ୍ଡାଦାନ ପ୍ରକ୍ରିୟା ଆରମ୍ଭ ହେବ ବୋଲି ବନ ବିଭାଗ ପକ୍ଷରୁ ପୂର୍ବାନୁମାନ କରାଯାଉଛି। କଇଁଛଙ୍କ ମିଳନ ଲାଗି ଉତ୍ତର ଦିଗରେ ଥିବା ପ୍ରୟୋଗି ଏବଂ ଦକ୍ଷିଣରେ ଆର୍ଜିପଲ୍ଲୀ ପର୍ଯ୍ୟନ୍ତ ସମୁଦ୍ର ଅଞ୍ଚଳକୁ ବନ ବିଭାଗ ପକ୍ଷରୁ ନିଷିଦ୍ଧାଞ୍ଚଳ ଘୋଷଣା କରାଯାଇଛି। ଅଣ୍ଡାଦାନ ସ୍ଥାନଗୁଡିକ ବ୍ୟାରିକେଡ୍ କରାଯାଇଛି। ସେହିପରି କଇଁଛଙ୍କ ମିଳନ ଓ ଗଣ ଅଣ୍ଡାଦାନରେ ବାଧା ନ ଉପୁଜିବା ଲାଗି ବିଭିନ୍ନ ସ୍ଥାନରେ କୋଷ୍ଟଗାର୍ଡ ନିୟୋଜିତ ହୋଇଛନ୍ତି। ଜାନୁୟାରୀ ଶେଷ ସପ୍ତାହ କିମ୍ବା ଫେବୃୟାରୀ ଦ୍ୱିତୀୟ ସପ୍ତାହରେ ସାମୂହିକ ଅଣ୍ଡାଦାନ ପ୍ରକ୍ରିୟା ଆରମ୍ଭ ହୋଇପାରେ ବୋଲି ସ୍ଥାନୀୟ ପରିବେଶବିତ ଆଶା ରଖିଛନ୍ତି।