କୋକସରା,୨୩ା୮(ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲା କୋକସରା ଥାନା ଓଲମା ଗାଁର ଧନଞ୍ଜୟ ସାହୁଙ୍କ ଘରେ ରବିବାର ରାତିରେ ଡକାୟତ ଗ୍ୟାଙ୍ଗ ଲୁଟ୍ କରି ଫେରାର ହୋଇଯିବା ଘଟଣାରେ ବୁଧବାର କୋକସରା ପୋଲିସ ୪ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ଘଟଣାରେ ସମ୍ପୃକ୍ତ ଅନ୍ୟ ଜଣଙ୍କୁ ଡାକ୍ତରଖାନା ନେବା ବାଟରେ ମୃତ୍ୟୁ ହୋଇଥିବା ଧର୍ମଗଡ଼ ଉପଖଣ୍ଡ ପୋଲିସ ଅଧିକାରୀ ପ୍ରେସ୍ ବିବୃତ୍ତିରେ ସୂଚନା ଦେଇଛନ୍ତି।
ପୋଲିସ ସୂଚନାନୁସାରେ, ରବିବାର ବିଲମ୍ବିତ ରାତିରେ ଓଲମା ଗାଁର ଧନଞ୍ଜୟ ସାହୁଙ୍କ ଘରର ମୁଖ୍ୟ ଗେଟ୍ ଦେଇ ୧୦ରୁ ୧୨ ଜଣ ମୁଖାପିନ୍ଧା ଡକାୟତ ଘର ଭିତରକୁ ପଶିଥିଲେ। ସେମାନେ ଘର ଲୋକଙ୍କୁ ମାରପିଟ୍ କରି ଭୟଭୀତ କରାଇ ଟଙ୍କା, ସୁନା ଗହଣା ଓ ଘରର ଆସବାବପତ୍ର ସହିତ ଟିଭି, ଲାପ୍ଟପ୍, କମ୍ପ୍ୟୁଟର ଆଦି ସାମଗ୍ରୀ ଲୁଟ୍ କରି ଚମ୍ପଟ ମାରିଥିଲେ। ଏହାରି ଭିତରେ ପାଚେରି ଡେଇଁ ଫେରାର ହେଉଥିବା ଜଣେ ଡକାୟତଙ୍କ ଗୋଡ଼ ଭାଙ୍ଗି ଯିବାରୁ କାବୁ କରି ଗାଁ ଲୋକେ ପୋଲିସକୁ ଜିମା ଦେଇଥିଲେ। ଧର୍ମଗଡ଼ ଉପଖଣ୍ଡ ପୋଲିସ ଅଧିକାରୀ ଧୀରଜ କୁମାର ଚୋପଦାରଙ୍କ ନେତୃତ୍ୱରେ କୋକସରା, ଆମପାଣି ସମେତ ବିଭିନ୍ନ ଥାନାର ପୋଲିସ ଅଧିକାରୀମାନଙ୍କ ସହିତ ସନ୍ଧାନୀ କୁକୁର ଓ ସାଇଣ୍ଟିଫିକ୍ ଦଳ ସାହାଯ୍ୟରେ ତଦନ୍ତକୁ ଜୋରଦାର କରାଯାଇଥିଲା। ଘଟଣା ଦିନ ହିଁ ଜଣେ ଡକାୟତକୁ ଆମପାଣି ଥାନା ପୋଲିସ କାଉଡୋଲାରୁ କାବୁ କରିଥିଲା। ବିଭିନ୍ନ ସ୍ଥାନରେ ପୋଲିସ କଡ଼ାକଡ଼ି ତଦନ୍ତ ଆରମ୍ଭ କରି ଦେଇଥିଲା। ଏହି ଘଟଣାରେ ବର୍ତ୍ତମାନ ସୁଦ୍ଧା ୫ଜଣକୁ ପୋଲିସ ଧରିଥିବା ବେଳେ ପାଚେରି ଡେଇଁ ଫେରାର ବେଳେ ଗୋଡ ଭାଙ୍ଗି ଗୁରୁତର ହୋଇଥିବା ସମ୍ପୃକ୍ତ ଯୁବକଙ୍କ ବୁର୍ଲା ମଡିକାଲ ନେବା ସମୟରେ ରାସ୍ତାରେ ତାଙ୍କର ମୃତ୍ୟୁ ହୋଇଥିବା ଓ ଗିରଫ ୪ ଜଣଙ୍କୁ ବୁଧବାର ଡାକ୍ତରୀ ମାଇନା ପରେ କୋର୍ଟ ଚାଲାଣ କରାଯାଇଥିବା ସୂଚନା ଦିଆଯାଇଛି।