ନୂଆଦିଲ୍ଲୀ,୨୧।୧୧(ପି.ଟି.): ଭାରତୀୟ କିମ୍ବଦନ୍ତୀ କ୍ରିକେଟର ସୁନୀଲ ଗାଭାସ୍କରଙ୍କ ସଂସ୍ଥା ‘ଦି ଚାମ୍ପ୍ସ ଫାଉଣ୍ଡେଶନ’ ଦୀର୍ଘ ଦୁଇ ଦଶନ୍ଧି ଧରି ଆର୍ଥିକ ଦୁର୍ଗତିର ଶିକାର ହୋଇଥିବା କ୍ରୀଡ଼ାବିତ୍ମାନଙ୍କୁ ସାହାଯ୍ୟ କରିଆସୁଛି। ଏବେ ଗାଭାସ୍କରଙ୍କ ଏହି ସଂସ୍ଥା ହକି ଅଲିମ୍ପିଆନ ମହୀନ୍ଦର ପାଲ ସିଂଙ୍କୁ ସାହାଯ୍ୟ କରିଛି। ଏମ୍.ପି. ସିଂ ନାମରେ ପରିଚିତ ଥିବା ଏହି ପୂର୍ବତନ ହକି ଖେଳାଳି କିଡ୍ନୀ ଜନିତ ରୋଗର ଶିକାର ହୋଇଛନ୍ତି। ୫୮ ବର୍ଷୀୟ ମହୀନ୍ଦର ଡାଏଲିସିସରେ ରହିଛନ୍ତି। ସେ କିଡ୍ନୀ ପ୍ରତିରୋପଣ ପାଇଁ ଜଣେ ଡୋନର ଅର୍ଥାତ ଦାତାଙ୍କ ଅପେକ୍ଷାରେ ରହିଛନ୍ତି।
ଖବର କାଗଜ ଜରିଆରେ ଗାଭାସ୍କର ମହୀନ୍ଦରଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ଜାଣିବାକୁ ପାଇଥିଲେ। ଏମ୍.ପି. ସିଂ ଭାରତୀୟ ହକି ଦଳର ନିୟମିତ ସଦସ୍ୟ ଥିଲେ। ସେ ୧୯୮୮ ସିଓଲ ଅଲିମ୍ପିକ୍ସରେ ଅଂଶଗ୍ରହଣ କରିଥିଲେ ଓ ମହମ୍ମଦ ସହିତ, ଏମ୍.ଏମ୍. ସେମାୟା, ଜୁଡେ ଫେଲିକ୍ସ, ପରଗତ ସିଂଙ୍କ ସହିତ ଅଲିମ୍ପିକ୍ସରେ ମ୍ୟାଚ୍ ଖେଳିଥିଲେ। ମାସିକ ଭାବେ ଆର୍ଥିକ ସାହାଯ୍ୟ ଦେବା ସହ ଗାଭାସ୍କରଙ୍କ ଏହି ସଂସ୍ଥା ଖେଳାଳିମାନଙ୍କ ମେଡିକାଲ ଖର୍ଚ୍ଚ ମଧ୍ୟ ବହନ କରିଛି। ଆମେ ଅଧିକରୁ ଅଧିକ ଖେଳାଳିଙ୍କୁ ସାହାଯ୍ୟ କରିବା ଲକ୍ଷ୍ୟରେ ରହିଛୁ ବୋଲି ଗାଭାସ୍କର କହିଛନ୍ତି।
ଶିକ୍ଷା, ସ୍ବାସ୍ଥ୍ୟ, ପିଲା ଓ ବୟସ୍କ ଲୋକଙ୍କୁ ସାହାଯ୍ୟ କରିବା ପାଇଁ ବହୁତ ସଂସ୍ଥା ରହିଛି। କିନ୍ତୁ ପୂର୍ବତନ ଅନ୍ତର୍ଜାତୀୟ ଖେଳାଳିଙ୍କୁ ସାହାଯ୍ୟ କରିବା ପାଇଁ କୌଣସି ସଂସ୍ଥା ନ ଥିଲା। ଫଳରେ ଏଥିପାଇଁ ଏକ ଫାଉଣ୍ଡେଶନ ପ୍ରତିଷ୍ଠା କରିବାକୁ ଚିନ୍ତା କରିଥିଲି ବୋଲି ଗାଭାସ୍କର କହିଛନ୍ତି। ୧୯୮୩ ବିଶ୍ୱକପ୍ ଦଳର ସଦସ୍ୟଙ୍କୁ ନେଇ ଏକ ‘ଡବଲ୍ ଉଇକେଟ ଟୁର୍ନାମେଣ୍ଟ’ ଆୟୋଜନ କରିବାକୁ ନିଷ୍ପତ୍ତି ନେଇଥିଲୁ। ଏଥିରେ ଜଣେ ଶିଳ୍ପପତି ଓ କର୍ପୋରେଟ ଅର୍ଥଦାନ କରିଥିଲେ। ସେବେଠାରୁ ଏପର୍ଯ୍ୟନ୍ତ ଚାମ୍ପ୍ସ ଫାଉଣ୍ଡେଶନ ୨୧ଜଣ ପୂର୍ବତନ ଖେଳାଳିଙ୍କୁ ପ୍ରତ୍ୟକ୍ଷ ଭାବେ ସାହାଯ୍ୟ କରିଛି ବୋଲି ଗାଭାସ୍କର କହିଛନ୍ତି।