ଟୋକିଓ,୩୦।୭(ପି.ଟି.): ଅଲିମ୍ପିକ୍ସରେ ଭାରତର ପ୍ରଥମ ସୁପର ହେଭିଓ୍ବେଟ (+୯୧ କେ.ଜି.) ବକ୍ସର ଭାବେ ଅଂଶଗ୍ରହଣ କରିଥିବା ସତୀଶ କୁମାର ପଦାର୍ପଣରେ ହିଁ କ୍ୱାର୍ଟର ଫାଇନାଲରେ ପ୍ରବେଶ କାରି ଭାରତ ପାଇଁ ପଦକ ସମ୍ଭାବନା ସୃଷ୍ଟି କରିଛନ୍ତି। ଗୁରୁବାର ସେ ଜାମାଇକାର ରିକାର୍ଡୋ ବ୍ରାଉନ୍ଙ୍କୁ ହରାଇ ଏହି ସଫଳତା ପାଇଛନ୍ତି।
୩୨ ବର୍ଷୀୟ ସତୀଶ ୪-୧ରେ ବ୍ରାଉନଙ୍କୁ ଅତି ସହଜରେ ହରାଇଛନ୍ତି। ସେ ପୂର୍ବରୁ ଦୁଇଥର ଏସିଆନ ଚାମ୍ପିୟନଶିପ୍ ବ୍ରୋଞ୍ଜ ପଦକ ହାସଲ କରିଥିଲେ। ସେ ମଧ୍ୟ ଏକାଧିକବାର ଜାତୀୟ ଚାମ୍ପିୟନଶିପ୍ରେ ବିଜୟୀ ହୋଇଛନ୍ତି। ବ୍ରାଉନଙ୍କ ଦୁର୍ବଳ ଫୁଟଓ୍ବାର୍କରୁ ସେ ଫାଇଦା ଉଠାଇଛନ୍ତି। ସତୀଶ ଏହି ବାଉଟ୍ରେ ମାପଚୁପ୍ ପ୍ରଦର୍ଶନ କରିଥିଲେ। ତାଙ୍କ ପ୍ରଦର୍ଶନକୁ ଭାରତୀୟ ବକ୍ସିଂ ହାଇପରଫର୍ମାନ୍ସ ଡାଇରେକ୍ଟର ସାଣ୍ଟିଆଗୋ ନିଏଭା ପ୍ରଶଂସା କରିଛନ୍ତି। କ୍ୱାର୍ଟରରେ ସତୀଶ ଉଜବେକିସ୍ତାନର ବାଖୋଡିର ଜାଲୋଲୋଭଙ୍କୁ ଭେଟିବେ। ଏସିଆନ ଚାମ୍ପିୟନ ଜାଲୋଲୋଭ ୫-୦ରେ ଆଜରବୈଜାନର ମହମ୍ମଦ ଅବଦୁଲ୍ଲାୟେଙ୍କୁ ହରାଇ କ୍ୱାର୍ଟରକୁ ଉଠିଛନ୍ତି। ତେବେ ଏହି ମୁକାବିଲାରେ ସତୀଶ କଡ଼ା ଚ୍ୟାଲେଞ୍ଜର ସମ୍ମୁଖୀନ ହେବେ ବୋଲି ନିଏଭା କହିଛନ୍ତି।
ସତୀଶ ପୂର୍ବରୁ ୨୦୧୮ ରାଜ୍ୟଗୋଷ୍ଠୀ କ୍ରୀଡ଼ାରେ ରୌପ୍ୟ ପଦକ ହାସଲ କରିଥିଲେ। ଉତ୍ତରପ୍ରଦେଶର ବୁଲନ୍ଦ ସହରରେ ରହୁଥିବା ସତୀଶ ଜଣେ ସୈନିକ। ସେ କବାଡି ଖେଳୁଥିଲେ। ତେବେ ତାଙ୍କର ଦୃଢ ତଥା ଶକ୍ତିଶାଳୀ ଶରୀର ଦେଖି ଆର୍ମି କୋଚ୍ମାନେ ତାଙ୍କୁ ବକ୍ସିଂ ଖେଳିବାକୁ ଉତ୍ସାହିତ କରିଥିଲେ। ଅପରପକ୍ଷରେ ୩୧ ବର୍ଷୀୟ ବ୍ରାଉନ ୧୯୯୬ ପରେ ଜାମାଇକାର ପ୍ରଥମ ବକ୍ସର ଭାବେ ଅଲିମ୍ପିକ୍ସ କ୍ୱାଲିଫାଏ କରିଛନ୍ତି।